1 SAMUEL 18 - BIBALDA TA PELDETTA

Bonota jar Yonatan hiɗi David. Hunayta vi Sawul

¹ Hay li ma David vunam vat kay law hiɗi Sawul vatna, dik Yonatan tap hiɗi David, Yonatan tun caw minimu ki nam min tuwam nala.

² Hay buur na'ta Sawul tel David gaa talamu, min hinim hot hay ziyna vi bulum loɗi.

³ Yonatan vi bonot hiɗi David, hay nam minim ki tuwam nam nala.

⁴ Sligara valam ma cuki talamna nam fokom goyo, vulum mi David; nam vulum sligara valam hena, kew-gaferaŋa valam noŋ kaw, gu ɓarawta valamu hiɗi kanti ma furamna kaw.

⁵ La Sawul gi David arigekaw, nam tuɗ kayni kol mi namu; Sawul tunum ŋol kay sum sa duura, nam kir sumun kaf ŋaa'a, kir sa sunda vi Sawul ŋaa'a kaw.

Sawul ka gaw hiɗi David

⁶ Hay li ma David hotay vun duur pa bugol nam ci sa ma Filistin cina, boyna cukay goy hay hoyok-ziyn kaf kay ŋaf ir Sawul, nisi ka gi nulla, ka pir nulla kaw, ka ci darayna hiɗi dil mara'a, ka ci yirina hiɗi firita.

⁷ Boy sa gi nulla ka vi nulla vun tuwsi ala: Sawul ci sumun birim kep David ci sumun birim doogo.

⁸ Nala Sawul dikam muɗ hiy ŋolo. Kay kayni may cuk kuɗ hayamɗi. Nam di'e: Nisi vul mi David birim doogo, vulan man nan birim kepe may! Hini kan kayn ti mulda kep tuta.

⁹ Sawul ɗuw David birek-ceke, tun caw hay buur na'ta pa ta-ta vok ɗaw.

¹⁰ Hay buurta ka'ta, ŋusta joota ta may vi Ma-Vatɗin pata cuk kay Sawul, nam tun caw tuwur kalaf hay ziyda. David ka liwa ki nam ka li jew nala, Sawul ka hiɗi kawayta valam hay ɓalamu.

¹¹ Sawul poŋ kawayta valam kulo'o, nam ka di hay dikam ala: Nan ma ɓal David kulo tam goŋ-ziyda. May David hulot goy vun balam sem ma'.

¹² Sawul tuwam li nari kay wi David vok iramu, kay Ma-Vatɗin ka hiɗi David, may tuwam viy goy hiɗi namu.

¹³ Nam gum iram goy gine hiɗi namu, tunum ŋol kay vok ma birimna David ka kal goyo, ka hotaya kaw hiɗi sum nisina.

¹⁴ Slen ma nam fok kalam kay lumna kaf kol dok-dok mi namu, Ma-Vatɗin ka hiɗi namu.

¹⁵ Hay li ma Sawul wi ala David ka kol dok-doko, nam tun caw li nar kalamu;

¹⁶ may sum sa hay Israyel hiɗi sum sa hay Yuda kaf ka min David, kay nisi ka kal goyo hotay kaw kayni, tuni voksi mi namu.

David muɗi mi kuno mulla

¹⁷ Sawul di tam David: Humaŋu, goota van ta ŋolda Merab nan min vula' kuɗaŋ ca'a; naŋ ma sunan hiɗi dikaŋ kepe, duraŋ duura vi Ma-Vatɗina. Sawul ka di tuwam hay dikam ala: Nan kay tuwan min vumɗi, may sa Filistin kay tuwsi ma vumu.

¹⁸ David hot dit tam Sawul: Nan kayn mi gige? Irita van ti mige? Jafna van hay Israyel kayni si sarige, a nan muɗ goy kuno mulla?

¹⁹ Hay li ma liyn asawa kay vul Merab goota vi Sawul mi David, bu' vula' mi Adriyel ma Meholana.

²⁰ Mikal goota vi Sawul ira' vi David. Nisi di labar namna mi Sawul, lawt kayni cuk kuɗ hayamu.

²¹ Nam var hay dikam ala: Nan vula' malamu, kay na' ma gan jawt vokomu a sum sa Filistin ma vumu. Sawul di mi David sem ma ma'na lo: Vaydi naŋ ma muɗ mi kunonna.

²² Sawul vul dita tam sa sunda valam ala: Nigi ma law goy ŋayaya tam David, nigi ma dum ala: Vaydi kayni mulla dikam ka koti ŋaa'a kaŋu, sa sunda valam kaf ka minaŋu; wulin kayni muɗaŋ kuno mulla yo.

²³ Sa sunda vi Sawul di law namna mi David. David hot dita: Nigi var ala muɗ goy kuno mulla kayn bay lop nala su? Nanu, nan mi sa ma hawi, ma sa as ŋaɓanɗi kaw.

²⁴ Sa sunda vi Sawul tuɗum dita vi David. Nala David vi jobta ta nisi jobom kay nam ma muɗ mi kuno mullata.

²⁵ Sawul di'e: Nigi ma di David ala: Mulla may job faray taŋ noŋɗi, may nam min kayn ala naŋ ma kaam vun yuw sa Filistin kis, kay nam min job yalam tam sa gawt kalamna. Sawul var kayn ala hiɗi kayni sum sa Filistin ma vi David.

²⁶ Sa sunda vi Sawul mar labar namna mi David, nala David li firi hiɗi dita ta nisi dum kay nam muɗ goy kuno mullata.

²⁷ Jew buur ma colina, David fok kulo'o, nam kalay hiɗi sumuna valamu, nisi ci sumun kis-ma' jar sa Filistina; nam kaasi vun yuwsiya, nam maram mi mulla ki mulla jobom nala kay a nam muɗ mi kuno mullana. Nala Sawul vulum goota valam Mikal kuɗum ca'a.

²⁸ Sawul wi'e, hum kaw ala Ma-Vatɗin ka hiɗi David; Mikal goota vi Sawul na' min David.

²⁹ Sawul ka li nar kay David ŋol suwa suwa, hay buura irita valam kaf nam ka gaw hiɗi David.

³⁰ Muliyana vi sa Filistina ka kal goy dura, hay buur kaf ma nisi ka kal goyn kayni, David donom ka ti suw sa sunda vi Sawul kafe. Semda valam muɗ tiy ŋolo kaw.