1 SAMUEL 20 - BIBALDA TA PELDETTA

Yonatan gar yal kay hulot David goyo. Boniyom tuwsi sa ma'na jarsi ja goyo

¹ Hay Nayot goboy hiɗi Rama pa, David pira. Nam kal ŋaf hiɗi Yonatan, nam dumu: Nan lum noŋ mi mige? Nan cum mat mi gige? Buŋ gar a can goy noŋ kayn nan lum talam mi joo mige?

² Yonatan hot dumu: Yawn mayɗi, naŋ as a mitɗi, bun kayni, la nam min li va'a, la gooro, la ŋolo kaw nam lum bay danɗi, bun as a ŋay lawta vaŋ kan ɗawn ŋaytige? Va ma li mayɗi.

³ David hot yi va kalam lo ala: Buŋ wi ŋaa'a ŋolo ala naŋ ka lan slugota, nala nam vari kayn ala naŋ ma humɗi; la naŋ humawa, lawt kayn ma ɓulakaŋ dikaŋu. May Ma-Vatɗin ka iriya, naŋ kaw ka iriya, mitta may hini vokan ŋolɗi.

⁴ Yonatan di tam David: Nan ma li taŋu va ma naŋ mina.

⁵ David hotom dita; humaŋu, til ma wulin ka day jifini, nan ɗawn ma mus gaa tam mulla kay ti'e; nan siɗawaŋu kay naŋ ma hinan tuɗ ŋay hay sinena, ta-ta hay vulatita vi buurta ɦidita.

⁶ La buŋ wi ala nan mayɗi, naŋ ma dum ala: David siɗawan kay nam min kal hay hoyok-ziyna valam Betlehem, kay nam ka hiɗi ɗifin ma hay busata busata kay sa hay jafna valam kafna.

⁷ La buŋ daawa ala kayn ŋaa'a, nala nan as li nar loɗi, may la nam muɗawa ɦiya, kay na'ta naŋ ma wi ala varta valam coli vatiya kay lan joo.

⁸ Dekaŋ minda vaŋ goy tanu, kay naŋ jun bonot hiɗi nanu vok Ma-Vatɗina. La joo mara ka hay dikanu, naŋ kay tuwaŋ can goyo, naŋ as naran ta-ta tam buŋu kay mige?

⁹ Yonatan hot dumu: La bun varta valam coli kay laŋ joo'o, la nan humiya may nan daŋɗi kayni, nan may var naɗi.

¹⁰ David di tam Yonatan: La buŋ hotaŋ ditawa hiɗi delem ɗeŋe, sa ma vulan labar ɗawn mi gige?

¹¹ Yonatan dumu: Naŋaya, cukay goy hay sinena. Nisi ma' pete cuk goy hay sinena.

¹² Yonatan di tam David: Ma-Vatɗina Lawna vi Israyel ka hum dita vanu, jifini lebo siwi nan min fek bunu; hay li ma nan waawa ala dikam min David, may la nan gi sa'ays taŋu kay daŋɗi ni,

¹³ Ma-Vatɗin ma lan joo ŋolo. Hay li ma nan waawa ala bunu kiram ŋaa'a kay laŋ joo'o, nan ma daŋ labara kaw, nan ma hinaŋ kala may, kay naŋ ma kal hiɗi sle'ta, Ma-Vatɗin ma li hiɗi naŋu, ki nam li hiɗi bun nala kaw.

¹⁴ La a nan ma mus iri mara lo, naŋ ma li ŋaata vi Ma-Vatɗin tanu; nala nan ma mitɗi.

¹⁵ May la mitawa manu, ŋaata ta naŋ ma la' tam ziyna vanu yaŋ ma joka'ɗi, hay li ma Lawn ma vat sum sa gaw kay Davidn goy kaf ɗawn kaw, naŋ David yaŋ ma jokanɗi.

¹⁶ Kay Yonatan jun bonot hiɗi ziyna vi David. Ma-Vatɗin ma job yam sum sa gaw kay Davidna jobge.

¹⁷ Yonatan yi va kalam mi David lo kay min ma nam minimna, kay nam minim ki tuwam nam nala.

¹⁸ Yonatan dumu: Jifin ɗawni mi til ma wulina, mulla ma wi ala naŋ mayɗi, kay baŋal liyna vaŋ hin ɗawn goy ɦawa'a.

¹⁹ Hay buurta ɦidita, naŋ ma jik gaa hay liyn ma naŋ ŋay hay jewe, hay buur ma lawt li'e, naŋ ma mus goboy tam hiɗiyta vi Ezel.

²⁰ Nan ma ɓe ɓarawtis goy ɦidi hay galla vi hiɗiyta, ki nan ka ɓem kayn mi va'a nala.

²¹ Humaŋu, nan ma gi goor ma joriyo aysa, nan ma dum ala, tuɗaŋ yawaŋ ɓarawna. La nan dumawa ala, humaŋu ɓarawn ays bugoloŋu, yawaŋga! Nala naŋ ma ma'a, kay kayn di ala sle'ta ka kaŋu, naŋ as li nar loɗi, Ma-Vatɗin ka iriya.

²² May la nan daawa tam goor ma joriyon ala: Humaŋu, ɓarawn ka goy vokaŋu, nala naŋ ma tuɗ maŋu, kay Ma-Vatɗin gaŋ iraŋawa.

²³ Law ma nay dum jar tuwayna Ma-Vatɗin ka humum dam'.

²⁴ David ŋay goy hay sinena. Kayni mi dayna vi tilla, mulla mus gaa hay yuldeta kay ti'e.

²⁵ Ki nam ka li jew dok-dok nala, mulla mus kay zlamda valamu kulo kat goŋ-ziyn goboyo, Yonatan fok kulo'o, Abner kaw mus gal Sawul; may baŋal David hin goy ɦawa'a.

²⁶ Hay buur na'ta Sawul min di vaɗi, kay nam vari kuɗ hayam kayn ala: Fumis ɗawni, tuwam ka liy liwisi.

²⁷ Hay buurta ka'ta, buurta ma'ta vi til ma wulina, baŋal David ka hini goy ɦawa'a lo. Nala Sawul di tam goora valam Yonatan: Goora vi Isay may co hay tin kamatɗi lay, vaydɗi lay kayn kay mige?

²⁸ Yonatan hot dita tam Sawul: David job tanu kay nan hinim tuɗ hay Betlehem.

²⁹ Nam siɗawan ala nan ma hinim tuɗa, kay ɗifin ma hay jafna valam ka hay hoyok-ziyna, kay ɓasulumna dumi nala; ala la nan min lum slugota, nan hinim kay nam min tuɗ gosoy wit' kay sar ɓosiyomna. Nam may co hay tina vaŋɗi kayn kuɗ na'ta.

³⁰ Nala Sawul fok ɦiy ŋolo kat Yonatan, nam di'e: Goor ma tiginina ma ŋel-gatta, nan may wi ala goora vi Isay mi banaŋŋa ɗi su? Zulot kaŋ lay kay suŋ lay.

³¹ La goora vi Isay ka iri gaa kay nagat dok-doko, naŋ as fi sle'taɗi lay, mulda vaŋ as fi sle'taɗi lay. Wulin kayn gaŋ sun kalamu, garantiya, maramta kay nam nagay kay fi mitta.

³² Yonatan hot dit tam bulum Sawul, ka dum ala: Cum mat ɗawn kay mige? Nam lum mi mige?

³³ Sawul haɓam hiɗi kawayta valamu, min kay jikimu. Nala Yonatan wi ala varta vi bulum coli vatiya kay ci David goyo.

³⁴ Nam fok goy kat fun pa, muɗi ɦiy ŋolo, min ti funa hay buurta ma'ta vi til ma wulin loɗi; kay dikam ɓulakiya kuɗ David, kay bulum ŋulum kayn ŋuliya.

³⁵ Hay buurta ka'ta, Yonatan kalay hay sinena, hay liyn ma ŋray jaram hiɗi Davidna, goor ma joriyo ka kuɗum kepe may.

³⁶ Nam di talamu, tuɗaŋu, yawaŋ ɓarawta ta nan min ga'ta ɗawni. Goora kalay jaŋi, Yonatan gi ɓarawta goy vokom gine'e.

³⁷ Hay li ma nam co hay liyn ma Yonatan gi ɓarawt hayna, Yonatan ka siwel bugolomu ala: Ɓarawt tay goy vokaŋ gine ɗisu?

³⁸ Yonatan ka siwel talam lo ala: Jaŋaŋ koloyo, colɗi! Nam kaliya, yaw ɓarawniya, hotay tam Yonatan.

³⁹ Goora may wi va hay kayni noŋɗi. Law na'ta wa' jar-tuwsi kayni si Yonatan hiɗi David tuta.

⁴⁰ Yonatan vul sle-ma-duura mi goora, nam di'e: Tuɗaŋu, naram hay hoyok-ziyna.

⁴¹ Bugol kalta vi goora, David fokay kulo'o hay gal ma kayamna pa, nam dab vokom gaa kay nagata sem ɦidi. Boniyom tuwsi sa ma'na bow tuwsiya, tiy kuɗ tuwsiya kaw, suw pet David, nam jaŋ zimiyn ŋolo.

⁴² Bugolda Yonatan di tam David: Tuɗaŋ hiɗi sle'ta. Wulini nay yi va kaya jar-tuwaya, kay nay di'e: Lawn ma mus jaraŋ naŋ hiɗi nan dok-doko, jar jafna vanu hiɗi jafna vaŋu kaw!