1 SAMUEL 31 - BIBALDA TA PELDETTA

Sum sa Filistina ci Sawul hiɗi gurona valamu

¹ Sum sa Filistina li duura hiɗi sa Israyella, sum sa Israyella mun jaŋi vok sa Filistina, nisi cuk gaa'a, cap mita kulo kay hiɗiyna vi Gilbowa.

² Sum sa Filistina digiɗ Sawul hiɗi gurona valamu, nisi ci Yonatan, Abinadab hiɗi Malkisuwa hiɗi gurona vi Sawul.

³ nekka vi duura zor kayni kay Sawul; sa dur ɓarawta co talamu, tuwam muɗ vum bat-bat' voksi dono ŋolo.

⁴ Nala Sawul di tam sa ma ziy sle-ma-duura valamna ala: Pataŋ kewta vaŋ goyo, jikanu, kay a sum sa bay ka gosayn lakŋi ma co'o, jikanu, lasan ki nisi min nala kayn may asɗi. Sa ma ziy sle-ma-duura valamna minɗi, kay tuwam liy nar ŋolo. Sawul kay tuwam sli kew-gaferaŋa valamu, nam gi tuwam vunamu.

⁵ Hay li ma sa ma ziy sle-ma-duura vi Sawul wi ala Sawul mitiya, nam gi tuwam vun kew-gaferaŋa valamu, cap mit hiɗi Sawul lay.

⁶ Ki kayn nala, hay fatta kepta, Sawul hiɗi gurona valam sa ɦidina, hiɗi sa ma ziy sle-ma-duura valamna hiɗi sum sa kuɗsin kaf fi mitta.

⁷ Sa Israyella sa ay goy gal hena vi liyn ma beɗna, hiɗi sa gal hena vi Yordan, hay li ma nisi wi ala sumuna vi Israyel ka mun jaŋi kay Sawul hiɗi gurona valam kaw fi mittawa, nisi hin hoyok-ziyna visi goyo, muni jaŋi kaw. Sa Filistina kalay lak ziy hay nagata visiya.

⁸ Hay buurta ka'ta, sa Filistin co'o kay fok sligar ma tam sum sa mitin goyo, hay na'ta nisi fi Sawul hiɗi, gurona valam sa ɦidin miti kay hiɗiyt Gilbowa lak'.

⁹ Nisi ka yam Sawul goyo, yaw sle-ma-duura valamu. Bugol kayni labar namna ma ŋaana nisi dum goy hay nagata vi sa Filistin kaf, hay ziyna vi lawayn waana visiya, jar sum segen kaf kaw.

¹⁰ sle-ma-duura vi Sawul nisi lakam hay ziyna vi Astarte, tuwamu nisi junum kulo tam gulmunna vi Bet-San.

¹¹ Hay li ma sum sa Yabes hay Galaad hum labara kay slen ma sum sa Filistina lum tam Sawul,

¹² sum sa jufayna kaf yaw kulo'o, nisi bur tuɗ talal', tuw Sawul ma ka ɓalay kulo tam gulmun ma Bet-San nisi slumu, tuw gurona valam kaw. Bugolda nisi marsi hay Yabes, nisi nalsi tuwsi goyo.

¹³ Nisi yawsi zoksiya, pum gaa kuɗ gu-tumuura hay Yabes. Nisi li laata ir buur siɗiya may.