1 SAMUEL 24 - BIBALDA TA PELDETTA

David hay zul hiɗiyna vi En-Gedi. David min ci Sawulɗi

¹ Hay liy namnis pa David jik kulo hay liy ma jik lop ŋolla vi En-Gedi, nam mus ɗawni.

² Hay li ma Sawul digiɗ sa Filistin digiɗna, nisi co dum ala: David ka hay fulda vi En-Gedi.

³ Sawul yaw sum sa wi duur birim ɦidi jar sa Israyella, nam kalay gar David ta-ta kulo kay hiɗiyta vi fok-ŋek ma fulla.

⁴ Nam co hay guruna vi fok-dimina, ma ka goboy hiɗi hagata, hay liy namna zul hiɗiyn ka'a, nam kal haya kay bar selemu. Doli kayn David hiɗi sumuna valam ka gaa hay zul hiɗiy namna.

⁵ Sumuna vi David dumu: Humaŋu, vaydi zawni mi buur ma Ma-Vatɗin di taŋ ala: Nan vul sa ma gaw kaŋŋa hay ɓaŋu; naŋ ma li talamu ki naŋ min nala. David fokay kulo hiɗi ŋali, nam ka vun sligara vi Sawul.

⁶ Bugol kayni dikam tun caw ɓirimu, kay nam ka vun sligara vi Sawul.

⁷ Bugolda nam di tam sumuna valamu: Mulla vanu ma Ma-Vatɗin ɦok mul kalamna, Ma-Vatɗin hinan a li va talamu kay tun ɓan talamɗi, kay namu mi ma Ma-Vatɗin ɦok mul kalamna.

⁸ Hiɗi dit kayni David tel sumuna valamu, nam telsi kay ci Sawul goyo. Bugol kayni Sawul fokay kulo'o kay kal goy hay zul-hiɗiyna, nam kalay hay hagata valamu.

⁹ Bugol kayni David fokay kulo'o, nam kalay goy hay zul-hiɗiyna pa. Nam tun caw siwel Sawul bugolom ala: Hey! Mulla, sam-ŋolla vanu! Sawul ɗuw bugolom na kayni, David girif gaa vokomu kay nagata.

¹⁰ David di tam Sawul: Sum sa ka daŋ ala David ka gar kay laŋ joona naŋ humsi vunsi kayn kay mige?

¹¹ Wulini naŋ wi hiɗi iraŋawa ala Ma-Vatɗin vulaŋawa hay ɓan vaydi hay zul-hiɗiyna, nisi zutan kay caŋ goyo; may nan hulotaŋ goyo, nan disi ala: Nan as tun ɓan tam sa ŋolla vanɗi, kay namu mi ma mul ɦoki kalamna vi Ma-Vatɗina.

¹² Ɗuwaŋu bunu, vun-sligara vaŋ yaw hay ɓanni. Kay mige nan ka vun-sligara vaŋu may nan may caŋ goyɗi, naŋ ma wi ala nan giy kilani, va ma joo may hay dikanɗi, ŋel-vunda tay hay dikanɗi kaw, nan may li suluk kataŋɗi kaw. May naŋu, naŋ ka gan jawt vokanu kay can goyo.

¹³ Ma-Vatɗin ma ka kitat jaraŋ hiɗi nanu, Ma-Vatɗin ma joban yan kataŋu; may nan hayɗin tun ɓan taŋɗi.

¹⁴ Law ma nir-naramna ma ɓa-ɓana di ala: Joot may goy vi sa ma joon pa. Hiɗi kayn kaf nan as tun ɓan taŋɗi.

¹⁵ Mulla vi Israyel min durum mi gige? Naŋ min garam mi gige? Diy ma miti su? Lebo ɗakɗari su?

¹⁶ Ma-Vatɗin ma col kitata ta jaraŋ hiɗi nanta. Nam ma ɗuwa, ma gut kanu, nam ma ka kitata van hay liya'a, ma butan goy hay ɓaŋu.

¹⁷ Hay li ma vun David vatna, Sawul di'e: Goora vanu David, kayni mi delaŋ naŋ gasiya su? Sawul tiy hiɗi delem kulo'o.

¹⁸ Nam hot di tam David: Naŋ ɗiger suwan nanu; kay naŋ lan ŋaata. May nan laŋ joota.

¹⁹ Vayd kayni ŋaata ta naŋ la' tanta naŋ ɗeka' goyo, kay Ma-Vatɗin vulan hay ɓaŋu, may naŋ may can goyɗi.

²⁰ La san ŋaf hiɗi sa ma gaw kalamna, nam as hinim tuɗ hay hagata valamu ki nam min nala su? Ma-Vatɗin ma wurakaŋu kay va ma naŋ lum tan vaydina.

²¹ Wulin kayni humaŋu: Nan wi ala naŋ ma ti mulda, mulda vi Israyel ma hin ɗawn hay ɓaŋu.

²² Naŋ ma yi va kaŋu vok Ma-Vatɗin ala jafna van ma bugolanna naŋ ma vatam goyɗi, semda vanu naŋ as vata' goy hay jafna vi bunɗi kaw.

²³ David yi va kalamu vok Sawul. Bugol kayni Sawul kalay hay ziyna valamu, David hiɗi sumuna valamu jik misi kulo kay hiɗiyna may.