1 KORINTENA 2 - BIBALDA TA PELDETTA

Paulus kus yoboyn ala Kristu ɓalay kat gu-ma-grakŋa

¹ Ɓosiyonna, nan kay tuwan kaw, hay li ma nan tuɗis goy vigiya, nan kusgi labara vi Lawn kayni may hiɗi yoboy ma yal ŋolɗi.

² Kay may ŋaa'a kanu kay nan wi va mara'a jargi noŋɗi, may mi Yesu Kristu, Yesu Kristu ma ɓalay kat gu-ma-grakŋa tuta.

³ Namu, hay li ma nan ay jargiya, nan ay hay maŋayta, hay narta hiɗi ɓirta-dikga ŋolo,

⁴ yoboyna vanu hiɗi kusta vanu mi yoboy ma yalla ma vi dik sa ɦawaɗi, may mi ɗek-goyta vi Ŋusta vi gaŋeraŋa.

⁵ Kay vida vigiya ma col kay yalla vi sumunɗi, may kay donota vi Lawna.

⁶ May numa'a di yoboy ma yalla jar sa wulsi vatina, may kayni may mi yalla vi nagat tanɗi, yalla vi muliyana vi nagat tanɗi kaw, kay nisi kaw ma vat goyo.

⁷ Numa kusum kayni mi yalla vi Lawna, ŋayayta ta ay ŋayaya, ta Lawna ŋaɓa' goy kaya jew kotta vi nagata, kay vulay gajijita.

⁸ Va ma muliyana vi nagata kep kaw may wumɗi, kay la nisi wum wiya, nisi as ɓal Bum-Sumuna vi gajijita kat gu-ma-grakŋaɗi.

⁹ May ki ɗo'ay nala: Sle ma ira wiɗi, humda humɗi kaw, Sle ma sa varam hay dikam noŋɗi, Slen kaf ma Lawna kotom kay nisi sa minimna.

¹⁰ May tuma' numa'a Lawna vul slen kayni goy haraŋ hiɗi Ŋusta valamu, kay Ŋusta fek slen kaf, sle ma hay dik Lawna kaw.

¹¹ Jar sumuna, sa ma as kay wi va ma hay sa hena mi gige? May ti ŋusta ta ka hayamta tutaɗi su? Nala kaw sa as wi slena vi Lawnɗi, say Ŋusta vi Lawn kep tuta.

¹² May numa'a, numa may fi ŋusta vi nagatɗi, may numa fa' kayni ti Ŋusta ta may vi Lawna pa, kay numa fi wi slen ma Lawna vul tuma'a kuɗ slugota.

¹³ May numa ka law kayni hiɗi ɓakŋa ma sum sa hay nagat hatamnaɗi, may ma Ŋusta hatamna, kay numa di slena vi Ŋusta goy tam sum sa ka hiɗi ŋusta.

¹⁴ May sa ma ɦawana as vi kuɗ sle ma Ŋusta vi Lawna hatamnaɗi, kay sle namna kiram ɦay-ɦaya, nam fi wumɗi kaw, kay wum cawam kayni hiɗi ŋusta.

¹⁵ May sa ma ka hiɗi ŋusta as kay fek caw slen kafe, nam kay tuwamu sa fekemɗi may.

¹⁶ Kay sa ma wi varta vi Bum-Sumuna a nam fi hatamu mi gige? May numa'a, numa fi varta vi Kristuwa.