YUUKA 33 - BIBILLYA Mareiyo Meele a Iruva

Nndumi Avia Vana va Israeli Vooke Ifumbuny lya Sinai

¹ Nndumi Iruva karera na Mosee, kammbia, “Kyasia, ukeny yoo, yewe na vandu yewo kulevasaamisa vauke Misri, veende urukeny elo shiledeerya Abrahamu na Isaki na Yakobo llya shileamba, ufyari lwafo nsheluniingaa uruka elu;”

² neeny nsherumaa nsu nakwiirye mbee, neeny nsheumbutaa Mkanaani, na Mwamori, na Mhiti, na Mperizi na Mhivi na Myebusi,

³ vashekooya uruka lualiwali malela na ukyi, mashika yeny nshishendaa neeni-fo, mashikeelyi mukee vandu vatiri singo shuumu, naambo shilashemurumata efo shia.

⁴ Kyeeri vandu valeita mbony eto shikasha vakaiya kulakaefo nndu araa kindo kyakwe kisha.

⁵ Nndumi Iruva kavia Mose, via vana va Israeli Eni mmbo mukee vandu vatiri singo shuumu, shaamba ni ikaa neni ando a kivero, mmbo nshemumamitaa moose, kyasia ulaalu kuuteny findo fyany fisha naambo shimanyi kindo nshemutanyaa.

⁶ Naasa vana va Israeli vakakuuta findo fyawo fisha, kupookya alya ifumbuny lya Horebu neefo kwa mbee.

Ando Yeema lya Nndumi Lyikai

⁷ Nawe Mose eshivye iiboo yeema lyilya neelyivika poo kwaasha na ulale, kulyivaanga ni yeema lyekwanannya. Na kyikava wo nndu etinnywa nkindo efo kwa Nndumi Iruva, kakwipoo kafika yoo yeemeny lyekwanannya, yoo kipoo ya ulale,

⁸ Naasa llya Mose alekupoo neeny yeema lyilya, vandu woose vakasalala, wo umwi yoo mwangony wa yeema lyakwe, vakavikya Mose miso kutani asiiyo efo yeemeny yeele.

⁹ Naasa Mose ekyaanga-fo na ngo ilya ya ifishi ikaoloka, ikashesalala yoo mwangony wa yeema llya, nawe Nndumi Iruva karera na Mose.

¹⁰ Vandu woose vakalollya shaasa ngo ilya ilesalala alya mwangony wa yeema, vandu woose vakafirya ndi, wo nndu shaasa ekee yoo mwangony wa yeema lyakwe.

¹¹ Nawe Nndumi Iruva karera na Mose kisangu kwa kisangu shaasa nndu arera na mbuya yakwe. Numa kawuya neefo ulaleny, kyeendi nndundi wakwe we Yosua, mwana wa Nuni, nsero nkoo, we nalasomuke yoo yeemeny.

Kyaasa kya Iruva Ikaa na Vandu Vakwe

¹² Mose kavia Nndumi Iruva, “Lola mmbee, mmbo kuleshivia, Iboo vandu yeva da, lyo nta kulashivie nndu kukeenruma neende neeny, lyo kwashivia, shikwiishi irina lyafo, neewe mmbo kwambonisa ikiyo yoo mbee yakwa.

¹³ Naasany shakutereva, kwakooya shambonisa ikiiyo yoo mbee yafo kushoore shia tafo, naambo shiidimi ikumanya, naambo shiwone ikiiyo yoo kwafo, kushekumbwaa sheelyi vandu yeva mmbo vandu vafo.”

¹⁴ Kammbia, “Yeny shimuni nshendaa neewe, neeny nshekuviirya muu.”

¹⁵ We kammbia, “Kisangu kyafo kilammenda neese, kulasheluuta yaafo.

¹⁶ Mashika mmbo kishemanyika inda kushikiiye, yeny na vandu vafo? Nshi kimaruma kya elyi kukeenda neese-se, kutani yeny na vandu vafo lwarauwa na vandu vengyi woose yewo vakee ulaniny?”

¹⁷ Nndumi Iruva kavia Mose, neeki kwakyaamba nshekitanaa-da, mashika elyi kwambona ikiiyo yaa kwakwa, neeny shikwishi irina lyafo,

¹⁸ nawe kammbia, “Shakutereva kushoore itumbe lyafo.”

¹⁹ Kammbia, “Usha lwakwa loose nshelwiitaa yoo misony afo, neeny nshevambisaa irina lya Nndumi Iruva mbee yafo, neeny nshelyillyaa yeto shankunda inlyillya, neekiiya yeto shankunda inlyillya, neekiya yeto shankunda inkiiya.”

²⁰ Keengera immbia, “Nkushidimaa ishilollya kisangufo, mashika nkwiifo nndu wa vandu ashidimaa ishilla na miso nawuye ikaa na muu-fo.”

²¹ Nndumi Iruva kammbia, “Lola, kuiyo ando yaa kufii neeny, yewe salala uwe ya isimamba;”

²² naasa kyeeri itumbe lyakwa lyikeeyira, mmbo nshekuvikaa yoo yaangeny lya isimamba shikusikye na kidau kyakwa kutani shamaa yiira;

²³ numa shuuteng'u woko lwakwa, kushilollye efo kwa numa llyo kisangu kyakwa nkilolywa-fo.