1 SAMUEL 21 - BIBALDA TA PELDETTA

¹ David fokay kulo'o, nam kaliya, Yonatan kal kulo hay hoyok-ziyna may.

David pir hay Nob, hay Gat, hay zul-hiɗiyna vi Adullam, hay Mispe, hay juruta vi Heret

² David tun iram hay Nob, kat mul-ma-ɗifinna Akimelek, Akimelek kiram jaŋi ka dum ala: Naŋ ka tani vaŋ kepe, sa mara may hiɗi naŋɗi kay mige?

³ David hot dit tam mul-ma-ɗifinna Akimelek ala: Mulla vulan gatta aya, nam dan ala, lawt ta nan gaŋ ka'ta hiɗi dita ta nan daŋgit ɗawni, hin sa huma'ɗi, nan col buur jaran hiɗi sumuna vanu.

⁴ Wulin kayni, ka hay ɓaŋ mi mige? Naŋ ma vulan fun vasl lebo va mige kaw ma ka'a.

⁵ Mul-ma-ɗifinna hot dit mi David, fun ma ɦawana may hay ɓanɗi, may mi fun ma lakay ɗifinna. La sumuna vaŋ tuwsi ka teli kay bur hiɗi boyna.

⁶ David hot dit tam mul-ma-ɗifinna: Numa tel tuwma kay bur hiɗi boyn kayni, hay li ma nan kalay goyn pa, wulin kayn liy buur ɦidi, sumuna van kaf ka peldete; la kayni mi lop ma liwis kaw, vayd kayni van namna ma muɗum goy peldet gasiya.

⁷ Nala mul-ma-ɗifinna vulum fun ma liy ɗifinna, kay hay na'ta ka kayni mi fun ma liy ɗifinna tuta, fun namna nisi yawamay goy vok Ma-Vatɗina kay vurna fu ma kun hay baŋalamu.

⁸ Hay buur na'ta kayni, san kep jar sa sunda vi Sawul, nam ka duki kalafi hay ziyna vi Ma-Vatɗina; namu mi sa ma Edomna, yum Doweg, mi ma ŋolla vi sa ŋom fok-dimina vi Sawul.

⁹ David di tam Akimelek: Kawaya lebo kew-gaferaŋi kaw may hay ɓaŋɗi su? Kay nan sli may sli kew-gaferaŋ ay hay ɓanɗi lay, yaw sle-ma-duura van ay hay ɓanɗi lay, kay sunda vi mulla na' ir koliyo.

¹⁰ Mul-ma-ɗifinna hot dit talam ala: Heɗe, Goliyat ma naŋ cum goyo hay liyn ma beɗna vi terebintena kew-gaferaŋa valam kayni, na' ka ɗuti hay sligara, goy bugol sligar-ŋoŋŋa, la naŋ min sla'a, slaŋga, kay kew mara may tanɗi. David di'e: Kew ma ŋray hiɗi na' kayni mayɗi, naŋ vulantiya.

¹¹ David fokay kulo'o, nam pir hay buur na'ta goy gine hiɗi Sawul. Nam co goy vi Akis, mulla vi Gat.

¹² Sa sunda vi Akis dumu: Naŋ damni mi David mulla vi nagata ɗisu? Ma sumun ka gi nul hiɗi seŋ ala: Sawul ci sumun birim ɗaw David ci sumun birim doogo naɗi su?

¹³ David var kay lawt kayni, nala nam li nar ŋolo. Kay Akis, mul ma Gatna.

¹⁴ Nam tun caw li tuwam kirsi ki sa ma ɦoyayn nala, tun caw tuwura; nam ɗo slen kulo tam vun-ziyna, hin nene ma vunamna jaŋ goy gaa kuɗ dumamu.

¹⁵ Akis di tam sa sunda valamu: Nigi wi ŋaa'a ala san kayni yalla valam baya, nigi maram tanu kay mige?

¹⁶ Sum sa hoyayna kiɗan tan su? Nigi maran hen kayni lo kay nan ma wi tuwurta valamu kay mige? Nigi min ala nam ma kal vo hay ziyna vanu su?