1 SAMUEL 22 - BIBALDA TA PELDETTA

¹ David fokis hay ɗawn pa, tuɗ ŋay goy hay zul hiɗiyna vi Adullam. Bosiyomna hiɗi sum sa hay ziyna vi bulum kafna hum kayni, nisi jik gaa kuɗumu.

² Sumun kaf sa ka vun lawta, sa bal ka kisina, hiɗi sa diksi ɓulakayna kaf tok tuwsi talamu, nam muɗ mi ma ŋolla visiya. Ki kayn nala sumun kis-fiɗi tok tuwsi kuɗumu.

³ Hay liy namnis pa, David kal hay Mispe, hay nagata vi Mowab. Nam di tam mul ma Mowabna: Nan siɗawaŋu kay naŋ ma vul hagat tam bum hiɗi sunu, kay nisi ma ŋay goy vaŋu, ta-ta nan ma wi va ma Lawn ma lum tanna tuwa.

⁴ Nala nam tuɗsi vok mul ma Mowabna, nisi lak hiɗi mulla dok-dok hay li ma David ka ŋayay hay gulmunna tuwa.

⁵ Sa ma jobta Gad di tam David: Naŋ ma mus hay gulmunnaɗi, tuɗaŋu, kalaŋ hay nagata vi Yuda, ki kayn nala David kaliya, nam co hay juruta vi Heret.

Sawul job yalam tam Abimelek

⁶ Sawul hum labar David hiɗi sumuna valamu. Sawul ka musi gaa kuɗ gu-tumuura, hay Gibeya, kulo kay liyn ma jiŋiliŋŋa; nam ka hiɗi kawayta valam hay ɓalamu, sa sunda valam kaf ka ŋuyi talamu.

⁷ Sawul ka di tam sa sunda valamu sa zlaray talamna ala: Humgiya, nigi sa fi Benyaminna: Nigi kaf lakŋi goora vi Isay asay a vulgi sine gulda-guldan kaf su? Nam as a muɗgi goy sa ŋulona vi sum sa birimi hiɗi sum sa kisna kaf su?

⁸ La naɗi, nigi kaf ŋra vungi kanu kay mige? Hay li ma goora van jun bonot hiɗi goora vi Isay kayni, nigi min vulan labarɗi kay mige? A fok sa ma sunda van kulo kan kayn mi goora vanu, muɗum gan jawt vokan ki nam li vaydi nala kayn mi goora vanu. Jargi lakŋi sa ma asay a dan labar namna mayɗi noŋ kayni kay mige?

⁹ Doweg ma Edomna, ma ka jar sa sunda vi Sawulla hot dita: Nan wi goora vi Isay ka tuɗi hay Nob kat Akimelek goora vi Ahitub.

¹⁰ Akimelek job Ma-Vatɗin kalamu, Akimelek vulum sle ma ti lay, vulum kew-gaferaŋa vi Goliyat ma Filistin lay.

¹¹ Mulla gi sunda kay gar Akimelek goora vi Ahitub, mul-ma-ɗifinna, hiɗi sa hay ziyna vi bulum kafe, hiɗi muliyan-sa-ɗifinna sa ka hay Nob kafe. Nisi kaf kalay kat mulla.

¹² Sawul dumu: Humaŋu goora vi Ahitub. Nam hot dit ala nan ka humaŋu, mulla vanu.

¹³ Sawul dumu: Naŋu hiɗi goora vi Isay nigi ŋra vungi kanu kay mige? Naŋ vulum fu lay vulum kew-gaferaŋ lay, job Lawn kalam lay, kay nam ma fok kulo katanu, gan jawt vokan kaw ki nam ka li vaydi nala kay mige?

¹⁴ Akimelek hot dit tam mulla: Humaŋu mulla: Jar sa sunda vaŋu sa ma hum kuɗaŋ ki David nala ka su? Namu mi kunoŋŋa, mi ma ŋolla vi soje sa ŋomaŋŋa, sumun slum yalam kulo ŋolo hay ziy ma mulda vaŋu ɗisu?

¹⁵ Nan tun caw job Lawn kalam kayn vaydi tuwa su? Varta kay laŋ joo may hay dikanɗi, naŋ may var ala numa laŋ joo'oɗi, nanɗi lay, sa ma hay jafna vanɗi lay. Kay lawta kayni nan may wi va haya' noŋ ne'ɗi.

¹⁶ Mulla di'e: Naŋ mitawa, Akimelek, naŋ hiɗi sa hay ziyna vi buŋ noŋ kafe.

¹⁷ Mulla di tam sa lakay ŋomomna ala: Muɗgi irgi goyo, muliyan-sa-ɗifinna vi Ma-Vatɗin lakŋi nigi ma cisi goyo; kay vunsi ŋray hiɗi David, nisi wi ŋaa'a ŋol ala nam pir kayn piriya, may nisi min danɗi. May sa sunda vi mulla min meɗ ɓisi goyo kay ci muliyan-sa-ɗifinna vi Ma-Vatɗinɗi.

¹⁸ Bugol kayni mulla di tam Doweg: Muɗaŋ iraŋ goyo, caŋ muliyan-sa-ɗifinna goyo. Doweg ma Edomna muɗ iram goyo, nam cal muliyan-sa-ɗifinna. Hay buur namna nam ci sumun dok-glafandi yam vasl, sa cuki hiɗi sligar-ŋoŋŋa ma koti hiɗi barawna.

¹⁹ Hoyok-ziy ma li ɗifinna ma yum Nob, Sawul cal sum sa hayamna goy hiɗi kew-gaferaŋa, jufayna hiɗi boyna, gurosgurayna hiɗi guro sa dig sumaysina, luwayna, kurona hiɗi fok-dimina kaf, nam calsi goy hiɗi kew-gaferaŋa.

²⁰ Goora vi Akimelek mara kep pir goyo, semda valam ala Abiyatar, nam pir goy kat David,

²¹ nam mar labar tam David ala muliyan-sa-ɗifinna vi Ma-Vatɗina Sawul cisiyawa goyo.

²² David di tam Abiyatar ala: Hay buur namna Doweg ma Edomna ka coli zawi, nala nam hin bay di Sawulɗi, wulin kayni, sum sa hay ziyna vi buŋ kaf fi mitta kayn kuɗan nanu.

²³ Musaŋ hiɗi nanu, laŋ narɗi, kay sa ma gar irita vanu nam gara' kayn ti irita vaŋu; katan tan kayni naŋ ma li ŋomi ŋaa'a.