Luka 4 - Kyaasa Kiiya

Fyeeso fya Yesu

¹ Naasa Yesu kawuya yuuka kulya Yordani aishwe Mumuyo Mweele. Kanderawa ni Mumuyo wa Iruva neende kulya kasa.

² Kakaa-fo ando a mikonu makumi aana asheswaa ni yeto Nkumbi. Nawe mikonu ilya kasinda nalalye shoonga. Nalyo elyi yansia, katirwa nshaa.

³ Naasa yeto Nkumbi kashembia, “Kwakooya mmbo kukee mwana wa Iruva, via iwe elyi lyaaluke nkate!”

⁴ Yesu kanndouwa, “Mmbo kyikee kireiye kyeamba, ‘Kindo nndu akirya-u nakyo muu nshi shoonga tupu-fo.’ ”

⁵ Nalyo kandensaamisa ando a uuwe kamoora ngyumangyi ta ulana yelu toose sha ikafya lyimwi.

⁶ Nalyo yeto Nkumbi kambia, “Umangyi yelu sanda na usuri lwavayo nkuningaa yewe, mashika ni fyakwa shikee nniingye, neeny nshefikuniingyaa nndu shankunda.

⁷ Naasa neewe kwashoolokya sumbai yoo kisanguny kyakwa mmbo fishevaa fyafo fyoose.”

⁸ Na Yesu kaalwa kammbia, “Mmbo kyikee kireiye kyeamba, ‘Ni Nndumi wafo Iruva mmbwe kushemolokyaa si, nawe mmbwe muni kushemwindyaa.’ ”

⁹ Naasa kawuya inrwaa kulya Yerusalemu kansaleesa alya urorony lwa mmba ya Iruva. Kammbia, “Kwakooya mmbo kukee mwana wa Iruva, kilya si kwauka yaa kukai!”

¹⁰ Mmbo kyikee kireiye kyeamba, “Ashekuvavasyaa vasu vakwe va iruveeu mashika afo, vashekuringa kwaashuke.

¹¹ Nawo vashekukamaraa na mai, neewe kulasheekapa nta urende iwe-u.”

¹² Nalyo Yesu kaalwa kambia, “Mmbo kyikee kyaambe, ‘Nta kulaese Nndumi wafo Iruva!’ ”

¹³ Nalyo yeto Nkumbi kakooya ammarisya fyeeso fyoose, Kammbuka, katevesa mbele.

Yesu apooka mashora kulya Galilaya

¹⁴ Na Yesu kawuya na kulya Galilaya akee mmbikye finya ya Mumuyo wa Iruva. Na kyulaalu kyakwe kyikandekwaana na kulya urukeny lusengetye loose.

¹⁵ Nawe kava mwiilosha efo mmba tawo teterevya eerumishwaa mmbandu woose.

Vamina Yesu kulya Nasareti

¹⁶ Nalyo kasha na kulya Nasareti kundo alelelyo. Kandeanga na efo mmba yeeterevya elyi nkonu wa Sabato shaasa eshivye. Kasalala nandesomya vandu.

¹⁷ Kasheniingyo kitabu kya nkisuku ulya Yesaya. Kakyoororwa kakooya ando akee areiye u-le:

¹⁸ “Ni Mumuyo wa Nndumi ashikaye kimmba aleshaamba mafura shindeongoya vakiva nrumi ya Iruva ya nsia. Kashiruma shindekapya yewo vafinge weele lweelekeyo. Na yewo vafu miso vakooye ilola, indelotora yewo vaondore vave valeke,

¹⁹ indekapa weele lwa mwaaka wa Nndumi usennyi.”

²⁰ Nalyo kaososa kitabu kilya kaviirya yeto mwiifurukanya-fo. Kakaa rembo. Na vandu vakee efo mmba yeeterevya woose vakammbikya miso swaa.

²¹ Naasa kapooka ivavia, “Ekyo kyikee kireiye kyaamba indo, ni inu kyammiinukya kyikamwaanga maarwiny any.”

²² Nalyo vakandumisha woose vakasongololo kya marero alya asennyi indo auka efo kaniny kakwe. Vakaamba, “A yeu nshiwe mwana wa Yosefu?”

²³ Nawe kavavia, “Mmbo shiishi deny musheshiviaa, ‘Kukee mwaanga kukire kumuni! Findo lwiitye fyambutika kulya Kapernaumu kyevefitani na kunu kweru fyoose kunu muriny kwafo.’ ”

²⁴ Kawuya kaamba, “Ni kya dede shamuvia, nndu nkisuku mmbo ashiirikyoo koose kuutaa efo kundo alewonikya.

²⁵ Nkya dede shamuvia, kweefo vaka va ding'u veengyi kulya Israeli fyeeri filya fya Elia llya meendi efo iruveeu kuleraya ando a myaaka iraru na miiri irindaru, uruka lukatana lwawoywa nshaa shiniini nnu.

²⁶ Nta umwi waawo Elia alerumwa kwakwe-fo, kulaore ni kulya kwa nka ulya wa ding'u ekee kulya Sarepta kulya urukeny lwa Sidoni.

²⁷ Kukavekaa-fo vandu va ivave veengyi kulya Israeli meendi alya a nkisuku ulya Elisa. Nawo nta umwi waawo alewona yeeremutwa-fo kulaore ni Naemani, nawe ni nndu wa kulya Siria.”

²⁸ Nalyo valya vakee efo mmba yeeterevya elyi veeta arera indo vakatirwa ni unyafi woose.

²⁹ Vakakwiipoo vakankilyisa vakanfita kulya kwakulya ya muri wawo. Vakanrwaa alya ifumbu-u masasa, kulya kundo muri ulya wawo ukee ntannyi naambo vakooye imwoolota nang'u.

³⁰ Nawe kaira efo nnang'ani yaawo vyaa kakweengya.

Nndu atirwa mmumuyo nkasha

³¹ Nalyo kandesoka na kulya Kapernaumu. Nato ni muri wa kulya Galilaya. Kava mwiivalosha elyi mikonu ya Sabato.

³² Nawo vakaising'ang'a kya miloshye yakwe, nyeli arera kyikee na ushilyi.

³³ Nalyo efo mmba yeeterevya eefo nndu atirwa mmumuyo wa utefusu. Nawe kafua na unyanga lwa finya.

³⁴ Kaamba, “Sha! Nkyiki kyeru na yewe Yesu wa Nasareti? Mmbo kusheye ilurumataro! Neeny shikwiishi, Yewe ni yeto Mweele wa Iruva!”

³⁵ Nalyo Yesu kankyeemya kaamba, “Malallya sau kummbuke!” Nalyo mumuyo ulya nkasha ukantuula si yoo nnang'ani yaawo ukammbuka, nta ulammanyi furu-fo.

³⁶ Vakatirwa ni mwising'ang'o woose, vakava vaumburanaany, vakaamba, “A kirero ekyo nkya ngata-kyi? Ate arera kikee na ushilyi na wiidimi kyevavasa mimuyo yeyo ya utefusu, nayo ikauka-fo.”

³⁷ Nalyo mbony takwe tikaenda ikwaana kundo koose kulya urukeny lwa kufii.

Yesu ashiisa mamwiingyi wa vandu

³⁸ Naasa kasomuka efo mmba yeeterevya kandefika kulya mmba kwa Simon. Naasa mayaanka wa Simon etirwa mmuro mwiingi. Vakantereva naambo nanshiise.

³⁹ Nalyo kasha nang'u kakwiinyika yoo akai kakyeemmya muro ulya. Nato ukammbuka. Naasa kyaangu nakyo kakwiipoo kavafurukannyany.

⁴⁰ Naasa elyi mwi wiifo ushoolokaa kakooya asheywa ni valya woose vatiri vandu valwee ndwari shive na shive, vakamweenngye. Nawe kaveekerya maako wo nndu umwi umwi shaasa veiyo kavakira.

⁴¹ Naasa veengyi vakookwa ni mimuyo mikasha, ikafua ishaambaa, “Yewe mmbwe Mwana wa Iruva!” Nawe kaikyeemya nta nalailekeye ikarera, kimmba imwiishi we mmbwe Kristo.

Yesu akeelosha kulya Yudaya

⁴² Naasa elyi kwankya kakwiipoo keenda kundo kulalelwa. Nalyo vandu valya vakuumbye-fo mamwiingyi vakava vannduya-ruyaany. Vakafika kulya akai. Vakakunda intira nalavauke-se.

⁴³ Nawe kavavia, “Kuti shindefika na miriny yeyo ingyi shindeongoya vandu nrumi ya nsia yeyo ya umangyi lwa Iruva, mashika nkyo kindo shilerummyo.

⁴⁴ Nalyo kava mwoongoya vandu mbony efo mmba tawo teeterevya ta kulya Galilaya.”