YUUKA 40 - BIBILLYA Mareiyo Meele a Iruva

Yeesa Yeema lya Nndumi na ilyivika Yeele

¹ Nndumi Iruva karera na Mose kammbia,

² nkonu wa mbee wa mwiiri wa mbee mmbo kushesaleesaa yeema yelyo lyekwanannya.

³ Neewe kuvikefo isanduku llya lya ukureeki neewe mmbo kulyiringitya nisha na ipasia.

⁴ Neewe kweende mesa kuyaate-u neeka nisha findo filya yoo uwe kuveende na nri wa taa, kwaate taa ta vayo.

⁵ Neewe kusaleese kitara kilya kya saabu yeevika nrungo wa nsu yoo mbee ya isanduku lya ukureeki neevika isullya yoo mwaangony wa ando yoo eele.

⁶ Numa kuvike kitara kyerasya firaso yoo mbee ya mwango wa ando yoo a yeema lyekwarannya.

⁷ Numa kuvike birika yoo nnang'ani ya yeema yelyo na kitara kyerasya, kuvikefo mura.

⁸ Numa kuringitye kari koose, na inunuta-u utore lwa mwango wa kari.

⁹ Numa kwipoo mafura yoo a yaamba, neerika mafura yoo ando eele, na wo kindo kikee efo mmba, na iivika sheele, na fiiya fya vayo fyoose, nayo ishevaa sheele.

¹⁰ Numa kushevika mafura yoo kitareny kyerasya, na fiiyaa fya vayo fyoose, na yeeremuta kitara ekyo, na kitara ekyo mmbo kishevaa kyeele nnu.

¹¹ Numa kwaambe birika mafura na kirembo kya vayo, na ifivika fyeele.

¹² Numa kweende Aron na vana vakwe yoo mwangony wa yeema elyo lyekwanannya, neewe kuvasangye na mura.

¹³ Naasa kuvike Aron masara yoo meele, kumwaambe mafura, neemmbika mweele, naambo nashirunndye ishoreny lya ukohani.

¹⁴ Numa kweende vana vakwe neevavika kansu tawo;

¹⁵ nawo kuvaambe mafura indo shaasa kwaamba nde yaawo naambo vashirunndye efo ishoreny, lya ukohani; na yaambwa mafura elyo mmbo kushevaa ni ukohani lwa llung'anu efo marikeny awo moose.

¹⁶ Mose katana efyo fyoose, shaasa Nndumi Iruva alembavavasya niindo alevetana.

¹⁷ Kwikifika mwiiri wa mbee wa mwaka wa kavii, nkonu wa mbee wa mwiiri yeema elyo lyikasaleeso,

¹⁸ Mose kasaleesa yeema, kavika firembo fya vayo, kasaleesa maboo a vayo na mbambo ta vayo, kasaleesa ngo ta vayo.

¹⁹ Kalambara yeema uwe ya ando yoo, kavika kifiniko kya yeema uwe ya vayo shaasa Nndumi Iruva alevavasya Mose.

²⁰ Kaiboo maboo alya avii kavika efo isandukuny, keepo firi filya fya yiipoyo isanduku kavika kitima kyesarya yoo uwe ya isanduku;

²¹ Naasa kaiboo isanduku lya numa kalyivika efo Yeeminy, kalyiringitya na ipasia; shaasa Nndumi Iruva alevavasya Mose.

²² Kavika mesa yoo yeemeny lyeekwanannya, taari ya yeema yeelollye ndoo, efo poo ya isullya.

²³ Kavikau mikate ilya yoo uwe mbee ya Nndumi Iruva; shaasa Nndumi Iruva alevavasya Mose.

²⁴ Numa kavika nri ulya na taa efo mmba ya yeema lyekwanannya, kufii na mesa taari ya sinde ya ando yoo.

²⁵ Numa kaata taa eto mbee ya Nndumi Iruva, shaasa Nndumi Iruva alevavasya Mose.

²⁶ Kavika mesa yeyo ya sahabu efo yeemeny lyekwanannya yoo mbee ya isullya.

²⁷ Kakora miri ya nrungo nsha, shaasa Nndumi Iruva alevavasya Mose.

²⁸ Kavika ipasia lya mwango wa Yeema yeele,

²⁹ kavika kitara kyerasya kya firaso fyekora na muro, kavika-u kyekora yoo uwe ya vayo, na kiraso kya nswa; shaasa Nndumi Iruva alevavasa Mose.

³⁰ Kavika ipenselyi yoo nnang'ani ya yeema na kitara kyerasya, kavika-fo mura wekusangya.

³¹ Mose na Aron, na vana vakwe vakasangya-fo maako awo na marende awo;

³² kyeeri valeanga yeemeny yeele, na llya valefika kufii na kitara ekyo kyerasya, mmbo valekusanngya shaasa Nndumi Iruva alevavasya Mose.

³³ Kasaleesa isimamba wa kari iringitya ando yoo na kitara kyerasya kaekyerya isullya llya mwango wa kari eko. Naasa Mose kamarisya ishora lyakwe.

Ifishi Uwe ya Yeema Yeele lya Nndumi

³⁴ Nalyo ifishi lya lyisikya Yeema lyekwanannya, kukalollywa na yiishurwa-fo itumbe lya Nndumi Iruva.

³⁵ Na kimaruma kya vayo Mose nnyeedima yaanga efo Yeeminy-fo.

³⁶ Nalyo ifishi lyimuuka-u yoo Yeeminy llyo Vaisraeli vekeyiidima yiipo kyaaro.

³⁷ Kyeeri kyoose mmbo vekeereya kutani ifishi lyeepowa-u veedimi yeenda na mbee kyeeri kya nsanyuny na

³⁸ Kyeeri kilya kyeraa-raa kulya kasa kyuumu mmbeshiidimaa ilellya itumbe lya Iruva kulya Yeemany kyeeri kya nsanyiny na muro ukeenuka kyeeri kya kio.