1 SAMUEL 25 - BIBALDA TA PELDETTA

Mitta vi Samuel. David hiɗi Nabal hiɗi Abigayil

¹ Samuel mita. Sum sa Israyel kaf tok tuwsiya, nisi tiyimu, nisi pum hay ziyna valamu hay Rama. Hay na'ta David fokay kulo'o, kalay hay fulda vi Paran.

² Sa mara kep ka hay Mawon, nam faray ŋolo. Farayna valam ka hay Karmel; fok-dimin birim ɦidi, fok-meen birim kep, nam kal ɗawni hay Karmel kay ka ɗuŋus fok-dimina valam goyo.

³ Sa namna semda valam ala Nabal, cata valam ya' ala Abigayil, cat na'ta ti cat ta vaara va' ŋaa'a, jifiy ŋaa'a kaw. May Nabal kayni iram ɗeŋ ŋolo, joo ŋolo hay lopna valam kaf kaw. Nam hay jafna vi Kaleb.

⁴ Ɗawni hay fulda, David hum labara ala Nabal ka ka ɗuŋus fok-dimina valam goyo.

⁵ Nam cuk sum sa joriyon talam doogo, nam ka disi ala: Tuɗgi hay Karmel, tuɗgi kat Nabal. Nigi ma dum ala nan gum deɓisa.

⁶ Nigi ma dum ala: Musaŋ iri hay sle'ta, sle'ta li kay ziyna vaŋu hiɗi nisi sa ir vaŋŋa kafe.

⁷ Wulin kayni nan hum ala sumun ka kuɗaŋu kay ka ɗuŋus fok-dimina vaŋ goyo. Sa ŋomda vaŋ kaw ays hiɗi numa tani; may numa may lisi law ma jooɗi, hay li ma nisi ays tani hay Karmel kayni, sa may vi va kisi noŋɗi.

⁸ Jobaŋ tam sa sunda vaŋ tige, nisi ma daŋu. Naŋ ma li slugot tam sum sa joriyon lakŋi lige, kay numa co kayni hay buur ma firita. Va ma ka hay ɓaŋu naŋ ma vulum mi sa sunda vaŋu hiɗi goora vaŋ David.

⁹ Hay li ma sumuna vi David coowa, nisi di sle namna kaf mi Nabal ki David disi nala. Bugolda nisi ba vunsiya.

¹⁰ Nabal hot dita tam sa sunda vi David ala: David kayn mi gige? Goora vi Isay kayni mi gige? Wulin kayni sum sa sunda ŋolo ka pir goy hay ɓam mulaysina.

¹¹ Nan as yaw funa vanu, niyna vanu hiɗi farayna van ma nan ŋatam mi sum sa lan lop ma ka ɗuŋus fok-dimina, nan vulum goy mi sum sa may arige klan ɗawn vultige?

¹² Sumuna vi David hot sli hagata, nisi hot bugolsiya; hay li ma nisi co tam David, nisi dum sle namna kafe.

¹³ Nala David di tam sumuna valamu. Gigekaw gaɓ kew-gaferaŋa valamu. Nisi gaɓ kew-gaferaŋa visiya may. David kaw gaɓ kew-gaferaŋa valamu, sumun ir ki kis-fiɗi nala tap kuɗumu. Sumun hin kis-ma' kat jakŋa.

¹⁴ Kep jar sa sunda vi Nabal co' nam di tam Abigayil cata vi Nabal ala: Humagu, David cuk sumun ay hay fulda pa kay gi deɓ mi sa ŋolla vaya, may nam muɗsi zulo'o.

¹⁵ May sum nisin kayn luma ŋaa'a ŋolo; nisi may luma va ma jooɗi, hay li ma numa ay hiɗi nisi hay fulda kaf kayni, nisi may sli va kumaɗi.

¹⁶ Hay liyn kaf ma numa ay hiɗi nisi hay fulda kay ŋom farayn kayni, henjeta hiɗi falayta kaf nisi muɗi ki gulmun ma ŋuyi katman nala.

¹⁷ Wulin kayn nak ma wi'e, ɗuw va ma nak ma li'e kaw, kay mitta vi sa ŋolla vaya hiɗi ziyna valam kaf ka goboyo, nam kayni joo ŋolo a sa co talam kay dumɗi.

¹⁸ Wulini wulini Abigayil yaw fum kis-ma', genda vi vinna ma', ŋat fokŋ ma', kotom kaw, wal wana ma hawayna ir tasa vasl, vuɗna vi gulda-gulda ma sorina, ma soy goyn kis, hiɗi hambulla kis-ma' ma koti hiɗi vuɗna vi gu-gumna. Na' lakam kay kurona,

¹⁹ na' di tam sa sunda va'a: Tuɗgis vokanu, nan ma tuɗis bugolgiya. Na' min di kayni mi jufa' Nabal noŋɗi.

²⁰ Na' ɓe kay kurona, na' jik hiɗiyn gaa'a hay hagat ta ya' kusuɓita; ɗuw na kayni, David hiɗi sumuna valam ka tuɗay kira'a, na' tupa digsi til'.

²¹ David ka di ala: San kayni slena valam ma hay fulda kaf nan ŋomom kayn dolay ɦawa'a, slena valamu nan may vi kuɗum kep noŋɗi; nam hotan jootawa baŋal ŋaata.

²² Slena vi Nabal kayni, la nan hin mara kuɗum iriya ta-ta hay li ma liyn fo goy grawta ni, Lawn ma lan joo lige.

²³ Hay li ma Abigayil wi David, na' jik gaa kay kuron gosoyo, dab voka' gaa'a vok David, girif gaa kay nagata.

²⁴ Bugolda na' gi tuwa' gaa selemu di'e: Joot van nanu, mulla vanu. Hin gorvota vaŋu daŋ va neɗe, humaŋ dita vi gorvota vaŋ humge.

²⁵ Mulla vanu, naŋ ma tun ŋalda vaŋ kay sa namna ma joon kaynɗige. Namu mi Nabal, kay nam ki selem ma tunin nala, Nabal kayn mi selemu, ɦoyta ka talamu. Sum sa naŋ cuksisna nan gorvota vaŋu iran may wisiɗi.

²⁶ Wulin kayni, mulla vanu, hay semda vi Lawn ma irina, hay semda vaŋ naŋ kaw, sa ma telaŋ kay ɦok busuwn goy kayni mi Ma-Vatɗina. A sum sa gaw kaŋŋa hiɗi nisi sa min laŋ joona muɗ ki Nabal nala muɗge.

²⁷ Naŋ ma vi vulda ta gorvota vaŋ maraŋga kayni, naŋ ma ɓurawa' tam sum sa ka hiɗi naŋu.

²⁸ Nan siɗawaŋu kay naŋ ma vul gida kay joota vi gorvota vaŋu, kay Ma-Vatɗin ma cukaŋ ziy ma ge'ɗina; vulan gida, kay naŋ durum kayni mi duura vi Ma-Vatɗina, joota sa as fa' hayaŋ noŋɗi kaw.

²⁹ La sumun yaway kulo kaŋu kay digiɗaŋu, nisi min caŋ goyo kaw, Ma-Vatɗina Lawna vaŋu ma ŋom irita vaŋ dok-doko, nam ma ŋoma' katamu, may sa gaw kaŋŋa nam ma gi irita visi goy gine hiɗi namu, ki hiɗi tiwlekŋa nala.

³⁰ Ŋaata ta Ma-Vatɗina di'e kay nam min li taŋu, hay li ma naŋ coowa haya'a, hay li ma nam tumaŋawa ŋolo kay Israyel,

³¹ naŋ ma yor tuwaŋu lebo ci las hay dikaŋ ala, busuw ma naŋ jaŋam goyn kayn goy ɦawa'a lebo, naŋ job yaŋ kay tuwaŋ kayn kay mige naŋ ma yor tuwaŋ naɗi. Hay li ma Ma-Vatɗin li ŋaatawa tam mulla vanu, humaŋ ma gaŋ kay gorvota vaŋ gi ge.

³² David di tam Abigayil: Bolda ka kay Ma-Vatɗina, Lawna vi Israyel, nam ma gag ay vaydi kay ŋaf hiɗi nanu.

³³ Bolda kay varta vag ta ŋaata, bolda kagu kaw, naku ti ta telan vaydi kay ɦok busuw goyo, nak ta van ɓan goyo.

³⁴ May Ma-Vatɗina, Lawna vi Israyel, nam ma telan kay lag joon ka iriya, la nak li tuwag liy koloyo kay co ŋaf hiɗi nanɗi, wulin pa ta-ta liyn fo goy grawt kayni, va mara mige kaw ma hin kuɗ Nabal mayɗi.

³⁵ Slen ma Abigayil maramna David yawam hay ɓa'a, nam di ta'a: Wulin kayni hotag vo hay ziyna vag hiɗi sle'ta; ɗuwa, nan humag vunagawa, kuɗ kayni nan vag hiɗi firita.

³⁶ Abigayil co kat Nabal, ɗuw kayni nam ka hay ziyna valam li yuldeta ki yuldeta vi mulla nala, dikam ka firi ŋolo, nam wiyiki goy noŋo kay dolayna. Na' min dum va noŋ ne'ɗi, ta-ta liyn fo goyo.

³⁷ May hay graw culumta, wiyikŋa vi Nabal vatawa, cata valam vum labara kay law ma lina. Nala Nabal dikam bulak ŋolo ki nam miti nala, dikam muɗ ki hiɗiyn nala.

³⁸ Ir ki buur doogo nala bugolda kayni Ma-Vatɗin cumu, nam mita.

³⁹ David hum ala Nabal mitiya, nam di'e: Bolda ka kay Ma-Vatɗina, ma gut kuɗanu kay ŋulda ta Nabal ŋulanu, ma tel sa ma sunda valamu kay li va ma joo'o. Ma-Vatɗin gi joota vi Nabalawa kalamu. David gi sunu kay job tam Abigayil a na' muɗ goy cata valamu.

⁴⁰ Sa sunda vi David co vi Abigayil hay Karmel, nisi da' ala: David cukma'ay kayn katagu, kay nam min slag ca'a.

⁴¹ Na' fok kulo'o, dab voka' gaa kay nagata, ka di'e: Humaŋu, gorvota vaŋ zawni ma li lop ma muz sem sa sunda vi mulla.

⁴² Wulini wulini Abigayil kaliya, musi kay kurota, guro-boyn kuɗa' vasl may, na' tap kuɗ sunda vi David ta nam da'ayta, na' muɗ goy cata valamu.

⁴³ David sli Ahinowam ta hay Yisreel kaw, nisi ma' kaf muɗi si boyna valamu.

⁴⁴ Mikal cata vi David bu' Sawul vula' mi Palti ma Gallimna, goora vi Layis.