1 SAMUEL 30 - BIBALDA TA PELDETTA

David dur hiɗi sum sa Amalekŋa

¹ Hay li ma David hiɗi sumuna valamu co hay Siklag hay buurta ɦidita, nisi fi kayni, gal ma kayamna hiɗi Siklag vurumi kay sa Amalekŋa vatiya. Nisi ŋal Siklag goyo, vuruma'a kaw.

² Boyna hiɗi sum sa ka kay nagat na'ta kaf, gurosgurayna hiɗi sum sa ŋulona kaf nisi yawsi gorvo'o. Nisi min ci saɗi, may nisi yaw sumun kaf, patsi voksi hay hagata.

³ David hiɗi sumuna valamu co hay hoyok-ziyna, nisi ɗuw na kayni, nam ka ŋalay goyo; boyna visiya hiɗi gurona visi sa jufayna hiɗi sa boyn kaw yaway gorvo'o.

⁴ Nala David hiɗi sum sa kuɗumna tiy ŋolo ta-ta donosi ma tiyn muɗ may loɗi.

⁵ Boyna vi David sa ma'na yaway kaw, kayni si Ahinowam ta Yisreelta hiɗi Abigayil ta Karmelta, cata vi Nabal.

⁶ David kal hay yorta ŋolda, kay sumun ka law ala nisi min gum hiɗi goorhoyona, kay nisi kaf diksi ɓulakay ŋolo, kay gigekaw dikam ka tumu kay gurona valam sa jufayna hiɗi sa boyna. May David va' talamu, kay nam tun ŋalda valam kay Ma-Vatɗina Lawna valamu.

⁷ Nam di tam mul-ma-ɗifinna Abiyatar goora vi Akimelek: Naŋ maran sligar-ŋoŋŋa. Abiyatar mar sligar-ŋoŋŋa mi David.

⁸ David job Ma-Vatɗina di'e: Sumun kayni nan ma slisi giɗersi su? Nan ma fisi su? Ma-Vatɗina hot dumu: Tuɗaŋ kuɗsiya, kay naŋ ma fisiya, naŋ ma but sumun goyo kaw.

⁹ David tun goy hay hagata, namu hiɗi sum sa kis-karkiya sa ay hiɗi namna. Nisi co hay niy-ma-riŋŋa vi Besor. Sum sa hin goy bugolla hin hay liy namna.

¹⁰ David sli giɗer sumuna hiɗi sum sa kis-fiɗi sa ay hiɗi namna; sum sa kis-ma'na lakaya, nisi makay ŋolo, as ɦaw niy-ma-riŋŋa vi Besor kuloɗi.

¹¹ Nisi fi sa ma Egipten hay fulda kepe, nisi maram kat David. Nisi vulum fu a ti'e, vulum niy ma ci'e kaw.

¹² Nisi vulum vuɗna vi gu-gumna ma beɗay hambulla ma soy goyna neɗe, hiɗi gulda-gulda ma beɗay hambulla ma soyna neɗe kaw. Hay li ma nam ti tina, donota valam hotay talamu. Kay nam bay ti fuwa, bay ci niyo kaw ta-ta ir buur ɦidi.

¹³ David dumu: Naŋ mi sa vi gige? Naŋ may arige pa? Nam hot dita: Nan mi goor-joriyo ma Egipte, nan ka vok sa ma Amalekŋa mara kepe. Tuwan li moyo, kay na'ta mulanna hinan goyo wulini buur liy ɦidi.

¹⁴ Numa kalay vurum gal ma kayamna vi sum sa Keretiyena, hay nagata vi Yuda, hiɗi gal ma kayamna vi Kaleb, numa ŋal nagat Siklag ay goyo kaw.

¹⁵ David dumu: Naŋ min naran tam sum nisina su? Nam hot dita: Naŋ ma yi va kaŋu hay sem Lawna ala naŋ ma can goyɗi, naŋ as vulan goy mi mulannaɗi kaw, nala nam ma naraŋ kat sum nisina.

¹⁶ Nam tuni vokomu kay ɗekem hagata. Ɗuw na kayni, sum sa Amalekŋa ka ŋuyi goy hay liyn kafe, ka ti'e, ka ci'e, ka pir nulu kaw, kuɗ sle ma nisi tumi ɓuraŋi hay nagata vi sa Filistina, hiɗi ma hay nagata vi Yuda.

¹⁷ David cisiya, tun caw hay li ma liyn fo goyn pa ta-ta goy hay vulatita vi buurta ka'ta. Sa kuɗsi kep kaw hulot goyɗi, hulot goy kayni si guro-joriyon Kis-fiɗi sa ɓe kulo kay lamgana, sa pir jaŋi tuta.

¹⁸ Sle ma sum sa Amalekŋa yawamayna David hotomay goy kafe, boyna valam sa ma'na kaw nam butsi goyo.

¹⁹ Sa mara kep kaw hin goy kuɗsiɗi, goorɗi lay ŋolɗi lay, goor-jufɗi lay goot-caɗi lay, sle ma sumun vurumumna mara hin goy kuɗsi kepɗi kaw, sle ma sumun vurumumna David hotomay kafe.

²⁰ Faray ma gurayna hiɗi ma ŋulona David hotomay kafe, sum sa ka tuni kuɗ farayn kay bayamna ka di'e: Kayni mi sle ma ɓuraŋŋa vi David.

²¹ David co kat sum sa kis-ma'na nam hinsis goyo, sa as tuɗ kuɗumɗi kay nisi makay ŋolo, sa nam hinsis goyo kel niy-ma-riŋŋa vi Besor. Nisi yawaya kay ŋaf ir David hiɗi sum sa kuɗumna, David co tisi goboyo, nam jobsi ala nisi ka ŋaa su.

²² Sum sa diksi joona hiɗi sum sa waa ɗaara sa may kuɗ Davidna sli ditiya di'e: Kay nisi min tuɗis hiɗi nayɗi, sle ma ɓuraŋŋa ma nay hulotomi goyna nay as vulsi mara noŋ ne'ɗi, vulsit si boyna visiya hiɗi gurona visiya tuta; nisi ma yawsiya, kay tuɗ hiɗi nisiya tuta.

²³ May David di'e: Bosiyonna, va ma Lawn vulaytna nigi ma di kalam ki kayn naɗi; kay nam ŋomaya, sum sa co durayna nam vulsi hay ɓaya.

²⁴ Sa ma as hum kuɗgi hay lawt kayni mi gige? Ɓurawta ma li ŋray ca jar sa ma tuɗ vun duura hiɗi sa ma hin tam jakŋa: Nisi as ɓurawam jar-tuwsi ŋray ca.

²⁵ Lawt kayni hini nala, tun caw hay buur namna pa ta-ta vok noŋ ɗaw. Lawt kayni hin jar sa Israyella ki gatta hiɗi dita vi sumaysi nala ta-ta vok noŋ ɗaw.

²⁶ Hay li ma David hotay hay Siklag, sle ma ɓuraŋŋa nam vul gal hen mi sa maariyana vi Yuda, sa boniyomna, nam disi ala: Kayni mi sle ma yawamay hay ɓam sum sa gaw kay Ma-Vatɗina, heɗe! Galla vigiya!

²⁷ Nam vul slena tam sum sa hay Betel kaw, tam sa hay Ramot hay gal kayami, tam sa hay Yattir,

²⁸ tam sa hay Arower, tam sa hay Sifmot, tam sa hay Ektemowa,

²⁹ tam sa hay Rakal, tam sa hay hoyok-ziyna vi sa Yerahmeella, tam sa hay hoyok-ziyna vi sa Keniyena.

³⁰ Tam sa hay Horma, tam sa hay Kor-Askan, tam sa hay Atak,

³¹ tam sa hay Hebron, hay liy ma David hiɗi sumuna valamu ŋuyi hayna kafe.