1 SAMUEL 23 - BIBALDA TA PELDETTA

Sum sa Filistin mok sum sa hay Keylana, David suɗsi goyo. Sawul ka digiɗ David

¹ Nisi mar labar mi David ala: Humaŋu, sum sa Filistina mok Keylawa, nisi ka vurum sle ma hay muɗakŋa.

² David job Ma-Vatɗina di'e: Nan ma tuɗ dur sum sa Filistina kay kol kisiya su? Ma-Vatɗin hotom dit ala tuɗaŋu, naŋ ma kol kay sum sa Filistina, naŋ ma but Keyla goyo.

³ May sumuna vi David dumu: Humaŋu, nay lakay tani hay Yuda kayn kaw hiɗi narta; may la nay tuɗ hay Keyla kay dur hiɗi sa Filistin noŋo, nay ma li ɗawn litige?

⁴ David hot job Ma-Vatɗin mara lo, Ma-Vatɗin hotom dit ala: Fokaŋ kulo'o, tuɗaŋ gaa hay Keyla, kay sum sa Filistina nan min vulsi hay ɓaŋu.

⁵ David kalay hiɗi sumun valamu hay Keyla, nam dur hiɗi sum sa Filistina; nam yaw farayna visi aya, nam ci sumun kuɗsi ŋolo kaw. Ki kayn nala David but sum sa hay Keylan goyo.

⁶ Hay li ma Abiyatar goora vi Akimelek pir kat David hay Keyla kayni, nam ka hiɗi sligar-ŋoŋŋa ma ɗifinna hay ɓalamu.

⁷ Sawul hum labara ala David coya hay Keyla, nala nam di'e: Lawn vulumawa hay ɓanu, kay nam co ŋay kayni hay hoyok-ziy ma vunam ka'a, cokorom ka vunamu kaw.

⁸ Sawul yi sumun kaf kay duura, kay nisi ma tuɗ hay Keyla kay mok David hiɗi sumuna valamu.

⁹ Kay David wi varta joota ta Sawul ka var kalamu, nam di tam Abiyatar mul-ma-ɗifinna ala: Maraŋ sligar-ŋoŋŋa.

¹⁰ David hot di lo: Ma-Vatɗina Lawna vi Israyel, nan humi ala Sawul ka co hay Keyla, kay ɓulak hoyok-ziyn goyo kuɗan nanu.

¹¹ Sum sa hay Keyla ma vulan goy hay ɓalam su? Sawul ma co'o ki nan hum nala su? Ma-Vatɗina Lawna vi Israyel, naŋ ɗek kayn kir sa ma sunda vaŋ ɗekge. Ma-Vatɗin hotom dit ala: Nam ka co'o.

¹² David di lo: Nanu hiɗi sumuna vanu, sum sa hay Keyla as vulma hay ɓam Sawul su? Ma-Vatɗina hot dit ala: Nisi as vulaŋ hay ɓalamu.

¹³ Nala David hiɗi sumuna valam sa kis-karkiyana fokay kulo'o; nisi kalay goyo hay Keyla, kalay misi hay liyn ma nisi mina. Hay li ma Sawul hum ala David piri goy hay Keyla, nam min tuɗ ɗawni loɗi.

David hay fulda vi Zif hiɗi Mawon

¹⁴ David mus goy hay fulda, hay liyn ma jikŋa valam lop ŋolo, nam mus kulo kay hiɗiyta ta hay fulda vi Zif, hay fulda.

¹⁵ Hay li ma David wi ala Sawul ka tuɗaya kay cum goyo, nam ŋay goy hay fulda vi Zif. Kuɗ juruta.

¹⁶ Hay liy namna Yonatan goora vi Sawul fok kulo'o, nam tuɗ kat David kuɗ juruta. Nam teŋem iram hay Lawna.

¹⁷ Nam dumu: Naŋ ma li nar noŋ ne'ɗi, kay ɓam bum Sawul as tun taŋɗi, naŋ ma ti mul kay Israyel, ma li ma ma'na vaŋ ɗawn mi nanu; Bunu Sawul kaw wi kayni ŋaa'a ŋolo.

¹⁸ Nisi ma' kafe jun bonot vok ir Ma-Vatɗina; David mus malam kuɗ juruta, Yonatan kal vo valam may.

¹⁹ Sum sa Zifna jik kulo kat Sawul hay Gibeya, nisi di'e: David ka ŋayay jarma'a hay liy ma jik lop ŋolla, kuɗ juruta, kulo kay ɗiŋiriŋŋa vi Hakila, hay gal ma kayamna vi fulda.

²⁰ Wulin kayn naŋaya mulla, kay dikaŋ ka taŋ ŋolo kay kayni, nala numa min vulum hay ɓaŋu.

²¹ Sawul di'e: Ma-Vatɗin gigi bolo kay slugota ta nigi la' kanta.

²² Wulin kayni nan siɗawgiya, vigi labar goy ŋaa'a ŋolo, kay fi liyn ma nam ka ŋayay hayna, sa ma wum ayna kaw, kay nisi dan kalam ala nam kayn yekete ŋolo.

²³ Liyn ma nam ka ŋayay hayamna kaf nigi ma ɗuwum goy ŋaa'a, bugol kayni hotgiyay tanu hiɗi labar ma haraŋi, nan ma tuɗis hiɗi nigiya, la nam ka hay nagata, nan ma garam jar vok ma kisna vi Yuda.

²⁴ Nisi yaway kulo'o kalay hay zif jew Sawul. David hiɗi sumuna valamu ka goy hay fulda vi Mawon, hay liy ma beɗna, hay gal ma kayamna vi fulda.

²⁵ Sawul hiɗi sumuna valamu kaliya kay gar David, labar kayni co tam David, nam jikay gaa kay hiɗiyna, tuɗ mus goy hay fulda vi Mawon. Hay li ma Sawul hum kayni, nam kalay garam hay fulda vi Mawon.

²⁶ Sawul ka tuɗ hay gal hena vi hiɗiyta, David hiɗi sumuna valamu ka tuɗ hay gal hena vi hiɗiyta may. David fok jaŋ koloyo kay ŋay goy kay Sawul. May dolay kayni sumuna vi Sawul ŋuysiyawa kay yawsiya,

²⁷ hay na'ta sa mara mar labara tam Sawul ala: Naŋ ma co koloyo, kay sum sa Filistina ŋuy nagatawa.

²⁸ Sawul hin David, nam hotaya kay dur sa Filistina. Kuɗ na'ta kayni liyn namna nisi tunum selem ala Sela-Hamaklekot.