YUUKA 30 - BIBILLYA Mareiyo Meele a Iruva

Kitara Kyeerasya Firaso

¹ Neewe songosia kitara kyefumbirya ubani, kukisongosie kya nri wa mshita.

² Waasha lwa vayo sentimita makumi arindaru na ivari sentimita makumi arindaru, yeenda uwe sentimita iyana na makumi avii efo mbai kuve ngata imwi nayo.

³ Neewe mmbo kusheisikyaa na saabu, neefo mbai kuivike saabu kwiringitye.

⁴ Kuisongosye rashi ivii ta saabu yoo kwasi ya vayo na yoo mbariny ta vayo kutisongosye, kuve ando eevika maako a iyipoo,

⁵ Na maako yoo asongosye na nri wa mshita kuisikye na saabu shisha.

⁶ Neewe mmbo kusheivikaa mbee ya soori ilya ikee kufii na isanduku lyilya lya ukureekyi yoo mbee ya kitima kya isarya kikee uwe ya ukureekyi yoo ando nshekwanannya neewe.

⁷ Na Aron ashekoraa ubani yoo uwe ya vayo, wo nkonu ngama kyeeri asheataa taa eto mmbo ashefwaamisaa.

⁸ Na kyeeri Aron asheataa taa yeto nkwaany mmbo ashefwaamisaa, uve ni nrungo wa kyeeri kyoose mbee ya Nndumi Iruva marika any moose.

⁹ Mulafumbire-fo nrungo mwiny, nta kiraso kyekora na muro-fo, nta kiraso kya nswa-fo, nta mulaletye-u kiraso kyeena-fo.

¹⁰ Nawe, Aron mmbo ashevikaa-u usandi yoo mbai lyimwi wo mwaka, kwa samu ya kiraso kya ulyamari iwona usando, wo mwaka nashevika usandi, kwa marika any moose efyo ni fyeele nnu kwa Nndumi Iruva.

Usanu lwa Yeema lya Nndumi

¹¹ Nndumi Iruva karera na Mose kammbia,

¹² Kyeeri kusheekenaa vana va Israeli shaasa yeekyena lyawo lyivaa, llyo wo nndu asheningyaa Nndumi Iruva ukari kimaruma kya nrima wakwe, kyeeri kushevekenaa, naambo kulashekaa-fo ndwari kyeeri kushevekenaa,

¹³ na ekyo vasheningyaa nkyo ekyi, wo nndu asheiraa mbee ya valya vammekenwa mmbo asheningyaa shekeli ya iimya shekeli ya ando eele, (shekeli ni gera 20), kyenga kya nnang'ani kya shekeli ni kiraso kya Nndumi Iruva.

¹⁴ Wo nndu ashiraa yoo kwa valya vammekenwa kupookya yeto atiri myaaka makumi avii, ao mmwasi mmbo asheningyaa kiraso kya Nndumi Iruva.

¹⁵ Masimba nalaende mmwasi-fo, nta vakiva valashewuya numa-fo, yoo kyengeny ekyo kya shekelyi, kiraso ekyo kya Nndumi Iruva naambo muvike usandi kwa mirima yaany.

¹⁶ Neewe mmbo kushewaryaa fesa eto kiraso kya usando uka maakony a vana va Israeli, neetitira tive ta urundi lwa yeema elyo yeele, naambo tive teekummbwa kwa vana va Israeli mbee ya Nndumi Iruva, naambo muvike nsando kimaruma kya mirima yaany.

Ibenselyi lya Arera

¹⁷ Nndumi Iruva karera na Mose kammbia,

¹⁸ “Songosia na birika ya Arera na kirembo kya vayo kive kya arera, ive yekusangya, neewe mmbo kusheivikaa yoo nnang'ani kavii ya yeema yeele na kitara kyerasya, neewe vikafo mura.

¹⁹ Na Aron na vana vakwe mmbo vashesangyaa-fo maako awo na marende,

²⁰ kulaore vammanga efo yeemeny elyo yeele, vakusangye mureny naambo valashefwa, ao kyeeri vasheserikyaa kitara kyeraasya varundyeu, vashekorya Nndumi Iruva kiraso kyemamita na muro;

²¹ naasany mmbo vashesangyaa maako awo na marende awo, naambo valafwe, na irero elyi mmbo lyivaa ivavaso kwawo llung'anu kwakwe we na kwa vana vawo woose numa yaawo.”

Mafura a Yaamba

²² Nndumi Iruva kawuya kavia-se Mose,

²³ Ruuya mafura afwaamaa nisha, maane shivisi-shekeli mayana araanu, na mdalasini utiri kifwaamu kisha kyenga kya kyeeso ekyo nto shekeli mayana avii na makumi araanu na kane shekeli mayana avii na makumi araanu,

²⁴ na kida shekeli mayana araanu, kwa iooya shekeli ya ando eele, na mafura, a zeituni fibaba firaanu,

²⁵ neewe kuvike mafura a yaamba meele mafura mesha a mwisongosia mafura akee mwaarya, nang'u asheva mafura meele a yaamba,

²⁶ Neewe mmbo kusheambaa yeema elyo yeele mafura yoo, na isanduku elyo lya ukureeki.

²⁷ Na mesa yeyo na fiiya fya vayo fyoose, na kitara ekyo kya ifumbirya kifwaamu kisha,

²⁸ na kitara kyekorya firaso, na fiiya fya vayo fyoose na birika yeyo ya mura na kirembo kya vayo,

²⁹ mmbo kusheremutaa findo efyo naambo five fyeele deny na kindo kyoose kipaana findo efyo nakyo mmbo kishevaa kyeele,

³⁰ Neewe mmbo kushaambaa Aron na vana vakwe mafura, neevailyisa, naambo vashirunndye ishoreny lya ukohani.

³¹ Neewe mmbo kureraa na vana va Israeli kuvavie, “Yaa ng'u mafura meele a yaamba kimaruma kyakwa yeny na kwa vana vakwa numa yakwa.”

³² Nnyaletywa efo mwiliny wa nndu-fo, nta mulasongosie mafura engyi sha yaa-fo, yaa mmbo akee meele, na kwany yeni mmbo ashevaa meele,

³³ Nndu yeto ashesongosiaa mafura sha yaa ao nndu moose yeto asheambaa nndu muny mafura yaa, nndu yeto mmbo asheumbutywa kwaaasha na vandu vakwe.

Ubani

³⁴ Nndumi Iruva kavia Mose, iboo mafura mesha afwaamaa, ng'u natafi na shekeleti, na kelbena, ni fyelonga mafura fisha na ubani usha, findo efyo fyoose five fya kyeeso kyimwi,

³⁵ neewe kusongosia, uvumba lwa findo efyo, kifwaamu kisha kya mwisongosia mafura, mesha ankuuya nisha, akee meele.

³⁶ Neewe engyi mmbo kusheakapa deny, na yaavika mbee ya ukureeki efo yeemeny lyekwanannya, yoo nshekwanannyaa neewe, nawo mmbo ashevaa meele deny.

³⁷ Na ubani elo mushesongosiaa, mmushesongosiaa lyingyi sha elo kwa mbony tany-fo, mmbo lushevaa weele kwa Nndumi Iruva.

³⁸ Nndu moose ashesongosyaa sheelo, naambo nalufwaamye, nndu yeto mmbo asheumbutwaa efo vanduny vakwe.