YUUKA 32 - BIBILLYA Mareiyo Meele a Iruva

Ngashe ya Saabu

¹ Naasa vandu vekilollya Mose ankyeeyo yooloka kulya ifumbuu, vakakusanyirya vakasora Aron, vakammbia, “Kyasia, nnde lusongosie maruva ashe lwiryaa mbee, mashika Mose yeto aleluuta urukeny lwa Misri llwiishi kindo kyankooya-fo.”

² Aron kavavia, “Uteny filero efyo fya saabu fikee efo maarwiny a vaka vany na vana vany musheengye.”

³ Vandu voose vakafisha filero fya sahabu efyo fyekee efo maarwiny awo, vakeengye Aron,

⁴ kafiwarya fyuuka maakony awo keeta na muro, kasongosya na patasi kasongosia ifwanu lya ng'ashe, nawo vakaamba, “Yoo ng'u maruva afo Ewe Israeli, alekuuta kulya urukeny lwa Misri.”

⁵ Kikiva indo Aron katana kitara kyerasya yoo mbee yakwe, karera kaamba, “Ndesi ishevaa suku-kuu nniini ya iinndya Nndumi Iruva.”

⁶ Vakakwipoo elyi lya ndesi ngama shuru, vakauta firaso, vakeende firaso fya ufoo, vandu vakakaa rembo vakalya neena vakafina mbasa.

⁷ Nndumi Iruva kavia Mose, “Kyasia, oloka, mashika vandu valya vafo kulevauta kulya Misri ekawo vankutefusa wo veni;

⁸ mmbo vanreka uviny vakara shia ilya shilewoora, ekawo vankusongosia ngashe ya yeeta na muro vakayiinndya na iyuutya firaso, vakaamba, ‘Yoo ng'u maruva afo, ewe Israeli, alya alekuuta kulya urukeny lwa Misri.’”

⁹ Lyingyi Nndumi Iruva kavia Mose yeny mmbo shallola vandu yeva shalollya dede mmbo vatiri singo shuumu (mirima myuumu),

¹⁰ naasa ulaalu shira, naambo unyafi lwakwa, lukooye yaaka uwe yaawo, shivamamite, neeny nshekuvikaa yewe kuve ufyari uniini nnu.

¹¹ Mose katereva nnu Nndumi Iruva, Iruva wakwe kaamba, Nndumi Iruva, Nkiki elyi unyafi lwafo lwarwa kimaruma kya vandu vafo kulevauta Misri na widimi uniini, na woko lwa finya?

¹² Nkikyi elyi kuraa Vamisiri vaambe, Mmbo alevatannya kikasha, naambo nandevawaiya kulya uwe, neewoota yaa ulaniny? Fweerisa ngoo, kure ukasha elo kukunndye itannya vandu vafo,

¹³ Kummbwa Abrahamu na Isaki na Israeli, mashinga afo, yewo kulevika nawo kyaasa, neevavia Nsheng'anisaa ufyari lwafo sha nyinyiri ta iruveeu, na lyingyi uruka elu shilekuvia nshefumbutaa vana vany, nayo ive ding'u yaawo llung'anu.

¹⁴ Na Nndumi Iruva kara ukasha llwa emmamba atannyaa vandu vakwe.

¹⁵ Naasa Mose kainduka kooloka kulya ifumbuu, eerye maboo alya avii a mawe efo wokony lwakwe, ekee mareiye taari toose ivii, taari yei na taari yei tikareiyo.

¹⁶ Na maboo yoo mmashora a Iruva, na fireiyo fyekee fireiyo fya Iruva fyekee yoo maboony yoo.

¹⁷ Na Yosua llya aleitaa kyoorongye kya vandu kyeeri vekeekapa kyoorongye, kavia Mose, “Kwiifo kyorongye kya fira efo ulaleny.”

¹⁸ Kammbia yeto nshingyunyanga ta vandu vevinga fira-fo, na nta nshi unyanga lwa vandu kyeeri vavingwa-fo, kyeendi ni kyorongye kya vandu vakeimba, nkyo shikiitye yeny.

¹⁹ Eekifika kufii kalollya ngashe ilya na mbasa tilya. Unyafi lwa Mose lukarwa, keera maboo alya yoo si akafika-fika.

²⁰ Kawarya ngashe ilya kaikora na muro nayo ikeeka, kaisa ikava nswa, kauletya mureny kaaka vana va Israeli vakana.

²¹ Mose kavia Aron, vandu yeva nkyooki valekutannya kutani kwavaomuya ulyamari elu lung'ani indi?

²² Nndumi vakwa nalasheroyo nngoo mashika yewe kwiishi vandu yeva sheelyi mmbo vakee vetana makasha.

²³ Mashika mmbo valeshivia, lusongosie maruva yoo asheiraa mbee yeeru, mashika Mose yeto, aleluuta urukeny lwa Misri, llwishi ekyo kyankooya-fo.

²⁴ Shavavia nndu moose yeto atiri saabu naifishe, naasa vakashiniinngya, shayeerya murony, ikookafo ngashe yei.

²⁵ Naasa Mose ekilollya vandu yeva vallyang'aa, mashika ni Aron alevara vakalyamara, naambo vateendwa ni vakiduva vawo,

²⁶ naasa Mose kasalala yoo mwaangony wa ulale lwawo, kaamba, “Nndu yeto akee kyaalu kya Nndumi Iruva, nashe yaa. Vana va Levi woose vakandingitya.

²⁷ Kavavia, Nndumi Iruva, Iruva wa Israeli aamba indi, ‘Wo nndu navike usu lwakwe yoo kisi neere efo neefo wo mwango wa mmba efo ulalen, mundekuwaa wo nndu na mwanamaye nndu na uroye, na wo nndu na vannyanu wakwe.

²⁸ Vana yewo va Levi vakatana indo shaasa Mose alevavia, vakafwa vandu sha fiku firaru indi nkonu ulya.’”

²⁹ Mose kawuya kaamba, “Kuvikeny wakfu mbee ya Nndumi Iruva inu, yee wo nndu na mwana wakwe, na nndu na mwanamaye naambo muniingo mbora inu.”

³⁰ Naasa elyi lya ndesi Mose kavia vandu, “Mmbo muletana ulyamari uniini nnu deny, kyasia ulaalu nsaamany kwa Nndumi Iruva, kulakooye shishidimaa iwonisa usandi kimarumaa kya ulyamari lwany.”

³¹ Mose kawuya kwa Nndumi Iruva kammbia, “Eeda Nndumi, vandu yeva valetana ulyamari uniini nnu, vakasongosia maruva a sahabu.

³² Kyeendi ulaalu kwakooya kulavasaryaa ulyamari lwawo, shakutereva, uta irina lyakwa efo kyitabuny kyafo.”

³³ Nndumi Iruva kavia Mose, “Nndu moose yeto aletana ulyamari mmbwe nshemuutaa efo kyitabuny kyako.

³⁴ Kyasia ulaalu endaany kundetetera vandu yeva nevafita ando alya shilekuvia mbony ta vayo, nalyo lola, nsu wakwa ashekusongoyaa, ando amwi neekyo, kusheshaa nkonu shivataiye kya ulyamari lwawo.”

³⁵ Nndumi Iruva kakapa vandu yewo, llya valesongosia ngashe, ilya Aron aleivika.