1 Yohane 4 - Kyaasa Kiiya

Mumuyo wa Dede na wa Wongo

¹ Nyira vakunde vakwa, mulairikye wo nndu-fo, lyo eseny wo ngata ya nndu kwakooya yauka kwa Iruva ao oode. Mashika vakisuku va wongo veengyi mmbo valenkwipoo ulaniny.

² Kikeeny indo lyo mwiishi efyo fya Mumuyo wa Iruva; wo mumuyo yeto ashambaa paa sheelyi Yesu Kristo mmbo alesha akee na mwiili nkwa Iruva wauka.

³ Na wo mumuyo ulashiirikya Kristo mmbuukye kwa Iruva-fo. Na yeto nto mumuyo wa mwiilema Kristo yeto muleita mbony ta vayo sheelyi usheshaa, na ulaalu wiifo ulaniny.

⁴ Yeni fivana fidu, mmbo muukye kwa Iruva; na yeni mukavavinga, mashika yeto akee nnang'ani yaany mmbo ailanyi yeto akee ulaniny yelu.

⁵ Yewo ni va ulana, nkyo mmbo varera fya ulana, na ulana lukavaaranya.

⁶ Yese mmbo luukye kwa Iruva. Yeto eeshi Iruva mmbo alwaaranya yese, na yeto nalaukye kwa Iruva nnyalwaranyaa-fo. Kimaruma kya efyo mmbo lwamanya Mumuyo wa dede, lukavemanya na mumuyo wa ureti shaasa akai.

Iruva ni Ukundi

⁷ Vakunde vakwa, lukundani; mashika ikunda nkwa Iruva lyuukye, na yeto mwiikunda moose mmbo awonikye efo kwa Iruva kavemanya na Iruva.

⁸ Yeto nalakundaa vengyi nnyeeshi Iruva-fo, mashika Iruva ni Ukundi.

⁹ Kimaruma kya efyo Ikunda lya Iruva mmbo lyilelollyo kweru, kyeyaamba Iruva mmbo aleruma Mwana wakwe wa ngitany ulaniny, naambo luwoni muu kyuuka nawe,

¹⁰ Na ukundi weni llo elu, nshi yese lulekunda Iruva-fo, mmbwe alelukunda yese, katana aruma Mwana wakwe naambo ashelusanda nawe elutaa ulyamariny.

¹¹ Vakunde vakwa, kwakooya Iruva alelukunda indo, mmbo kilukooye neese lukundani.

¹² Nkwiifo nndu alellollya Iruva nta lyimwi-fo, kwakooya lwakundana, Iruva mmbo akaa nnang'ani yeeru, na ikunda lyeru lyikasongovika nnang'ani yeeru.

¹³ Kimmba ni indo mmbo lumanyaa mmbo lukee nnang'ani yakwe, nawe kakaa nnang'ani yeeru, kimmba alwaakanisa Mumuyo wakwe.

¹⁴ Neese mmbo lwallollya na ikureekya sheelyi we Nde mmbo aleruma Mwana wakwe nave Mwikira wa ulana.

¹⁵ Wo nndu airikya sheelyi Yesu ni Mwana wa Iruva, Iruva mmbo akee nnang'ani ya nndu yeto, nawe kakaa nnang'ani ya Iruva.

¹⁶ Neese mmbo lwammanya ikunda lya Iruva kweru yese na ilyirikya. Iruva ni Ukundi; na yeto akaa na ukundi mmbo akaa nnang'ani ya Iruva na Iruva kakaa nnang'ani yakwe.

¹⁷ Kimmba ni indo ukundi mmbo lwansongova kweru, naambo luwoni ukaari nkonu yeto wa mwaandu. Mashika, shaasa we akai, ni indo neese luwekai yaa ulaniny elu.

¹⁸ Nnang'ani ya ukundi nkwiifo weerei-fo, mashika ukundi lusongovye mmbo lweeraa weerei poo. Mashika weerei mmbo luriani na usakiro, na yeto akee mwerei nnyalesongovika kya ukundi-fo.

¹⁹ Yese mmbo lukundaa vengyi mashika elyi we alelava ilukunda yese.

²⁰ Kwakooya nndu aamba, shikundye Iruva, lyo kakaa esuuye mwanamaye, mmbo akee mwoongo; mashika nndu nalakundaa mwanamaye allollye, nnyashiidimaa ikunda Iruva nalallollye-fo.

²¹ Ivavaso lukee vaniinge mmbwe llyo elyi, lya yaamba sheelyi yeto akundye Iruva, navekunda na mwanamaye.