YUUKA 34 - BIBILLYA Mareiyo Meele a Iruva

Maboo a Kavii a Mawe

¹ Naasa Nndumi Iruva kavia Mose, Basha maboo avii a mawe avakye alya a mbee neeny nshereiyaa yoo maboony yoo marero alya ekee maboony alya a mbee alya kuleababara,

² ngama kukooye kwammaa yaadeesya, na ngama yeyo kusaame na kunu ifumbuny lya Sinai, kushe kwakwa kunu urorony lwa ifumbu.

³ Kulave nndu asaama neewe, nta kulave nndu alollyo ando koose kunu ifumbuny-fo nta moonri ao ng'umbe tilaiswa yoo mbee ya ifumbu-fo.

⁴ Nawe kabasha maboo avii avakye alya a mbee; na Mose kakwiipoo ngama nraaasi, kasaama ifumbuny lya Sinai, shaasa Nndumi Iruva alembavasya, keenda eerye maboo yoo avii efo wokony lwakwe.

⁵ Nndumi Iruva kaoloka akee efo ifishiny, kasalala-fo nawe kavambisa irina lya Nndumi Iruva.

⁶ Nndumi Iruva keera mbee yakwe, kafua, Nndumi Iruva, woi Nndumi Iruva wa isarya muni ilyilya, nalakee mwaangu irooyo ni ngoo, mwisarya na wa dede,

⁷ mwilyilya vandu vakwe fiku na fiku, mwisarya ukasha na uravi na ulyamari, nta nalakee mwekennya nndu nravi sheelyi nnakee mwirenga mwitaiya vana ulyamari lwa vandeye, na vana va vana vawo-da, fika irika lya kararu naa llya kaana.

⁸ Mose kaangusya kafiikya nrwe fika si kafiirya ndi.

⁹ Kaamba, “Kwakooya ulaalu shambona ikiiyo efo usanguny lwafo, woi Nndumi Iruva shakutereva woi Nndumi enda neese, mashika eva ni vandu vatiri singo shuumu; kulusarye uravi lweru na ulyamari lweru, kuluvike luve dingu yafo.”

Kyaasa Kyavikwa Wiyya

¹⁰ Kaamba, “Lola nshevikaa kyaasa; mbee ya vandu vakwa woose mmbo nshetanaa ngyende, ilandetanyike ulaniny koose, nta kwa ufyari lwa vandu vengyi woose, na vandu woose yewo kukee nawo vashelolyaa mashora a Nndumi Iruva, mashika ni irero iniini nshekutannya.”

¹¹ Ringa irero elyi shikuvavasya inu, lola yoo mbee yafo shuumbuteu Mwamori, na Mkanaani, Mhiti, na Mperizi na Mhiti na Myebusi.

¹² Kukwiise kumuni kulashelya na vandu va uruka elo efo mukeenda ilasheeva nsindara kwafo.

¹³ Kyeendi kushesambwaa fitara fyawo fyerasya, neefisha fisha ngo tawo, neemamanya maruva awo a kyika Ashera.

¹⁴ Mashika nkivaa kwiinndye Iruva lyingyi-fo, mashika Nndumi Iruva yeto irina lyakwe lyikee ni wa kififi, ni Iruva atiri kififi.

¹⁵ Kulalye mma na vandu va uruka elo-fo, vandu vandetuusa na maruva awo na iyuutya firaso nndu nakuvaange kundelya kiraso kyakwe.

¹⁶ Koorise vana vafo sambura ta efo, na sambura tawo vashetana utuusi na maruva awo, na yoomwa vasero vatane indo na maruva awo.

¹⁷ Kulakusongosye maruva a yeeta na muro.

¹⁸ Suku kuu yeyo ya mikate ilakee mitarang'e mmbo kusheitiraa, mmbo kusheilyaa mikate ilatiri ntarang'o ando a mikonu mfungare, shaasa shilekuwavasya, fyeeri filya fya kyaasa, llyo mwiiri wa Abibu, mshika mmbo kuleuka Misri mwiiri yeto wa Abibu.

¹⁹ Ekyo kyoose kipooka iwonika nkyakwa, vana va kyuumi na findo fyevikya fyoose fya kyuumi fya ng'umbe na moonri.

²⁰ Na yekyo kibookye iwonika kya nshungu mmbo kushekiwouwaa na ngurana ya suva; kyeendi kwakooya kulakunndye ikiwouwa, mmbo kuufisha singo. Vana vafo vavee woose mmbo kushevauwaa. Nta nkwifoo nta umwi asheshaa mbee yakwa na maako aruu-fo.

²¹ Mmbo kurundaa mashora ando a mikonu irindaru na yoo nkonu wa mfungare mmbo kushiimuyaa, kyeeri kyeerema nrema, na kyeeri kya yuulula-da, mmbo kushiimuya.

²² Neewe mmbo kushetiraa suku kuu ya fimu, nayo ni ya fimu fya mbee fya nganu na suku kuu yeesanyirya findo fya masiiyony a mwaaka.

²³ Kararu wo mwaka mmbo kushaa mbee ya Nndumi Iruva, Iruva wa Israeli.

²⁴ Mashika yeny nshoombuta ngyiufyari ta vandu mbee yafo, na yeenngera uruka lwafo, na nkwifoo nta nndu umwi ashelangaa uruka lwafo-fo, kyeeri ekyo kusherwaa indefika mbee ya Nndumi Iruva wa Iruva wafo-fo kararu wo mwaka.

²⁵ Kulasheende samu ya kiraso kyakwa ando amwi, na nkate utiri ntarango'fo, na kiraso ekyo kya suku-kuu ya pasaka ilalale fika elyi lya ngama-fo.

²⁶ Fimu fya mbee fya firaso fya mbee fya uruka lwafo mmbo kufyendee na ifivika mmba ya Nndumi Iruva we Iruva wafo. Kulakorye nyama ya mburu maleleny a maye.

²⁷ Nndumi Iruva kavia Mose, “Reiya marero yaa; mashika yeny shammbika kyaasa neewe na ndo amwi na Israeli, kunu marerony yaa.”

²⁸ Nawe mmbo ekee na Nndumi Iruva ando a mikonu makumi aana kio na nsanyiny, nalakomba kyenga nta mura. Nawe kareiya efo maboony yoo, marero yoo a kyaasa ng'ngu mavavaso yoo.

Mose Ooloka Ooka Ifumbuny lya Sinai

²⁹ Naasa kyeeri Mose aleoloka ifumbuny lya Sinai, na maboo alya avii efo wokony lwakwe Mose, kyeeri aleoloka, efo ifumbuu, Mose nnyalemanya sheeli kisangu kyakwe kyekeemika-fo, mashika llya Iruva alerera nawe.

³⁰ Naasa kyeeri Aron na vana va Israeli valelollya kisangu kya Mose, ate mmbo kikeemika, nawo vakeereya inserikya.

³¹ Mose kavavaanga, Aron na vamiku woose va ironda lyilya vakammbuiya, lyo Mose karera nawo,

³² Naasa llyo vana va Israeli vakasembeya kufii, kabooka ivaongoya mbony toose Nndumi Iruva alemmbia kulya ifumbuny lya Sinai.

³³ Na Mose llya alemaa irera nawo kasikya kisangu kyakwe na soori.

³⁴ Naasa wo kyeeri Mose aleenda irera na Nndumi Iruva kautaa soori ilya kutani aukafo, kaukau kandevia vana va Israeli marero moose alevio.

³⁵ Vana va Israeli vakalollya kisangu kya Mose mmbo kikee mika, naasa Mose kavikau lyingi soori, fika kyeeri ashereraa lyingyi na Iruva.