1 SAMUEL 2 - BIBALDA TA PELDETTA

Nulla vi Anna. Samuel ka sun Ma-Vatɗina

¹ Anna siɗawa na' di'e: Dikan li firiya hay Ma-Vatɗina, Ma-Vatɗin hot muɗanawa dono'o, vunan malawa goyo kay di va mi sa gawt kanna, kay nan li firiya kay gutda vaŋu.

² Sa mara ma peldet ki Ma-Vatɗin nala mayɗi; Lawn mara'a ma ki naŋ nala mayɗi; Hiɗiyn ma ki Lawna vay nala mayɗi.

³ Sa law hiɗi suburta ŋoldaɗi; hin law ma galakŋa kal goy hay vunanɗi, kay Ma-Vatɗina nam mi Lawna ma wi slen kafna, nam ŋa nekka vi sle ma sumun lumna kafe.

⁴ Ɓarawta vi sum sa donon kusi goyo, Sum sa maŋayna kanti ma jun fursina ti donota.

⁵ Nisi sa ay hobayna gar li lop kay funa, nisi sa ay hay mayta ka tun suksiya; cata ta getayta kaw na' vuɗ sem siɗiya, na'a ta gurona va' ka ŋolta muɗi mirewe.

⁶ Ma-Vatɗina ci sana, nam as muɗ san iri lay, nam nar san gaa hay liyna vi sa mitina, nam as hotom kulo lo.

⁷ Ma-Vatɗin muɗ san maŋaya, muɗ san faraya kaw, nam as hot yam san gaa'a, nam as sli yam san kulo'o kaw.

⁸ Sa ma hawna nam yawamay goy jar butuwn pa, goy jar difir-fira pa kaw nam as sli sa ma asayɗin kulo'o, kay laksi gaa'a hiɗi sum sa ŋulona. Nam ɓuraw zlamda vi gajijit jarsiya; kay dolla vi nagata nam vi Ma-Vatɗina, nam in nagat kayni tuna' gaa kay dolla.

⁹ Sa nam minsina nam ma ŋomsi sesi ma tuɗna. May sa joona ma vatis goyo jar jufunda; kay hiɗi donota valamu san as kol noŋɗi.

¹⁰ Sa gaw kay Ma-Vatɗina tuwsi ma muɗ visi bat-bat; goy hay wuralawn pa nam ma gi niy ma bayn gaa kisiya; Ma-Vatɗin ma ka kitat kay vun nagat ma dabayn kafe. Nam ma vul donota mi mulla valamu, falam ma mul ɦoki kalamna nam ma slum kulo'o.

¹¹ Elkana hot vo'o hay ziyna valamu hay Rama, goora hini vok ir mul-ma-ɗifinna Eli kay sun Ma-Vatɗina.

Gurona vi Eli li tuwsi joo'o, maŋayta vi busi ka hay kaw

¹² Gurona vi Eli si sum sa to'ofaya, nisi may wi Ma-Vatɗin noŋɗi.

¹³ Sum nisi sa li lop ɗifinna ɗuwgi va ma nisi ka lum tam sumun tige: Hay li ma sa ŋat ɦu ma ɗifinnawa, sa sunda vi mul-ma-ɗifinna co'o hay li ma sliwn ka zala, nam co'o hiɗi ɗamta ta vuna' ɦidita hay ɓalamu,

¹⁴ nam pi ɗamta gaa hay dowayna, hay doŋolayna, hay laŋgana lebo hay ŋalayta; slen ma yaway kulo vun ɗamta kaf, nam tuɗ hiɗi namu. Sum sa Israyella sa ka co hay Silo kaf nam ka li tisi ki kayn nala.

¹⁵ La jew a ŋal mul-sliwna kaw, sa sunda vi mul ma-ɗifinna co'o di tam sa ma ka ŋat ɦuna ala: Sliw ma ɗifinna naŋ ma vulum mi mul-ma-ɗifinna; sliw ma zalayna naŋ as yawam hay ɓaŋ noŋɗi, nam minim mi sliw ma irina.

¹⁶ La san dumawa ala, hay li ma mul-sliwn ŋalawa, naŋ ma yaw ma kuɗ hayaŋŋa ni, nam hot dit ala: A'a, vulanti wulini, la naɗi, nan slum hiɗi dono'o.

¹⁷ Sum sa joriyo nisina ka li tuwsi joo ŋolo vok Ma-Vatɗina hiɗi suluk ma ŋol suw asa, kay nisi ka ɗuw ɗifinna vi Ma-Vatɗin birek-ceke.

¹⁸ Samuel ka li lopn vok Ma-Vatɗina, sligara valam ma cuki talamna mi ŋoŋŋa ma ciliy hiɗi barawna.

¹⁹ Busat kaf, sulum cum sligar ma goor kep kep, na' ka maramta, hay li ma na' hiɗi jufa'a tuɗ li ɗifini hay busata busata kaf.

²⁰ Eli gi bol kay Elkana hiɗi cata valamu, nam di'e: Ma-Vatɗin vulaŋ guro sara'a hiɗi cat na'ta zawni, kay vurna baŋal nam ma naŋ vulum mi Ma-Vatɗin zawni. Bugol kayni nisi hotay vo'o.

²¹ Hay li ma Ma-Vatɗin humam gum kay Anna, na' vi haya, na' vuɗ guro-jufay ɦidi, guro-boy ma' kaw. Goor ma joriyona ka wul vok Ma-Vatɗina.

²² Hay na'ta Eli muɗi mar ŋolo, nam hum labara kay slen ma gurona valam ka lum tam sum sa Israyel kafna; nam hum labara kaw ala gurona valam ka bur hiɗi boyna sa ka tok tuwsi vun guɗuk ma fi-tuwna.

²³ Nam di tisiya: Nigi ka li slen ki kayn nala kay mige? Kay sle joo ma nigi ka lumna sumun ka dan kalam kafe.

²⁴ May naɗi, gurona vanu, sle ma nan ka humum kigin kayni may hay liyamɗi; nigi ka kal sumuna vi Ma-Vatɗin hay sulukŋa.

²⁵ La san li suluk kat sa mara'a, Lawn ma ka kitat kalamu; may la nam li suluk kat Ma-Vatɗina, sa ma job Lawn kalam ɗawn mi gige? Nisi min hum vun busi noŋ ne'ɗi, kay Ma-Vatɗin min a cisi goy mati.

²⁶ Goor ma joriyona Samuel ka wul dok-doko, nam ŋaa'a ŋolo kir Ma-Vatɗina, ŋaa'a ŋolo kir sumun kaw.

Kitata ta Ma-Vatɗina ka' kay ziyna vi Eli

²⁷ Sana vi Lawna co kat Eli, nam dumu: Humaŋ va ma Ma-Vatɗin ka di'e: Hay li ma sumiyaŋ ay hay nagat Egipte, hay ziyna vi Farawn, nan may ɗek tuwan kirsiɗi su?

²⁸ (Aaron) nan vilekemu jar jafna vi sa Israyel kaf kay nam ma li lopna vanu hay liyn ma peldetna, kay jik kulo kay giwin-ma-ɗifinna vanu, kay ŋal urdina, kay cuk ŋoŋ ma giɗeŋŋa vok iranu, ɗifin ma ŋalay hay kuta ma gurona vi Israyel vulum goyna, nan hin lopna valam hay ɓam sum sa vo hay ziyna vi buŋu.

²⁹ Ɗifinna vanu hiɗi vulda vanu, ma nan vul hagata kay nigi ma lum hay liyna van ma peldetna, nigi tayam gaa kuɗ segiya kay mige? Varta kay naŋ subur gurona vaŋ suwan nanu kayn may arige pa? Kay a nigi hob haygi hiɗi vun sle ma jewna ma sa Israyel vulum tanu kayni may arige pa?

³⁰ Kuɗ kayni humgi va ma Ma-Vatɗina Lawna vi Israyel di'e: Nan li di-goytawa ala ziyna vi buŋu hiɗi ziyna vaŋu ma tuɗ vok iran dok-doko. Wulin kayni Ma-Vatɗin ka di ala: Kayni as loɗi, kay sa ma slan yan kulo'o, nan slum yalam kulo lay, may nisi sa ɗuwan birek-ceke, nan ma ɗuwsi birek-ceke kaw.

³¹ Humaŋu, liyn ma co'o, hay liy namna ɗawni, nan ma kaaŋ glaŋaŋ goyo, glaŋ sum sa hay ziyna vi buŋu kaw, a sa ma maari ma li hay jafna vaŋ noŋɗi.

³² Naŋ ma wum hay ziyna van ɗawni mi sa ma gaw kaŋu. Israyel hayɗin Ma-Vatɗin ma hobsi hiɗi ŋaata, sa ma maari ma li hay jafna vaŋ noŋɗi.

³³ Nan ma hin sa mara iri kuɗ jafna vaŋ kepe, nam ma mus goboy tam giwin-ma-ɗifinna vanu, kay iram cuk mirwik kay ɗuwna, kay dikam ma ɓulaka kaw, may nisi sa hay ziyna vaŋ kaf ma mit ɗawni, bay muɗ maar tuwa,

³⁴ sle ma nan daŋgina, nan ma ɗekem kiraŋ tam gurona vaŋ sa ma'na, Hofni hiɗi Fineyas, nisi ma' kaf ma mit hay buur kepe.

³⁵ Nan ma tun mul-ma-ɗifinna mara'a ma ɗigere, nam ma li sle ma tap hiɗi varta vanu, ma cuk kuɗ hayanna; nan ma inim ziyda ta ge'ɗita, nam ma tuɗ dok-dok vok fanna ma mul ɦoki kalamna.

³⁶ La gigekaw kuɗ jafna vaŋu hinawa iriya, nam ma co girif gaa vokomu, kay fi gurju kalam kepe lebo kay fi fu neɗe. Nam ma di ala: Nan siɗawaŋu, naŋ vulan lop ma ɗifin mara kan neɗe, kay nan ma fi dir fu ma ti neɗe.