1 MULIYANA 10 - BIBALDA TA PELDETTA

Ca-mulda vi Seba co hay Yerusalem

¹ Ca-mulda vi Seba hum labara vi Salomon kay selem ma tiy ŋolla, kuɗ gajijita vi Ma-Vatɗina. Na' co'o kay wakam hiɗi vanbona.

² Na' co hay Yerusalem, hiɗi sumun kuɗa' ŋolo, hiɗi lamgana ma ka ziy aromatna, hiɗi ora suwi ŋolo, hiɗi hiɗiy ma ŋaana. Na' kalay kat Salomon, na' dum sle ma kira'na kafe.

³ Salomon hota' dit kuɗ jobta va' kaf, va mara ma hin ŋayay ma mulla bay da'ti cawam goy mayɗi.

⁴ Ca-mulda vi Seba wi yalda vi Salomon kafe, hiɗi ziyna ma nam inimna kaw,

⁵ hiɗi tina ma nam ka tumna, liy ma musta vi sa sunda valamu, lopna hiɗi sligar ma sa sunda valam cukumna, sa kotom tina, hiɗi ɗifin ma ŋal-goyna ma nam ka lum hay ziyna vi Ma-Vatɗina;

⁶ ki kayn nala suka' tok kela'a, na' ka di tam mulla: Wulin kayni, labar ma nan humumi hay nagata van pa, kay liyn ma musta vaŋu, kay yalda vaŋu kaw kayni nam gasiya.

⁷ Jewe nan ka hum labar namna may nan min viɗi, may wulini nan coowa wumawa hiɗi iranu. Dolay kayni, galla vi yalda vaŋ kaw sa bay danta tuwa. Yalla vaŋu hiɗi farayna vaŋ ka ŋolo suw labara vaŋ ma co tanna.

⁸ Sle'ta ka kay sumuna vaŋu, sle'ta ka kay sa sunda vaŋu sa ka vok iraŋ dok-doko, sa ka hum yalda vaŋu hiɗi humsiya.

⁹ Suburta tam Ma-Vatɗina Lawna vaŋu, nam ma vulaŋ slugota kay tunaŋ ŋolo kay zlamda-mulda vi Israyel. Kay Ma-Vatɗina min sa Israyel dok-doko, nala nam tunaŋawa mulu kay naŋ ma di gasita, li ɗigerta kaw.

¹⁰ Na' vul ora ir talente kis kalam dok-ma' mi mulla, vulum aromatna ŋol suwa kaw, hiɗi hiɗiy ma ŋaana kaw. Aromatna ma na' vulum mi mulla Salomon, sa bay vulum mara'a ki kayn nala tuwa.

¹¹ Lumayna vi Hiram ma mar or ay hay Ofir pana, gu-santal ma ay hay Ofir kaw nam maram ŋol suwa, hiɗi hiɗiy ma ŋaana kaw.

¹² Hiɗi gu-santalla, mulla kot liy ma musta hay hay ziyda vi Ma-Vatɗina hiɗi ziyda vi mulla, kot dilla hiɗi difna kaw kay sa gi nulla. Bugolda gu-santalla may co loɗi, ta-ta vaydi kaw nam may loɗi.

¹³ Bugolda mulla Salomon vul mi ca-mulda vi Seba slen ma na' minimna kaf, slen ma na' jobomna kaf, slen ma nam vula'tana kaf ɗek gasi ala nam Salomon mi mul ma asiya.

Farayna vi Salomon

¹⁴ Hay busat kaf kayni, nekka vi ora ma co hay ziyna vi Salomon nam ir talente kis-karkiya hiɗi diram dok-karkiya yam karkiya.

¹⁵ Ma nam ka yawam hay ɓam sum sa co li filiwna, sa co gus slena, (taara) ma muliyan sa Arabiya ka vulum kafna, hiɗi sa guverner hay nagata ka vulumti kaf may ŋaɓay hayɗi.

¹⁶ Mulla Salomon kot maray ma ŋulona kis-ma', nam yoray hiɗi ora. Maray kep kayni, nam yorom hiɗi ora ir Sikel kis-karkiya,

¹⁷ maray hena kis-ɦidi kaw yoray hiɗi ora, kayn di ala maray kep nam kotom hiɗi ora ir kilo kep hiɗi gali, mulla lakam hay ziyda ta nam tuna' semda va' ala «ziyda vi juruta vi Libaŋ».

¹⁸ Mulla kot kuroŋgol ma ŋolla hiɗi siy-slokŋa nam korom tuwam hiɗi or ma bay-rigasna.

¹⁹ Sle ma jik kulo kalamna jakay kay tuwam karkiya, galam ma ŋolla, yalam giy goy danani, ɓalam ka'a hay galam ma' pete, zlon ma' ka ini goboy hiɗi liyn ma ɓalam ka hayna,

²⁰ zlon ka ini doogo yam ma' tam sle ma jik kulo kalamna, hay gal hena, hay gal hena kaw, kuroŋgol ma ki kayn nala bay li hay mul tara tuwa.

²¹ Kaway ma ci niyna vi mulla Salomon kaf koti hiɗi ora, tasana kaf ma ka hay ziyna vi fulda vi Libaŋ koti hiɗi or ma bay-rigasna, ma koti hiɗi dooro mayɗi, hay zamanna vi Salomon kayni, gurjut nisi ɗuwa' ki va ɦawa nala.

²² Kay mulla ka hiɗi lumayna vi Tarsis goloŋ hay niy-lum ma ŋolla, tapay hiɗi lumayna vi Hiram, hay busat ɦidi kaf kayni, lumayna ka coy hay Tarsis pa, nam mar ora hiɗi doorona, siy-slokŋa, viira hiɗi layn-slek-lawna.

²³ Mulla Salomon muɗi ŋolo suw muliyan sa hay nagatna kaf kuɗ farayna hiɗi yalla.

²⁴ Sumun kaf ka gar kay tuɗ ɗuw Salomon kuɗ yalla valam ma ŋolla ma Lawna vulumtina.

²⁵ Gigekaw mar vulda valamu, mar gurjuta hiɗi ora, sligara, sle-ma-duura, aromatna, kulumayna hiɗi kulum-kurona; nisi ka li ki kayn nala hay busat kaf.

²⁶ Salomon tok keke-ma-duura hiɗi kulumayna, keke-ma-duura ka birimi hiɗi kis-fiɗi, sum sa jaŋ kulumay birim doogo yam ma', nam tunsi goy hay hoyok-ziyn kaf ma keken ka tuni haya, lak segen hay Yerusalem goboy talamu may.

²⁷ Mulla muɗ gurjut ki goorhoyon nala hay Yerusalem, gu-gamna nam muɗum dak-dak ki gu-sikomora ma ka wul hay fulda nala.

²⁸ Salomon gus kulumayna valam ay kayni hay Egipte pa, sumuna vi mulla sa li filiwna pat kuɗ tuwsiya, nisi gusumu, pat farana valam ay voksiya.

²⁹ keke-ma-duura ma nisi gusumay hay Egipte pana gusta valam ir Sikel kis-karkiya, kulumna gusta valam ir Sikel kis kalam dok-vasl may, nisi ka naram ki kayn nala kisiya kaw, kay muliyana vi sa Hetna hiɗi muliyana vi Siriya.