1 PETER 2 - BIBALDA TA PELDETTA

¹ Kay na'ta hingi joota hiɗi ɗutta kaf goyo, hiɗi mileta hiɗi hunayta hiɗi yoboy ma joona kaf kaw.

² Ki guro sa vuɗi wulina nala, nigi ma dar miira vi Ŋusta ma bay ɗutta, kay nigi ma wul kulo'o hiɗi namu tam su'da.

³ La nigi jugo ŋaata vi Bum-Sumunawana.

Yesu mi hiɗiy ma gef-ziyna

⁴ Nigiyay goboy talamu, namu mi hiɗiyn ma irina, ma sumun gum goyna, may vilekay goyo, jifiy ŋolo kaw vok ir Lawna.

⁵ Nigi nala kaw ki hiɗiyn ma irina nala, nigi ma wul kulo'o tam Tempella ma Ŋusta, kay nigi ma muɗ goy si sum sa li ɗifinna ma peldetna, ma kir Lawn ŋaa'a hay Kristu.

⁶ Kay hay ɗota dit di ala: Humgiya, nan tun hay Siyon hiɗiyn ma gef-ziyna, vilekay goyo, jifiy ŋolo, sa ma vi hay namu ma muɗ goy zuloɗi.

⁷ Nigi sa viyna, subur na'ta kayni figita, may kay sa bay-vina, hiɗiyn ma sum sa in ziyn gum goyna, muɗi mi hiɗiy ma ŋolla, hiɗiy ma gef-ziyna, hiɗiy ma ci dugum mi sa'a, ma dab sem sa kaw.

⁸ Nisi dab sesi nala hay li ma nisi min hum kuɗ yoboynɗi, nisi ŋaɓay goyo kay kayni kaw.

⁹ May nigiya, nigi mi jaf ma vilekay-goyna, muliyan-sa-ɗifinna, jaf-sum sa peldetna, sum sa gusina, kay nigi ma di goyo kay ŋaata vi nam ma yigi ay hay jufunda pa, tam haraŋa valam ma jifiy ŋolla.

¹⁰ Nigi sa hay liyn ma kalayna ay si jaf-sum sa gasinɗi, may wulini nigi muɗawa si sumuna vi Lawna. Nigi sa bay fi slugota jewe, may wulini nigi fi slugotawa.

Irita vi sa viyna jar sa waana sa ŋom nagata, hiɗi mulaysina kaw

¹¹ Nigi sa hayan kigina, nan siɗawgi ala: Ki sum sa pulla hiɗi sum sa rogoyna nala, nigi ma tel tuwgiya kay darta vi sliwna ta dur hiɗi ciwta.

¹² Poygi ŋaa'a vok ir sa waana, kay hay li ma nisi ŋulgi ki sum sa li sle ma joo'o nala kaw, la nisi wi lopna vigi ma ŋaanawa, nisi ma subur Lawna hay li ma nam co ɗuwsiya.

¹³ Kay na'ta humgi kuɗ gatta vi sa ŋom nagata hay semda vi Bum-Sumuna. La mi mulla, humgi kuɗum ki nam ma ŋolla nala;

¹⁴ la mi guvernera, Lawna gumiya kay ka kitata kay sa li joota, kay subur nisi sa li ŋaata kaw;

¹⁵ kay kayni mi minda vi Lawna, ala hay li ma nigi li ŋaata, nigi ma ziŋ bay-wida vi sa ɦay-ɦayna.

¹⁶ Ki sum sa buti goyna nala, may butta-goyta na'ta ma bar yam joota vigiɗi, may ki sa sunda vi Lawna nala.

¹⁷ Sligi yam sumun kaf kulo'o, mingi ɓosiyogina, ligi nar kuɗ Lawna, sligi yam mulla kulo'o.

¹⁸ Nigi sa gorvona, humgi kuɗ mulaygina hiɗi narta kafe, humgi kuɗ sa ŋaana hiɗi sa lumaɗna tutaɗi, may kuɗ sa lawsi lop ŋolla kaw,

¹⁹ la san ka ci lasta goy waa'a hiɗi yalam hotay gaa'a kuɗ Lawna ni, kayni muɗ goy slugota kalamu.

²⁰ Hay li ma nisi ka lasgiya kay nigi li suluku ni, gajijita mige nigi as fi kuɗ kayni? May la nigi fi lasta hay li ma nigi li ŋaata, kayni ti slugota kigiya vok ir Lawna.

²¹ Kay nam yigiyawa kay kayni, kay mige Kristu kaw ci lastawa kigi nigiya, hini tigi nigi nala kaw kay nigi ma sli kuɗumu;

²² nam may li sulukɗi, nam ma ɗutta may hay vunamɗi kaw.

²³ Namu ma hay liy ma nisi ŋulumu, nam hot ŋulda tisiɗi, hay li ma nisi lasamu, nam may gulutsiɗi kaw, may hin tuwam hay ɓam nam ma ka kitata ɗigerta.

²⁴ Nam ma ziy sulukŋa vayawa hay tuwamu kulo kay guna, kay nay sa miti tam sulukŋa ma muɗ iriya kuɗ ɗigerta; nam ma nigi kuɗ milla valamu fi yerta-goytawa.

²⁵ Kay nigi ay ki fok-dimina ma meray goyna nala, may wulini nigi hotiyawa tam sa ma ŋomda, nam ma ŋom ciwta vigiya.