1 MULIYANA 2 - BIBALDA TA PELDETTA

David ka vun mitta, nam gi bol mi Salomon

¹ David yalam gijaawa goboy a mita, nam gi bol mi goora valam Salomon ala:

² Nan min tuɗ hay hagat ta sumun jik haya' kafta. Laŋ tuwaŋ dono'o, laŋ tuwaŋ ki sa ma juf nala.

³ Humaŋ kuɗ vun-ma-gatna vi Ma-Vatɗina Lawna vaŋu, poyaŋ hay hagata valamu, ŋomaŋ gatta valamu, dita valamu, kitata valamu hiɗi yoboyna valamu, kuɗ sle ma ɗoy hay ɗerwelda vi sa ma jobta Musus, kay sle ma naŋ min lum kafna ma li hay liyamu hay liyn kaf ma naŋ min muɗ iraŋ hayamna,

⁴ kay hob vun yoboyn ma Ma-Vatɗin dum kan ala: La gurona vaŋ ŋom hagata visi ŋaa'a, poy ɗigere vok iranu hiɗi diksi kaf hiɗi ciwta visi kaf kaw, bugolaŋ ɗawni zlamda-mulda vi Israyel sa ma mus ka' dok-doko.

⁵ Naŋ wi va ma Yowab goora vi Seruya lum tanna, va ma nam lum tam sa ŋulona vi sojena vi Israyel sa ma'na: Abner goora vi Ner hiɗi Amasa goora vi Yeter nam cisi goyo, nam jaŋ busuwna vi duur goyo hay li ma sle'ta ka'a, nam tun busuwna vi duura tam kanti ma furamna hiɗi tuguru ma selemna.

⁶ Naŋ ma li hiɗi yalda vaŋu, naŋ ma hinim mit gaa hiɗi ɗuŋus ma haɓna kalam hiɗi sle'taɗi.

⁷ Naŋ ma li ŋaat tam gurona vi Barzilay ma Galaadna. Naŋ ma tapsi jar sum sa ti fun gaa taŋŋa; kay nisi lan nan ŋaa'a ŋolo, kay hay li ma goor-buŋŋa Absalom digiɗanu, nisi co ŋafan iranu.

⁸ Humaŋu, Simey goora vi gera ma Benyaminna ma hay Bakurimna ka taŋu. Nam ŋulan ŋolo hay li ma nan ka kal hay Mahanayim, may nam co ŋafan iranu hay li ma nan ka kal gal Yordan, nala nan yi va kan vok Ma-Vatɗin ala nan ma cum goy hiɗi kew-gaferaŋaɗi.

⁹ Wulin kayni naŋ as hinim goy ɦawa bay ka kitat kalamɗi, kay naŋ kayni mi sa ma yal ŋolo, naŋ wi va ma naŋ ma lum talamna. Hiɗi ɗuŋus haɓ ma kalamna pet naŋ ma cum ciy goy mati.

¹⁰ David mit kuɗ sumiyamu, nisi pum hay hoyok-ziyna vi David.

¹¹ David ti mulda kay Israyel ir busat dok-fiɗi: Hay Hebron nam ti mulda ir busat siɗiya, hay Yerusalem nam ti mulda ir busat dok-ɦidi yam ɦidi may.

MULDA VI SALOMON Salomon vul hagata kay ci Adoniya, Yowab hiɗi Simey goyo Abiyatar pati goy hay lop mul-ma-ɗifinna

¹² Salomon mus kay mulda vi bulum David, mulda valam muɗ ŋol suwa.

¹³ Adoniya goora vi Haggit tuɗ kat Bat-Seba, sum Salomon. Na' di talamu: Naŋ co katan kayn hiɗi labar ma sleɗ kaw su? Nam hot dit ala awa.

¹⁴ Nam hot di ta' lo ala: Va ma nam min di tag ka kepe. Na' ala daŋaya.

¹⁵ Nam di ta'a: Nak wi ala mulda jew na' vanu, sum sa Israyel kaf irsi ay cuki kiranu kay tunan mulu, may mulda huloti goyo, na' vuli goy mi goor-bunna Salomon, kay Ma-Vatɗin vulumtawa.

¹⁶ Wulin kayn nan jobag va kepe, nak ma telem kanɗi. Na' hot dum ala daŋaya!

¹⁷ Nam di'e: Nan siɗawagu kay nak ma di tam mulla Salomon, kay nam as tel kayni kagɗi. Abisak ta Sunamitta nam ma vulanti man ca tage.

¹⁸ Bat-Seba di'e: Ŋaa'a nan ma di lawta vaŋ tam mulla.

¹⁹ Bat-Seba kalay kat mulla Salomon, kay dum kay lawta vi Adoniya. Mulla fokay kulo'o kay tuɗ ŋafa' ira'a, nam girif gaa voka'a, hot mus kay zlamda-mulda valamu. Nisi tun kuroŋgol goyo kay sum-mulla, na' mus kalamu hay gal ma jufna vi mulla.

²⁰ Na' di'e: Nan ka hiɗi jobta ta goor taŋu, naŋ ma tel kayni kanɗi. Nam di'e: Jobagu, sunu, kay nan as tel kayni kagɗi.

²¹ Na' di'e Abisak ta Sunamitta naŋ ma vula' mi goor-buŋŋa Adoniya tage.

²² Mulla Salomon hot dit tam sulumu: Abisak ta Sunamitta nak joba' mi Adoniya kayn kay mige? Nak may joban kay nan vulum mulda ɗisu? Ka nam mi goor-bun ŋolla, jobag mulda malamu hiɗi mul-ma-ɗifinna Abiyatar hiɗi Yowab goora vi Seruya ɗisu?

²³ Ki kayn nala mulla Salomon yi va kalam hay sem Ma-Vatɗina nam di'e: Lawn Ma-Vatɗin ma lan joo ŋolo, la nan yaw irita vi Adoniya goy kay dita valam na'ta kaynɗina.

²⁴ Wulin kayni Ma-Vatɗin ka iriya, nam ma muɗan dono'o, ma musan kay zlamda-mulda vi bunu David, nam ma vulan ziyna kuɗ dita-ŋaɓayta valamu. Vaydi kayni Adoniya ma mita.

²⁵ Nala mulla Salomon gi Benaya goora vi Yehoyada, nam calamu, cum goy mati.

²⁶ Bugolda mulla di tam mul-ma-ɗifinna Abiyatar: Tuɗaŋ hay nagata vaŋ Anatot, naŋ nagay a ti mitta; may nan as caŋ goy vayd deɗi, kay naŋ ziy timgilla vi Bum-Sumuna Ma-Vatɗina vok Bunu David, kay lasta ta bun ca' kafta naŋ ca' hiɗi namu.

²⁷ Ki kayn nala lopna vi ɗifinna ma Abiyatar lum vok Ma-Vatɗina Salomon yawam goy kalamu, kay hob vum yoboyn ma Ma-Vatɗin dum kay ziyna vi Eli hay Silona.

²⁸ Labara co tam Yowab, kay nam tap kuɗ galla vi Adoniya, may kuɗ Salomonɗi. Nala Yowab kal ŋay hay guɗukŋa vi Ma-Vatɗina, nam mok miyok giwin-ma-ɗifinna.

²⁹ Nisi co labara tam Salomon ala Yowab ka ŋayay hay guɗukŋa vi Ma-Vatɗina, nam ka kat giwin-ma-ɗifinna. Salomon gi Benaya goora vi Yehoyada, nam ka dum ala calaŋga.

³⁰ Benaya co kat guɗukŋa vi Ma-Vatɗina, nam di tam Yowab ala kalaŋay goyo, mulla vul hagatay nala. May nam hot dit ala a'a, nan min mit tani. Benaya tuɗ lawt tam mulla ala: Yowab hot dit tan nala nala.

³¹ Mulla di tam Benaya ala: Laŋ ki nam di nala: Calaŋgisa, naŋ ma pumu. Ki kayn nala busuw ma Yowab ɦokom goy ɦawana, naŋ ma yawam goy kanu, kay ziyna vi bunu kaw.

³² Ma-Vatɗin ma tunum busuwam kelem kay tuwamu, kay sum sa ma'na sa ɗiger suwum namu, ŋaa'a suwum namu kaw nam cisi goyo hiɗi kew-gaferaŋa, bay di kayni goy jewe mi bunu David. Nisi kayni Abner goora vi Ner; ma ŋolla vi sojena vi Israyel, hiɗi Amasa goora vi Yeter, ma ŋolla vi sojena vi Yuda.

³³ Busuwsi ma nig kisiya, Yowab busuwam ma nig kay jafna valam ma bugolomna ta-ta hay vatɗita; may toyta vi Ma-Vatɗin ma mus kay David, kay jafna valam ma bugolomna, kay ziyna valamu, kay zlamda-mulda valamu kaw.

³⁴ Benaya goora vi Yehoyada kaliya, nam cal Yowab, cum goy mati. Nisi pum hay ziyna valamu hay fulda.

³⁵ Mulla yi Benaya goora vi Yehoyada, nam tunum ŋol kay sojena hay baŋal Yowab, nam tun mul-ma-ɗifinna Sadok hay baŋal Abiyatar may.

³⁶ Mulla yi Simey, nam dumu: Naŋ ma in ziy kep hay Yerusalem, naŋ ma mus haya, naŋ as kay kal goy hay ziy namna pa kay tuɗ hay liy maraɗi.

³⁷ Waŋ goy ŋaa'a ŋolo ala hay li ma naŋ kalawa goyo, ɦaw niy-lumna vi Sedronawa kulo'o, naŋ ma mita, busuwaŋ ma hot nig kaŋu may.

³⁸ Simey hot dit tam mulla: Kayn ŋaa'a, va ma naŋ mulla di'e nan ma li kuɗumu. Simey mus malam ta-ta hay Yerusalem.

³⁹ Hay vatta vi busata ɦidit kayni, sa sunda vi Simey ma' pir goy vi Akis, goora vi Maaka, mul ma hay Gatna. Nisi mar labara tam Simey ala: Humaŋu, sa sunda vaŋ ka ɗawni hay Gat.

⁴⁰ Simey fok kulo'o, nam gan kurona valamu, kalay ɗawni hay Gat goy vi Akis kay gar sa sunda valamu. Nam kaliya, nam yawsiyay hay Gat pa marsiya.

⁴¹ Nisi co labara tam Salomon ala Simey fokis hay Yerusalem pa, kal hay Gat, wulini nam hoti hot.

⁴² Mulla yi Simey aya, nam dum ala: Nan halafaŋ hiɗi sem Ma-Vatɗina, nan daŋ goy haraŋ ala: Buur ma naŋ kal goyo kay tuɗ hay liy mara'a naŋ ma mita ɗisu? Naŋ hotan dit ala ŋaa'a, naŋ humiya ɗisu?

⁴³ Va ma naŋ yum kaŋ vok Lawna naŋ min li kuɗumɗi, naŋ min hum dita vanɗi lay kay mige?

⁴⁴ Mulla hot di mi Simey: Joo ma naŋ lum mi bun David kafna naŋ wum hiɗi iraŋ kaf. Joota vaŋ ta naŋ la'ta Ma-Vatɗin ma hot tuna' kaŋu.

⁴⁵ May nan hayɗini, Ma-Vatɗin ma gan bolo, zlamda-mulda vi David na' ma muɗ dono dok-doko vok ir Ma-Vatɗina.

⁴⁶ Ki kayn nala mulla vul hagata tam Benaya goora vi Yehoyada, nam kalay goyo cal Simey, Simey mita may. Mulda muɗ dono ŋolo hay ɓam Salomon.