1 Yohane 1 - Kyaasa Kiiya

Irero lya Muu

¹ Kilya kyeifo uka mapookyony, kilya lulekiita na ikilollya na miso eru, na maako eru akakiwarawara, kya mbony ta irero lya Iruva lya muu;

² (mmuu ulemmaa ilollywa paa, neese lukalollya lukavevikya-u ukureekyi, na imoongoya yeni mbony ta muu wa llung'anu ukee kwa Iruva Nde, ukalollywa paa kweru).

³ Ekyo lulekilollya lukavekiita mmbo lwamoongoya na yeni, naambo na yeni mukooye yaakana neese, na yaakaniswa lyeru ni ando amwi na Nde na Mwana wakwe Yesu Kristo.

⁴ Neese mmbo lwareiya efi, naambo ifura lyeru lyikooye iinutywa.

Iruva ni sa

⁵ Na yei nnyo mbony luleiita kwa Nndumi weeru, lukamwoongoya, sheelyi Iruva mmbwe sa, nta ireema llyishidimaa ikaa kwakwe-fo.

⁶ Kwakooya lwaamba luke yaakana nawe, lyo lukaengera ikaa ireemeny, mmbo lwaamba wongo, nta llwatana ekyo kikee kya dede-fo;

⁷ lyo kwakooya lweenda seny, shaasa we Nde akee seny, mmbo lushiitanaa luveni na veni, na samu ya Yesu Mwana wa Iruva mmbo yalusangya ulyamari loose.

⁸ Kwakooya lwaamba llutiri ulyamari mmbo lwakulemba luveni, nta dede nnyikee nnang'ani yeeru-fo.

⁹ Lyo kwakooya lwakurya ngyulyamari teru. We mmbo akee nsaari na wa usumanu natani alusarya ngyulyamari teru na ilusangya uravi loose.

¹⁰ Kwakooya lwaamba llutiri ulyamari, mmbo lwamwaallwa we mwoongo na nta irero lyakwe lyikee nnang'ani yeeru-fo.