1 MULIYANA 15 - BIBALDA TA PELDETTA

Abiyam mulla vi Yuda

¹ Co hay busata doogo yam glafandita vi Yerobowam goora vi Nebat hay mulda kayni, Abiyam ti mulda hay Yuda.

² Nam ti mulda ir busat ɦidi hay Yerusalem. Sulum ya' Maaka, na' ti goota vi Abisalom.

³ Nam kal tuwam hay sulukŋa kaf ma bulum lum jewemna; nam min vul dikam mi Ma-Vatɗina Lawna valam kafe ki bulum David naɗi.

⁴ May kuɗ bulum David, Lawna Ma-Vatɗina valamu vulum fitilla kep hay Yerusalem, kay nam tun goora valam hay mulda bugolomu, kay nam hin Yerusalem kulo'o kaw.

⁵ Kay David li sle ma ɗigera kir Ma-Vatɗina, kay hay buura vi irita valam kaf kayni, nam may raw vun-ma-gatna vi Ma-Vatɗin goy noŋɗi, say law ma lum iram tam Uriyas ma Hetna kep tuta.

⁶ Hay li ma Robowam ka iri tuwan kayni, duur li jaram hiɗi Yerobowam.

⁷ Caw lopna vi Abiyam, sle ma nam lum kafna, kayni may ɗoy hay ɗerwella vi Labar-Ma-Liyna vi muliyana vi Yuda ɗisu? Duura li jar Abiyam hiɗi Yerobowam.

⁸ Abiyam mitiya, nisi pum hay hoyok-ziyna vi David. Goora valam Asa ti mulda hay baŋalamu.

Asa, mulla vi Yuda

⁹ Co hay busata dok-ma'ta vi Yerobowam mulla vi Israyel kayni, Asa ti mul kay Yuda.

¹⁰ Nam ti mulda ir busat dok-fiɗi yam kep hay Yerusalem, sulum ya' Maaka, goota vi Abisalom.

¹¹ Asa li sle ma ɗigera vok ir Ma-Vatɗina, ki bulum David nala.

¹² Sum sa li tuwsi viyuwna nam yawsi goy hay nagata, lawayn ma waana ma sumaysi kotomna kaf nam vatam iram goyo.

¹³ Ŋolda vi ca-mulda Maaka sulum kaw nam yawa' goyo, kay na' kot lawayn ma waana kay Astarte. Asa to laway ma waana va' gaa'a, nam ŋalam goyo vun niy-ma-riŋŋa vi Sedron.

¹⁴ May hiɗi dikam ma nam vulum mi Ma-Vatɗina hay buura irita valam kaf kaw, liyn ma ɗiŋiriŋŋa nam may tom goyɗi.

¹⁵ Slen ma bulum vulum goyna hiɗi ma nam vulum goyna kaw, nam lakam hay ziyna vi Ma-Vatɗina. Kayn di ala doorota hiɗi ora hiɗi dowayna kaw.

¹⁶ Duura li jar Asa hiɗi Bayeska mulla vi Israyel, hay buura irita visi kafe.

¹⁷ Bayeska mulla vi Israyel fok kulo'o kat Yuda; nam sli hoyok-ziyn Rama, sumuna vi Asa mulla vi Yuda nam telsi kay cuk kulo hay hoyok-ziyna, kay hot cukay goyo kaw.

¹⁸ Doorota hiɗi or kaf ma ka hini hay timgilla vi ziyna vi Ma-Vatɗina, hiɗi ziyna vi mulla kaw, Asa yawamu, nam vulum hay bam sa sunda valamu, nam cuksi kat Ben-Hadad, goora vi Tabrimon, goora vi Hezyon, mulla vi Siriya, ma ka musi ziy hay Damas. Mulla Asa vulum dit ala:

¹⁹ Hin bonot jun jaranu hiɗi naŋu, ki bonot ays jar bunu hiɗi buŋu nala, humaŋu nan vulaŋ doorota hiɗi ora. Tuɗaŋu, bonota ta jaraŋ hiɗi Bayeska mulla vi Israyel naŋ ma ja' goyo, kay nam ma vi tuwam goy gine hiɗi nanu.

²⁰ Ben-Hadad hum dita vi mulla Asa; nam cuk sa ŋulona vi sojena valamu kay duur hoyok-ziyna vi Israyel, nisi sli Iyon, Dan, Abel-Bet-Maaka, Kinnerot kafe, hiɗi nagata vi Neftali kaf kaw.

²¹ Hay li ma Bayeska hum kayni, nam min in Rama loɗi, nam mus malam hay Tirsa.

²² Mulla Asa yi sum sa hay yudan kafe, nam min hin sa goy noŋ kepɗi, hiɗiyna hiɗi guna ma Bayeska maram kay kot Rama kaf nisi yawamu; mulla Asa kal kot Geba vi Benyamin hiɗi Mispa kaw hiɗi gu namna.

²³ Caw lopna vi Asa ma hinin kaf, kursulita valamu hiɗi sle ma nam lumna kaf, hiɗi hoyok-ziy ma nam kotomna, kayni ka ɗoy hay ɗerwelda vi Labar-Ma-Liyna vi muliyana vi Yuda. Hay li ma nam muɗ maar kayni, selem li moyo.

²⁴ Asa mitiya, nisi pum tam sumiyamu hay hoyok-ziyna vi David bulumu. Goora valam Yosafat ti mulda hay baŋalamu may.

Nadab mulla vi Israyel

²⁵ Nadab goora vi Yerobowam ti mulda kay Israyel, kayni hay busata ma'ta vi Asa, mulla vi Yuda. Nam ti mulda ir busat ma' kay sa Israyella.

²⁶ Nam li sle ma joo'o kir Ma-Vatɗina; nam tuɗ hay hagata vi bulumu, kal tuwam hay sulukŋa ma bulum kal sum sa Israyel hayamna.

²⁷ Bayeska goora vi Akiya, ma hay jafna vi Isakar, nam fok kulo kay Nadab, Bayeska ci Nadab goyo hay Gibbeton ta vi sa Filistina, kayni hay li ma Gibbeton ka ŋuyi kay Nadab hiɗi sa Israyella kafe.

²⁸ Bayeska cum goy kayni hay li ma Asa mul ma Yudana li busatawa ɦidi hay mulda. Nam ti mulda hay baŋalamu may.

²⁹ Hay li ma nam muɗ mul muɗna, sum sa vo hay ziyna vi Yerobowam nam cisi goy kafe, nam hin sa kep kaw pir goy noŋɗi, sle ma sukka hayamna nam cum goy kafe, kuɗ yoboyna ma Ma-Vatɗin di'e hiɗi vun Akiya sa ma jobta valamu hay silo,

³⁰ kuɗ sulukŋa ma Yerobowam lumu, ma nam kal sum sa Israyel hayamna kaw, ma nam ɓulak dik Ma-Vatɗina Lawna vi Israyel hiɗi namna.

³¹ Caw lopna vi Nadab ma hinina, slen ma nam lum kafna, kayni ka ɗoy hay ɗerwelda vi labara vi muliyana vi Israyel.

³² Duura li jar Asa hiɗi Bayeska mulla vi Israyel hay buura vi irita visi kafe.

Bayeska mulla vi Israyel

³³ Co hay busata ɦidita vi Asa mulla vi Yuda kayni, Bayeska goora vi Akiya ti mul kay sa Israyel kaf hay Tirsa. Nam ti mulda ir busat dok-ma' yam fiɗi.

³⁴ Nam li sle ma joona kir Ma-Vatɗina, nam tuɗ hay hagata vi Yerobowam, kal tuwam hay suluk ma Yerobowam kal sum sa Israyel hayamna.