YUUKA 3 - BIBILLYA Mareiyo Meele a Iruva

Iruva Avaanga Mose

¹ Naasa Mose mmbo ekeiisa mburu ta ndeyanka wakwe Yetro, we nkohani wa Midiani; kaisa ironda efo kasa, kashefika ifumbuny lya Iruva Horebu.

² Nsu wa Nndumi Iruva kansheya efo kipala-paleny kya muro ushakaa yoo nnang'ani ya ngorosho, kalola ate ngorosho ilya mmbo ikeaka muro lyo nnyikeeya-fo.

³ Mose kaamba, “Ra shiinduke ulaalu shilole kindo ekyi kyeni shilollye, na kimaruma ngorosho yei ilakeeya.”

⁴ Naasa Nndumi Iruva ekilollya mmbo ammiinduka naambo nalole, kammbaanga auka kulya ngoroshony ilya, kaamba, “Mose, Mose-ro.” Mose Kammbia, “Ekau yeny Mmbee.”

⁵ Iruva kammbia, “Kulashe kufii-fo. Uta fyaaru fyafo marendeny, mashika ando yaa kusalalyi ni ando kweele.”

⁶ Na lyingyi kaamba, “Yeny mmbo shikee Iruva wa ndoo, Iruva wa Abrahamu na Iruva wa Isaki na Iruva wa Yakobo.” Mose kasuruma kisangu kyakwe mashika mmbo aleereya ilola Iruva.

⁷ Nndumi Iruva kaamba, “Lyo dede shallollya ukyiva lwa vandu vakwa vakee Misri, na yeny shallollya kiiyo kyawo kimaruma kya vekallya vawo, mashika shilollye mavina awo.

⁸ Neeny mmbo shooloka shivaauwe maakony a Vamisri yewo, shivasaamise vauke urukeny lulya, vafike urukeny usha, uniini lwiishye uki na malela; vafike kwa Mkanaani, na Mhiti, na Mwaamori na Mperisi, na Mhivi na Myebusi.

⁹ Naasany, kwiishi, mmbo shalollya kiiyo kya Vana va Israeli mmbo kyanshifikkya, nalyo mmbo shallollya ukyiva elo Vamisri vakeevalyisa.

¹⁰ Kyasiany, mmbo nkurumaa yewe kwa Farao, naambo kuute-fo vandu vakwa, wo vana yewo va Israeli, vauke Misri.”

¹¹ Mose kavia Iruva, “A yeny ni vi, kutani shaidima ifika kwa Farao, shindeuta-fo vana va Israeli, vauke Misri?”

¹² Kaamba, “Ni dede yeny nkaa neewe; na kyoora sheelyi yeny shankuruma ni indi, kyeeri kumaa yuuta-fo vandu yewo efo Misri, mmbo musheinndyaa Iruva yaa ifumbuny elyi.”

¹³ Mose kaviaa Iruva, “Lyo elyi nshefikaa kwa vana va Israeli, neevaavia, ‘Iruva wa vande vany mmbo ashiruma kwany; nawo vashivese, Irina lyakwe mmbi? Mmbo shivaviaa-ki?’”

¹⁴ Iruva kavia Mose, “YENY MMBWE, YETO SHIIFO.” Kammbia, “Niindo kushevia vana va Israeli. YENY MMBWE ashiruma kwany.”

¹⁵ Iruva kawuya ivia lyingyi Mose, “Via Vana va Israeli marero yaa, Nndumi Iruva wa vande vany, Iruva wa Abrahamu, Iruva wa Isaki na Iruva wa Yakobo mmbwe ashiruma kwany; yelyi llyo irina lyakwa fika llung'anu, nalyo llyo kindo kyekummbwa kufike marika moose.

¹⁶ Enda kwandesanyirya vamiku va Israeli ando amwi, kuvavie, ‘Nndumi Iruva, Iruva wa vande vany, Iruva wa Abrahamu, Iruva wa Isaki, Iruva wa Yakobo, mmbo alekoora neeny, kashivia, Ni dede yeny mmbo shamusheya, neeny mmbo shallollya efyo muketannywa efo Misri.’”

¹⁷ Na yeny shaamba, “Nshevasamisaa vauke Misri efo ukyiveny shivafite urukeny lwa Mkanaani, Mhiti, Mwamori, Mperisi, Mhivi, na Myebusi, uruka lwiishwe malela na wukyi.

¹⁸ Nawo llyo vashekwarannya; llyo neewe kweende, amwi na vamiku va Israeli kwa mangyi ya Misri, na immbia, ‘Nndumi Iruva, Iruva wa Vaebrania, mmbo alekwaanannya neese, naasa ulaalu lwakutereva, lweekeye lweende ando kwa mikonu iraru-da efo kasa, lundeutya Nndumi Iruva kiraso we Iruva weeru.’

¹⁹ “Neeny shiishi mangyi yeto wa Misri nnyashemwekeyaa mweende-fo, kutani elyi ashelollyaa woko lwa finya.

²⁰ Na yeny nsheorrwaa woko lwakwa, nshekapa Misri na ngyende takwa toose, numa ya vayo llyony ashemwekeya mukweenngye.

²¹ Neeny nsheidimisyaa vandu yewo ilyillywa ni Vamisri, kishevaany kyeeri mushekupoo-fo mmusheuka-fo ruu-fo;

²² wo nndu nka mmbo asheterevaa nka yeto ungyi akaa nawe efo kyeny, fiiya fya fesa, na fiiya fya saabu, na masara, na yeni mushevikaa vana vany va kyuumi na va kyika, neeni mushesokaa Vamisri findo.”