1 SAMUEL 17 - BIBALDA TA PELDETTA

Duura hiɗi sa Filistina

¹ Sum sa Filistin tok sle-ma-duura visiya kay li duura. Nisi tok tuwsi hay Soko, hay nagata vi Yuda; nisi vi kaŋŋa visi jar Soko hiɗi Azeka, hay Efes-Damim.

² Sawul hiɗi sum sa Israyella kaw tok tuwsiya; nisi vi kaŋŋa visi hay liy ma beɗna vi terebintena, nisi zlar goyo kay li duura hiɗi sa Filistina.

³ Sum sa Filistin ay kay hiɗiyta hay gal hena, sa Israyella ay kay hiɗiyta hay gal hena may. Liyn ma beɗna ka jarsiya.

⁴ San kep kalay goy hay vokŋa vi sa Filistin pa, nam col goy jar vok ma ma'na. Semda valam ala Goliyat, nam mi sa ma hay Gat, fiyokka valamu ir goldoŋ karkiya hiɗi way-ɓamta kepe.

⁵ Bogoray ta kalamta ti waya, noŋ ma cuki talamna tuwam ɓuloko, nekka valamu ir kilo dok-karkiya,

⁶ ɗigiy ma ciliy gaa selem ma mi kawaya, yakata valam ta pelemta ti waya kaw.

⁷ Gu ma piy kuɗ kawayta valamna ŋray ca ki gu-malla nala, kawayt kay tuwa'a nekka va' ir kilo siɗiya. Sa ma ziy marayta valamna ka tuɗ vokomu may.

⁸ Sa ma Filistin cola, sum sa Israyella sa zlaray vun duura nam ka siwel tisi ala: Nigi cukay goyo, zlar goy kaw kay li duura kay mige? Nan zawni mi sa ma Filistina, nigi lakŋi si gorvona vi Sawul may naɗi su? Vilekgi sa kepe kay nam co duranu!

⁹ La nam kolawa kanu, canawa mati, numa muɗ gorvo vigiya; may la nan kolawa kalamu, cum namawa mati, nigi ma muɗ gorvo vuma numa'a, nigi ma sunma'a may.

¹⁰ Sa ma Filistin di lo: Nigi sojena vi Israyella, vaydi nan gufutgiyawa. Vulangi sa aya, numa dur tuwma'a.

¹¹ Sawul hiɗi Israyel kaf hum dita vi sa ma Filistina, nala nisi tun caw hora, narta kal hay diksi ŋolo.

David ci Goliyat

¹² David kayni, nam mi goora vi Isay, sa ma Efratana hay Betlehem vi Yuda. Isay gurona valam sa jufayn glafandi, hay liyna vi Sawul kayni, nam muɗi maari, busata valam kalay ŋolo.

¹³ Gurona vi Isay sa ŋulona sa ɦidina kalay kuɗ Sawul vun duura. Guron nisin sa ɦidina kepna yum Eliyab, ma ma'na yum Abinadab, ma ɦidina yum Samma.

¹⁴ David mi ma goora jarsiya. Hay li ma sa ŋulon sa ɦidina tap kuɗ Sawul tapna,

¹⁵ David hot vo'o hay Betlehem kay ŋom fok-dimina vi bulumu.

¹⁶ Sa ma Filistin ka col ki kayn nala dok-doko, graw culumta hiɗi vulatit kafe, nam li ki kayn nala ta-ta ir buur dok-fiɗi.

¹⁷ Isay di tam David goora valamu: Naŋ ma yaw wal alkamarena ma hawayna hay dutta-kusta, yaw hambulla doogo kaw, tuɗaŋ jaŋi vun liyn ma duura, vulum mi ɓosiyoŋŋa;

¹⁸ yawaŋ alkamare ma ɗiliyn kayni kaw, tuɗum mi ma ŋolla vi vok ma birimna. Naŋ ma ɗuwa la ɓosiyoŋŋa ka ŋaa'a klasige, naŋ ma maran labar ma gasina.

¹⁹ Nisi ka kuɗ Sawul, hiɗi sum sa Israyel kaf hay liy ma beɗna vi terebintena, ka li duura hiɗi sa Filistina.

²⁰ David fok kulo graw culum culum. Nam hin fok-dimina hay ɓam sa ma ŋomda kepe, yaw slena, kaliya kaw ki bulum Isay vulum hagat nala. Hay li ma nam co hay kaŋŋa, sojen ka kot tuwsiya kay tuɗ zlar goy vun duura, ka ci ɗuwulta vi duura.

²¹ Sa Israyella hiɗi sa Filistina zlar goyo kay li duura, sojena zlari vok tuwsiya.

²² Slen ma kay Davidna nam vulum hay ɓam sa ma ŋom jakŋa, kalay jaŋi vun liyn ma duura. Wulini wulini nam job ɓosiyomna ala nisi ka ŋaa su.

²³ Hay li ma nam ka law hiɗi nisiya, nam ɗuw kayni, sa ma Filistin kep hay Gat yum Goliyat, nam kal jar vokŋa vi sojen ma ma'na, goy gine'e hiɗi vokŋa vi sa Filistina. Nam ka lawa ki nam ka law jew nala. David hum sle ma nam dumna.

²⁴ Hay li ma sum sa Israyel kaf irsi wumu, nisi mun vokom jaŋi, narta kal hay diksi ŋolo.

²⁵ Gigekaw di'e: San kayni nigi wi colla valam su? Nam col kayni kay gufut sa Israyella. La sa cumawa, mulla ma hobom hiɗi farayna, nam ma vulum goota valam lay, nam ma but ziyna vi bulum goyo hay Israyel kaw.

²⁶ David di tam sum sa ka goboy hiɗi namna ala: Sa ma Filistin zawn sa ma cumawan ma lum talam mi mige? Sa ma yaw zulot goy kay sa Israyella ɗawn mi gige? Nam zawni mi gige? Sa ma Filistin ma bay ka gosayna, ŋul sojena vi Lawn ma irin kayn ŋultige?

²⁷ Sumun kaf ka hotom dit ki kayn nala: Ala sa ma ci sa namna, mulla ma lum ɗawn ki kayn nala.

²⁸ Eliyab ɓasulum ma ŋolla, hay li ma nam humum law tam sumuna ki kayn nala, nam muɗ ɦiy ŋolo kat David. Nam dumu: Naŋ co tani kay li mige? Fok-dimi namna ma mije'na naŋ hinimi hay fulda kayn hay ɓam gige? Nan wi subur-tuwta hiɗi mileta vi dikaŋu. Naŋ co tan kayni kay ɗuw duura.

²⁹ David hot di'e: Nan lum mi mige? Nan asay a law ki kayn nalaɗi su?

³⁰ Nam muɗ iram goyo kay law hiɗi sa mara'a, nam job jobta na'ta lo. Sumun hotom dita ki ma jewn nala kaw.

³¹ Hay li ma nisi hum dita vi David, nisi tuɗ da' mi Sawul. Nam gi sun kalamu kay garamiya.

³² David di tam Sawul: Hin sa muɗ maŋaya kuɗ sa ma Filistin zawnɗi. Nan min tuɗ dur hiɗi namu.

³³ Sawul di tam David: Naŋ asay a tuɗ dur hiɗi sa namna ma Filistin zawnɗi, kay naŋ mi goorgooro, may namu mi sa ma wi duura hay joriyota valam pa.

³⁴ David di tam Sawul: Hay li ma nan ka ŋom farayna vi bun kayni, la mi zlona lebo mi ursena kaw, hay li ma nam coowa, vi ɦu-dimiyawa kep jar farayna ni,

³⁵ nan jaŋ kuɗumu tom hiɗi zugulla, nan hulot ɦut goy hay vunamu. La nam muɗ iramiyawa kiranu, nan bowom delemu, tom hiɗi zugulla, cap cum goy mati may.

³⁶ Zlona hiɗi ursena nan cum kayn ki kayn nala, sa ma Filistin namna ma bay ka gosayna nan lum ɗawn ki kayn nala kaw, kay nam ŋul sojena vi Lawn ma irina.

³⁷ David hot di lo: Ma-Vatɗina ma butan goy vun tirek zlona hiɗi ɓam ursena nam ma butan goyo kaw hay ɓam sa ma Filistin namna. Sawul di tam David: Tuɗaŋu, Ma-Vatɗin li hiɗi naŋ lige!

³⁸ Sawul cuk sligara valam tam David, nam tunum bogoray ta kawayt kalamu, ganam hiɗi ŋoŋ-ma-duura kaw.

³⁹ David jun kew-gaferaŋa vi Sawul kay sligar namna, nam tun caw tuɗa, kay nam bay wak kayni tuwa. Nam di tam Sawul: Sle-ma-duura cani nan as tuɗ hiɗi namɗi, kay nan may hatay hiɗi namɗi. Nam fokom goyo.

⁴⁰ Nam sli zugulda valam hay ɓalamu, nam kal hay liyn ma niyn riŋŋa, yaw hiɗiy ma tuwam gorayn vasl, cukum hay birimta valam ta ŋom farayna. Bugol kayni nam sli tiwlekka valam hay ɓalamu, nam ɦur kulo goboy tam sa ma Filistina.

⁴¹ Sa ma Filistin ka ɦuray kulo goboy tam David ne' ne', sa ma ziy marayta valamna ka tuɗ vokomu may.

⁴² Sa ma Filistin wi David kayni, nam ɗuwum birek-ceke, David kiram kayni mi goorgoor ma slaw cutut', ma iram kulo tuni jifiy ɦawa.

⁴³ Sa ma Filistina di tam David: Naŋ co katan hiɗi zugul kayni nan mi diya su? Bugol nam beɗ David hiɗi sem lawayna valam beɗna,

⁴⁴ nam di lo: Naŋay katanu, nan min vulaŋ sliwaŋ goy mi layay ma dukalawna hiɗi muuriyan ma hay fulda.

⁴⁵ David di tam sa ma Filistina: Naŋ ka tuɗay katan kayni hiɗi kew-gaferaŋa, hiɗi kawayna, hiɗi yakana kaw. May nanu, nan tuɗis kataŋ kayni hiɗi sem Ma-Vatɗina vi vok-ma-duura, hiɗi sem Lawna vi vok-ma-duura vi Israyel, namu ma naŋ ŋulumna.

⁴⁶ Vayd kayni Ma-Vatɗin ma vulaŋ hay ɓanu, nan ma caŋ goyo, nan ma kaŋ yaŋ goyo; vaydi ŋumna vi sum sa Filistina nan ma vulum mi layayn ma dukalawna hiɗi muuriyan ma hay fulda. Sum sa hay nagat kaf ma wi ala Lawna vi sa Israyel ka'a.

⁴⁷ Sum sa kis gu' gu'n tani kaf ma wi ala Lawn suɗ sumuna valam kayni, may hiɗi kew-gaferaŋɗi, may hiɗi kawaynɗi lay. Kay kolda na' vi Ma-Vatɗina, nam vulgiyawa hay ɓuma'a.

⁴⁸ Wulini wulini, sa ma Filistin fokay tuɗa kay ŋaf ir David, David fok jaŋi hay liyn ma duura kay ŋafam iramu.

⁴⁹ Nam kal ɓalam hay birimta valamu, nam sli hiɗiyt kep ga' hiɗi tiwlekka valamu; hiɗiyt vi sa ma Filistin hay vokom piŋ', hiɗiyt sluɓ kalaf vokomu, nam puk gaa'a, vokom muɗi gaa vi nagata.

⁵⁰ Ki kayn nala, David muɗi dono'o suw sa ma Filistina, kuɗ tiwlekka hiɗi goor-hiɗiyta; nam gum gaa'a, cum goy mati bay kew-gaferaŋ hay ɓalamu.

⁵¹ Nam fokay jaŋi, col kat sa ma Filistina, nam sli kew-gaferaŋa vi Goliyat, patam goy hay faara valamu, ci sa ma Filistina, kaam yalam goyo. Hay li ma sa Filistin wi ala sana visi ma donon mitawa, nisi mun jaŋ giti-giti'.

⁵² Sumuna vi Israyel hiɗi Yuda mun ciriyna, nisi kalay jaŋi kuɗ sa Filistina ta-ta hay liy ma beɗna, ta-ta kulo vun Ekron. Sa Filistin sa fi mitta ka cuki gaa hay hagata vi Saarayim pa ta-ta hay Gat, ta-ta hay Ekron kaw.

⁵³ Hay li ma gurona vi Israyel digiɗ sa Filistin digiɗna, nisi hotay bugolsi kayni nisi vurum kaŋŋa visiya.

⁵⁴ David sli yam sa ma Filistina, kalam kulo Yerusalem, sle-ma-duura vi sa ma Filistina nam lakam kalaf hay ziyna valamu.

⁵⁵ Hay li ma Sawul wi David ka tuɗ dur hiɗi sa ma Filistina, nam di tam Abner ma ŋolla vi sojena; goor ma joriyon kayni mi goora vi gige? Abner hot dita: Mulla, ki naŋ ka iriya nala, nan may wiɗi.

⁵⁶ Sawul di'e: Jobaŋ labara kay bum goor namna.

⁵⁷ Hay li ma David hotaya bugol nam ci sa ma Filistin cina, Abner vumu, tuɗum vok Sawul, nam ka hiɗi yam sa ma Filistin hay ɓalamu.

⁵⁸ Sawul dumu: Goor ma joriyona, naŋ mi goora vi gige? David dumu: Nan mi goora vi gorvona vaŋ Isay, ma Betlehemna.