Marko 4 - Kyaasa Kiiya

Kyaaso kya mweera mbeu

¹ Nalyo Yesu kapooka lyingyi ilosha akee alya waameu lwa yeeve ilya. Kulya akai vandu vakasha ikuumbya-fo mamwiingyi nniini na kamwi ukee yoo kwaarutu. Nawe katana asaama na efo ngalaveny, kakaa rembo efo yeeveny.

² Nawe kava avaloshany kwa fyaaso. Na elyi eefo aloshaa kaamba ule,

³ “Aranyiny! Akakato nndu mweera mbeu ankwiipoo nandeera mbeu takwe.

⁴ Kikavaany elyi eefo asheeraa, maata tikolooka yoo mbai ya shia, na ndeye tikasha tikalya tikamaa.

⁵ Na tingyi tikooloka ando iwe lyikwaallye efo si kulatiri uteri wiingyi. Nalyo yeni tikamia neelyi uteri lulaanngye si.

⁶ Na elyi mwi wavaa tikaya. Kimmba tilasotye mirarii si, tikauma.

⁷ Na tingyi tikooloka ando a miingeny. Miinga ilya ikarwa ikatisisira tilavike nta kimu.

⁸ Na tingyi tikaoloka ando a uteri usha, tikarwa, tikawongya, tikavika kimu. Yeyo imwi ikavika makumi araru, na ingyi makumi arindaru, na ingyi iyana.”

⁹ Nalyo kaamba, “Nndu atiri maarwi earanya navearannya!”

Kimaruma kya fyaaso

¹⁰ Na elyi akee kyaanya kyakwe muni, valya vanndingitya vakasanga na valya ikumi na vavii vakammbesa kya fyaaso filya.

¹¹ Nawe kavavia, “Yeni mmbo mwaniingwa imanya mbony yeto shirike ta umangyi lwa Iruva. Indi yewo va poo kyawo kyoose mmbo vakyikooya veevywaa fyaaso.”

¹² Naambo, “Ilola valole, valalollyaa. Na yaaranya, vaarannyi valamanyaa. Valasheyaalukya Iruva, vakooye ifwaaywa.”

Yesu atambashwa kyaaso kya mweera mbeu

¹³ Nalyo kavavia, “A elyi mwanra mulamanya kyaaso ekyo, ni inda mumanyaa fyaaso efyo fingyi?

¹⁴ Yeto mweera mbeu ni irero lya Iruva eera.

¹⁵ Na yewo va efo mbai ya shia, ni efo kundo asheraa irero lya Iruva. Nawo wakammaa iita nalyo yeni Satana kasha nau, karakwa-u irero llya lyikee yeere efo miriminy yaawo.

¹⁶ Na kya yewo vakee veere ando iwe lyikwaallye si, kyawo ni kiwo: Vakammaa iita irero lya Iruva, nalyo yeni vakalyilumba na nsia.

¹⁷ Nawo nta valasotye miraari efo miriminy yaawo, mmbo vakee vandu va veru-veru. Elyi numa vakalolya kushe fyuure ao irishiswa kimaruma kya irero lya Iruva. Nalyo yeni vakawonisa nsindara.

¹⁸ Na vengyi ni yewo veere ando a miingeny. Yewo mmbo vandu valearannya irero lya Iruva.

¹⁹ Nalyo ngyusau ta ulana yelu tikaanga-fo na ulembi lweelembwa ni masaa na lango yeto ta findo efyo fiingyi. Nafyo fikasisira irero llya lyilakivike-se kimu.

²⁰ Na yewo veere ando a uteri usha mmbo yewo vashaaranyaa irero lya Iruva vakakyilumba, vakeenda vevikaa fimu, umwi kavika makumi araru, na ungyi makumi arindaru, na ungyi iyana.”

Taa ikee shisikye

²¹ Kawuya kavavia, “A taa mmbo yeendwa indesikywa na nakori ao kitara? Nshi isheendwaa indevikwa ando a yeekyerya taa?

²² Mashika nkwiifo kindo kisurumwaa kire kilamanyika-fo. Nta kulaifo kindo kisurumi kire kilamanyika paa-fo.

²³ Kwakooya nndu atiri maarwi earannya navearannya!”

²⁴ Kawuya kavavia, “Manyiny ekyo mwiifo mushiita-te! Myeesye yaany mwameesya nayo vandu, nnyo musheesywaa muviirywaa na yeengerywa muveengerywa-u.

²⁵ Mashika nndu atiri kindo mmbo aningwaa fingyi. Na nndu nalatiri kindo, na kilya akooya atiri mmbo avekisokwaa.”

Kyaaso kya mbeu imyaa

²⁶ Kawuya kaamba, “Umangyi lwa Iruva shaasa lukai mmbo lwava sha nndu aleenda yeera mbeu efo uteriny.

²⁷ Kava mwiilala na ikwiipoo kio na nsanyiny na mbeu ilya ikamia, ikang'ana, na yeto muni nalamanyi.

²⁸ Uteri yelo lukarosa fimu lo weni. Mmbo lulepooka yeende mikongo, numa fyaa, numa nganu tiinukye efo fyaany.

²⁹ Na kwakooya kimu yekyo kyankwaamba ivira, nalyo yeni karika finndo kimmba kwamfika yoo maveiyony.”

Kyaaso kya mbeu ya karadali

³⁰ Kawuya kavavia, “A nkyokyi umangyi yelo lwa Iruva lushevakaniswaa nakyo ao lulwaallwe kyaaso kyeekyi?

³¹ Mmbo lukee sha mbekye ya Haradali, nndu aleyeera efo sumbai, nayo ikee shidu ikairya mbeu toose teerwa sumbai.

³² Nayo ikamaa yeerwa ikarwa, ikang'annya miri ingyi myoose. Ikaende maramba maniini, ndeye ta efo nginiiu tikatana taidima yookya-fo fifuri fisikywa nkirishe kya vayo.”

³³ Kawoongoya kirero kya Iruva avaviaa fyaaso fiingyi fya ngata yeyo shaasa vaidima yaaranya.

³⁴ Nta nalarere nawo kindo kulaore aveera fyaaso-fo. Lyo valya vakiloshyony veni kavatambashuya fyoose vakee kyaanya kyawo.

Yesu akyeemya uraato uniini

³⁵ Nalyo nkonu ulya mweni elyi kwamiila kavavia, “Ndifony, luruuke na kwakulya.”

³⁶ Nalyo vakasamana na mamwiingyi ulya wa vandu. Vakankamara shaasa eefo efo ngalaveny. Naasa na ngalava tingyi tikavekaa-fo teemwiimmya!

³⁷ Nalyo kukakwiipoo uraato lwa finya lurie mmbwa. Ngalava ilya ikatana yaishwa mura.

³⁸ Nawe muni akee efo taari ya ngalava yoo kwa numa eelele rony aekyerye mboloko yeelaaya nrwe. Nalyo vakamwaanta vakammbia, “Llosha, a mmbo kulasarye elyi lwiifo lusiaa?”

³⁹ Nawe kakwiipoo kakyeemmya uraato lulya kavia yeeve ilya, “Malallya sau!” Nalyo uraato lukasyado, kukava kimammya sau.

⁴⁰ Nalyo kavavia, “A kikyi elyi mukee veerei indo? Kyavaany inda elyi mwatura kyikusiryo?”

⁴¹ Vakatirwa mmbweerei wiingyi, vakaviana, “A nndu yeu mmbwa kwi elyi na uraato lwamwiirikya na yeeve yei?”