1 Yohane 3 - Kyaasa Kiiya

Vana va Iruva

¹ Loleny-te, shaasa Nde aleloora ikunda lying'ani, yese lukooye ivaangwa vana va Iruva; neese ni indo lukai. Lyo nta ulana llulelumanya-fo, shaasa lulera lulammanya We.

² Vakunde vakwa, ulaalu mmbo lukee vana va Iruva, na nta nkyalemanyika shaasa lushevaa-fo; lyo lwiishi, elyi ashelollywa paa, mmbo lushevaa sha we, mashika mmbo lushellollyaa shaasa akai.

³ Na wo nndu avikye nsia indo mmbo akwiilyisaa, shaasa we avekee mweele.

⁴ Nndu mwitana ulyamari mmbo ava llyang'a, mashika ulyamari ni ulyang'a.

⁵ Na yeni mwiishi mmbo alelollywa paa naambo naute ulyamari, mashika nnang'ani yakwe nkwiifo ulyamari-fo.

⁶ Yeto moose akaa nnang'ani yakwe nnyatanaa ulyamari-fo, yeto mwitana ulyamari nnyalellolya-fo, nta nnyalemwirikya-fo.

⁷ Vana vadu, loleny kulave nndu amulemba, mwitana usumanu mmbo atiri usumanu, shaasa we akee wa usumanu.

⁸ Mwitana ulyamari ni wa Satana; mashika Satana ni mwitana ulyamari uka elyo mapookyony. Nkyo kileende Mwana wa Iruva kasheorwa paa naambo nasherumata mashora a Satana.

⁹ Wo nndu akee mwiire ni Iruva nnyatanaa ulyamari-fo, mashika yewo wakwe mmbo vakaa nnang'ani yakwe; nta nnyashidimaa itana ulyamari-fo mashika mmbo awonikye kyuuka na Iruva.

¹⁰ Kimaruma kya ekyo vana va Iruva mmbo vamanyikye paa, na vana va Satana kiwo. Nndu moose nalatanaa fya usumanu nnyaukye kwa Iruva-fo, nta yeto nalakundye mwanamaye.

Kundaniny

¹¹ Mashika ekyi nkyo kindo muleita uka mapookyony, kya yaamba lukundani luveni na veni.

¹² Nshi sha Kaini alekaywa ni nravi ulya, kawaa mwanawo-fo. A mmbo alemmbwaa kimaruma kyeeki? Mmashika elyi mashora akwe ekee maravi, na alya a mwanawo akava a usumanu.

¹³ Vanavama, mulasheifulukywa kwakooya ulana lwamuswa.

¹⁴ Yese mmbo lwiishi mmbo lwambuka ufuny lukaanga muuny, mashika elyi lukundye vanavama veru. Yeto nalakundaa mmbo akaa ufuny.

¹⁵ Wo nndu mwiswa mwanamaye mmbo akee mwiiwaa, na yeni mmbo mwiishi ninsha sheelyi mwiiwaa nnyatiri muu wa llung'anu nnang'ani yakwe-fo.

¹⁶ Yaa nng'u lwamannya ikunda, mashika we mmbo aleniingya-u muu wakwe kimaruma kyeru, neese mmbo kilukooye luniingye muu weru kimaruma kya vanavana veru.

¹⁷ Naasany, kwakooya nndu atiri kindo kya ilya, kawuya ilollya mwanamaye ekee nting'i nishoonga nawe kara nalallyillya, a ndesa ikunda lya Iruva lyiiyo kwa nndu yeto?

¹⁸ Vana vakwa vadu, lulakunde na marero-fo nta na ulumi-fo, lukunde kya dede na itana indo.

Usongovisi lweru mbee ya Iruva

¹⁹ Findony fya ngata yeyo llyo lumanyika lukee va dede, na mirima yeeru ikooye iviirywa muu yoo kwakwe.

²⁰ Kwakooya mirima yeeru ikee ilusakira; mashika lyo Iruva mmbo ang'annyi mirima yei yeeru nawe mmbo eeshi fyoose.

²¹ Vakunde vakwa, kwakooya mirima yeeru ilakee ilusakira, mmbo lutiri ukaari efo kwa Iruva.

²² Na ekyo kyoose lukiterevaa, mmbo luwaryaa kwakwe, kimmba lwalatya mavavaso akwe.

²³ Elyi llyo ivavaso lyakwe, luvekusirye na irina lya Mwana wakwe we Yesu Kristo, na ikundana luveni na veni, shaasa aleluvavasya.

²⁴ Na yeto mwiringa mavavaso akwe mmbo akaa nnang'ani yakwe, nawe Nndumi kakaa nnang'ani yakwe. Kimaruma kya efyo mmbo lwiishi mmbo akee nnang'ani yeeru kwi Mumuyo yeto aleluniinga.