1 MULIYANA 5 - BIBALDA TA PELDETTA

¹ Salomon ka ti mulda kay nagat kayni, tun caw ay vun niy-lumna pa ta-ta hay nagata vi sum sa Filistina, ta-ta hay vun nagata vi Egipte goŋ', nisi ka maram sle ma vulda, nisi ka juni gaa kuɗ Salomon hay buura irita valam kafe.

² Kayni mi tin ma Salomon hiɗi sum sa vo valamna as tum hay fat ta kepta: Futuw ma digeɗna ir buhu dok-ɦidi, futuw ma ɦawan ir buhu dok-karkiya,

³ luway ma ɗorayn doogo, luway ma ti hatn dok-ma', fukunayn kis, kayn di ala buɗugoora, dukŋa, lafna hiɗi layay ma ɗorayna may ŋaɓay hayɗi.

⁴ Nam ti mulda kay nagat kaf tun caway hay gal hena vi niy-lumna, tun caway hay Tifsak ta-ta hay Gaza, kay muliyan sa goy gal hena vi niy-lumna kafe. Sle'ta ka goy hay galam kafe.

⁵ Sumuna vi Yuda hiɗi Israyel, vunsi fokay hay Dan pa ta-ta hay Beer-Seba, lakay kayn hay sle'ta, hay buura vi Salomon kaf kayni, gigekaw musi kayn gaa kuɗ gulda-guldana hiɗi gu-gumna valamu valamu.

⁶ Salomon ka hiɗi jokŋa vi kulumayna birim dok-fiɗi. Kulumay ma tan keke-ma-duura ti hat kayn haya. Sum sa jaŋ kulumayna birim doogo yam ma'.

⁷ Sa lakay goy hay nagat kafna ka gar sle ma tina kay mulla Salomon hiɗi sum sa ka ti hiɗi nam kafna, gigekaw hay li ma tilla valam coowana, nam may hin va'ay gaa'a noŋɗi.

⁸ Nisi ka mar orgena hiɗi hosona kaw kay kulumayna hiɗi faray hegena hay liyn ma mulla ka musi hayna, gigekaw kuɗ dit ta di talamu talamu.

Ŋolda vi Salomon, selem ma tiyna hiɗi yalda valamu

⁹ Lawn vul yalla mi Salomon, vulum wida vi slena, hiɗi wid tara'a tara'a ŋol dak-dak ki ŋeslna ma ka kel niy-lum ma ŋolla nala.

¹⁰ Yalda vi Salomon na' ay suw yalda vi sum sa kuɗuwna kaf, hiɗi yalda vi sum sa Egipten kaf kaw.

¹¹ Nam yal ŋolo suw sumun kaf, suw Etan ma Ezrahitna, suw Herman, suw Kalkol hiɗi Darda, gurona vi Makol; selem ma tiyna meray goyo jar jaf-sum sa galamna kafe.

¹² Nam di law ma nir-niramna birim ɦidi, kot nul ma gina birim kep hiɗi diram vasl.

¹³ Nam law kay guwayna, tun caw tam gu-gamna vi Libaŋ pa ta-ta tam gu-hisopna ma day kulo tam gulmunna, nam di law ma nir-naramna kay muuriyana, kay layayna, kay sle ma ɦarmatna, kay kulufna kaw.

¹⁴ Sumun ka coy goy hay naga hena pa kay hum yalda vi Salomon, muliyan hay nagat noŋ kaf humi labara kay yalda valamu.

Salomon jun bonot hiɗi Hiram mulla vi Tirus, kotta kay inda vi Tempella

¹⁵ Hiram mulla vi Tirus cuk sa sunda valamu kat Salomon, kay nam humi ala Salomon tuni mulu hay baŋal bulumu, kay hay liyna vi David kayni Hiram minim dok-doko.

¹⁶ Salomon cuksi kay di tam Hiram ala:

¹⁷ Naŋ wi ala bunu David may fi kay in ziy mi Ma-Vatɗina Lawna valamɗi, kuɗ ŋuy ma sa gawt ŋuyumu kay lum duura, ta-ta Ma-Vatɗin vul donot mi David kay kol kisiya.

¹⁸ Wulin kayni Ma-Vatɗin Lawna vanu vulan tun-sukkawa goy hay galan kafe; sa gaw kanna say loɗi, bakmara may loɗi lay.

¹⁹ Wulin kayni, nan min in ziy mi Ma-Vatɗina Lawna vanu, ki Ma-Vatɗin di tam bunu David nala ala: Goora vaŋu ma nan musum hay baŋalaŋ kay zlamda-mulda vaŋ ɗawni, ma in ziyn hay semda van ɗawn mi namu.

²⁰ Naŋ ma vul hagat ta', kay sumun ma kan gu ma hay Libaŋ. Sa sunda vanu ma tap hiɗi sa sunda vaŋu, nan ma wurak sa sunda vaŋu ki naŋ col wurakŋa nala. Kay naŋ wi ala jarma kayni sum sa as hum tuwsiya kay ka guna ki sum sa Sidonna nala sayɗi.

²¹ Hay li ma Hiram hum sunda vi Salomon, dikam li firi ŋolo, nala nam di'e: Vaydi suburta tam Ma-Vatɗina, nam ma vul goor namna ma yali mi David, kay nam ma ŋom sum nisi sa ŋol hini-hinin kayni.

²² Nala Hiram hot dit tam Salomon: Sunda vaŋ ta naŋ ga'ay tanta nan huma'awa. Nan ma li sle ma kiraŋ ŋaana kaf kay gu-gamna hiɗi gu-siprena.

²³ Sa sunda van ma yawamis hay Libaŋ pa cukum goloŋ hay niyna, nan ma junum yam tuwamu dolomis goloŋ hay niyna, ta-ta nan ma lakam hay liy ma naŋ min dan kalamna; ɗawni nan ma butum goyo, nala naŋ ma yawamu. Va ma nan minim hay ɓaŋ kayn ala naŋ ma vulan wa ma tina kay ziyna vanu.

²⁴ Hiram vul gu-gamna hiɗi gu-siprena mi Salomon ki nam min nala.

²⁵ Kayni mi tina ma Salomon ka vulum hay busata busata kaf mi Hiram hiɗi ziyna valamu: Alkamarena ir buhu birim dok-ma', mul olive ma kilira ir goŋgoŋ dok-ma' may.

²⁶ Ma-Vatɗin vul yalla mi Salomon, ki nam dum goy jew nala. Toyta li'e jar Hiram hiɗi Salomon, nisi jun bonot jar-tuwsiya may.

²⁷ Mulla Salomon vilek sum sa li lop ma ɦiɓiyna kuɗ sa Israyel kafe; nisi noŋ pet ir birim dok-ɦidi.

²⁸ Nam cuksi hay Libaŋ, hay tilla nam cuk sumun birim doogo doogo; nisi li til kep hay Libaŋ, li til ma' vo visiya may. Adoniram mi sa ma ŋom sum sa li lop ma ɦiɓiyna.

²⁹ Salomon ka hiɗi sum segen birim dok-siɗiya lo sa ziy jakŋa, segen birim dok-glafandi kayn sa ka goy jar hiɗiyna kay ceɗemu.

³⁰ Sa tuni ŋolo kay sa li lopna, kay ŋom sum sa lopna kaw nisi birim ɦidi kalam kis-ɦidi kayni may ŋaɓay jar sa lopnɗi.

³¹ Mulla vul hagata kay nisi ma ceɗ hiɗiy ma ŋulona ma jifiyna kay vi bag-ziyd gaa hiɗi namu.

³² Sa sunda vi Salomon, sa Hiramna hiɗi sa Gibliyena ceɗ hiɗiyna, nisi kot guna hiɗi hiɗiyna kay in ziyda.