1 PETER 4 - BIBALDA TA PELDETTA

¹ Kay na'ta la Kristu fi lastawa hay sliwna, nigi kaw kotgi tuwgi hiɗi var na'ta kayni. Kay sa ma fi lastawa hay sliwna, jaram kaawa hiɗi sulukŋa.

² Nigi ma poy kuɗ darta vi sliwna loɗi, may kuɗ minda vi Lawna, hay li ma nigi ka hay nagat tani hay sliwna tuwa.

³ Kay hay liyn ma kalayna, nigi ba liyna vigi ŋolo kay li minda vi sa waana, nigi poy hay raw-goyta, hay darta vi sliwna, hay ɦoyta kuɗ dolayna, hay haramda, hay hiwirta, hay girifta vi lawayn ma waana ma mar ci-matta. May kayni asawa yo!

⁴ Kay na'ta hay li ma wulini nigi may jaŋ kuɗsi hay hiwirta na'ta loɗi, nisi muɗi ɦuyum', tun caw ŋulgiya kaw.

⁵ May nisi ma lak vok nam ma tuwam koti kot kay ka kitata vi sa irina, vi sa mitina kaw.

⁶ Kuɗ na'ta kayni, labara ma firina kusi tam sa mitina kaw, kay hay li ma nisi fi kitata hay sliwna ki sumun nala fina, nisi ma lak iriya kuɗ Lawna hay Ŋusta may.

⁷ May dabaŋ-gu'ta vi slen pet coowa goboyo, kay na'ta lakgi yali, lakgi bay hiwirta kaw, lakgi hay siɗawta.

⁸ Suw slen pet mingi jar-tuwgi ŋaa ŋolo, kay ti-kamda bar sulukŋ ŋolo ŋolo.

⁹ Vigi rogoyn hiɗi firita bay ŋurnaya.

¹⁰ Kay gige gige jargiya Lawna vulum vulda valam ir va'a va'a, nala nigi ma sun segena hiɗi vulda ta vuli tigiya, ki sum sa ŋom slugota vi Lawna ta vuli tisi ir tak-taki nala.

¹¹ La sa kus yoboyna, nam ma kus yoboyna vi Lawna nala, la sa sun hay tapna, nam ma sun kuɗ donota ta Lawna vulumu, kay Lawna ma fi suburta hay slen kaf hay Yesu Kristu, nam ma gajijita hiɗi gaŋeraŋa kaf kalamu hay vatɗita vatɗita, Amen!

¹² Nigi sa hayan kigina, kuta ta ka ŋal jargiya kay wakgi kayni nigi ma muɗ ɦuyum' ka'ɗi, nigi ma var ala co kigi kayni mi va ma jooɗi.

¹³ May firigiya kay tap hay lasta vi Kristu, kay nigi ma li firi ŋol suwa hay li ma nam min vul tuwam goyo hay gajijita valamu.

¹⁴ La nigi fi ŋulda kuɗ semda vi Kristu, sle'ta ka kigiya, kay Ŋusta vi gajijita, Ŋusta vi Lawna ka mus kigiya.

¹⁵ Hin sa jargiya ci lasta ki nam mi sa ma ci mati naɗi, ki nam mi sa ma kulla naɗi, ki nam mi sa ma jiw-zlata naɗi, ki nam mi sa ma ɦak zlata naɗi kaw.

¹⁶ May la nam fi lasta kayni kuɗ ta ala nam sana vi Kristu, nam ma horɗi, ŋaata nam ma subur Lawna kuɗ semda kayni.

¹⁷ Kay liyn coowa a kitata ma tun cawi, na' ma tun caw hiɗi sumuna vi Lawna, may la na' tun caw hiɗi nay jewe, nisi sa hum kuɗ labara ma firina vi Lawnɗina dabta visi ma li ir nanige?

¹⁸ La sa ma ɗigera fi su'da ir lop ŋolo, sa ma jiw-zlata hiɗi sa ma sulukŋa ma lak arige?

¹⁹ Kay na'ta nisi sa fi lasta kuɗ minda vi Lawna, hinsi vul ciwta visiya hay ɓam nam ma ɗigera, ma li slen kafna hay li ma nisi li ŋaata.