1 SAMUEL 28 - BIBALDA TA PELDETTA

Duura hiɗi sa Filistina. David jar sojena vi sa Filistina

¹ Hay liy namna kayni, sum sa Filistin tok vokŋa visiya, kot tuw sojena visiya kay dur sa Israyella. Akis di tam David: Naŋ wi ala naŋ hiɗi sumuna vaŋu ma tap kuɗan vun duura.

² David hot dit tam Akis: Va ma sa ma sunda vaŋ min lumna naŋ ma wum goy ŋaa'a. Akis di tam David: Nala kaw nan min ala naŋ ma li dok-dok mi sa ma ŋomanna.

³ Hay na'ta kayni Samuel mitiya, sum sa Israyella kaf tiyimu, nisi pum hay hoyok-ziyna valamu hay Rama. Hay liyna vi Sawul kayni, sum sa hay nagat Israyel sa job kuɗ sa mitina hiɗi sa law kay slen ma voksina Sawul cisi goy kafe.

⁴ Sum sa Filistin tok tuwsiya, nisi co'o, tun vokŋa visi hay Sunem, Sawul tok sum sa Israyel kafe, nisi tun vokŋa visi hay Gilbowa.

⁵ Hay li ma Sawul wi vokŋa vi sa Filistina, narta ŋolda kal hayamu, dikam tun caw vum hiɗi dono bat-bat'.

⁶ Sawul job Ma-Vatɗina, may Ma-Vatɗin min hotom dit noŋɗi; min hotom dit hay duwaytɗi kaw, hiɗi urimɗi kaw, hiɗi della vi sa jobtaɗi kaw.

Sawul job kuɗ cat ta li gul-yalda

⁷ Nala Sawul di tam sa sunda valamu: Nigi ma garan cata ta job sa mitina, kay nan min tuɗ job kuɗa'a. Sa sunda valamu dum ala: Humaŋu hay En-dor cat tara ka kepe, na' job sa mitina.

⁸ Nala Sawul muɗ tuwamu, nam cuk sligar mara'a, nam kalay hiɗi sumun kuɗum ma'. Hay henjeta nisi co hay ziyna vi cata. Sawul da'a; nak ma job tam sa ma mitiya kay nam ma dan kay sle ma vokŋa. Sa ma nan min dag kalamna ɗawni nak ma maranti kulo kiranu.

⁹ Cata hot dumu: Humaŋu, naŋ wi va ma Sawul lumna, nanige sum sa hay nagata sa job sa mitina hiɗi sa di kay slen ma voksina nam cisi goyo; wulin kayni naŋ min gan jawt vokanu kay can goyo kay mige?

¹⁰ Sawul yi slen kalam vok Ma-Vatɗina, nam di'e: Ma-Vatɗin ka iriya, va ma min co tagu kuɗ kayni mayɗi.

¹¹ Nala cat di'e: Naŋ min ala nan ma maraŋgi kulo mi gige? Nam hot dita: Nak ma maran Samuel kulo kiranu.

¹² Hay li ma cat ira' wi Samuel, na' ciriy ŋolo, na' di tam Sawul: Naŋ ɗutanu kay mige? Naŋ zawni mi Sawul.

¹³ Mulla di ta'a: Lag nar noŋɗi; may nak wum mi gige? Cata di tam Sawul: Nan wi lawayn mara'a ka jikay kulo'o vi nagat pa.

¹⁴ Nam di ta'a: Vokom ir nanige? Na' hot dita: Ka jikay kulo kayni mi sa ma maari, sligara ka ɗuti talamu. Nala Sawul wi ala kayni mi Samuel, nam girif gaa kay nagata, dab vokom gaa'a.

¹⁵ Samuel di tam Sawul: Naŋ hiwiran ki kayn nala kay jikanay kulo'o kay mige? Sawul hot-dita: Nan ka hay vun zlata ta ŋolda: Sum sa Filistin ka lan duura, Lawn vi tuwamawa goy hiɗi nanu kaw; nam min hot dit tanu hiɗi della vi sa jobtaɗi, hiɗi duwaytɗi kaw. Nan yaŋ kayni kay naŋ ma ɗekan kay va ma nan lumu.

¹⁶ Samuel di'e: La ki kayn nala naŋ min jobanu kay mige? Kay Ma-Vatɗin vi tuwamawa goy hiɗi naŋu, nam muɗi mi ma gaw kaŋŋa?

¹⁷ Ma-Vatɗina ma li taŋu ki nan daŋ dita valam nala; Ma-Vatɗin jet mulda ta hay ɓaŋgawa goyo, vula'awa goy mi sa mara'a, mi David.

¹⁸ Naŋ may hum kuɗ della vi Ma-Vatɗin noŋɗi, naŋ min ɗek ɦiyda ŋolda vi Ma-Vatɗina mi Amalek noŋɗi: Kuɗ na'ta kayni Ma-Vatɗina ma li taŋ vaydi ki nam min nala.

¹⁹ Naŋu hiɗi sa Israyel kaf kaw Ma-Vatɗin ma vulgi hay bam sa Filistina. Jifini, naŋ hiɗi gurona vaŋu nigi ma co lak hiɗi nanu, Ma-Vatɗin ma vul vokŋa vi sa Israyella mi sa Filistina.

²⁰ Wulini wulini Sawul nig gaa kay nagat girit', dita vi Samuel hobom hiɗi yorta; donota valam ka kiɗa goy vok suwa, kay nam busa he' cap bura bay ti fuwa.

²¹ Cata co kat Sawul, hay li ma na' wum kayni, nam muɗi nar ŋolo, na' di talamu, humaŋu, gorvota vaŋu humaŋ vunaŋawa; nan hin tuwan vun mitta, kay nan hum kuɗ yoboy ma naŋ dantina.

²² Wulin kayni, naŋ kaw humaŋ kuɗ yoboyna vi gorvota vaŋu, naŋ hinan nan vulaŋ fu neɗe, kay naŋ ma ti'e kay fi dono'o jew a naŋ tun goy hay hagata.

²³ May nam minɗi, nam di'e: Nan as ti noŋɗi. Sa sunda valamu hiɗi cata so tuwsi talamu, nam hum kuɗsiya may nam fok kulo'o kay nagat pa, tuɗ mus kulo kay gilikŋa.

²⁴ Goor-put ma jakay ka vo tam cat kepe, na' ŋatam gosoyo; na' sli futuwna, yi funa, na' kot fun-bay-kufna kaw.

²⁵ Na' lakam gaa vok Sawul hiɗi sa sunda valamu. Nisi ti'e may. Bugolda nisi fokay kulo'o, nisi kaliya hay henjet na'ta may.