YUUKA 29 - BIBILLYA Mareiyo Meele a Iruva

Yaatwa Mashoreny Aron na Vana Vakwe Vave Vakohani

¹ Vatannyi indo naambo vailyiswa, vaidimi ishifurukannya yoo ishoreny lya ukohani, iboo shau shikoo, na suva ivii tilatiri ivara,

² na nkate ulatiri ntarang'o, na mandasi alatiri ntarang'o akee masongosye na mafura, na mikate ya kivalavala ilatiri ntarang'o ivikwa mafura, usongosywa na nswa nsha wa nganu.

³ Fyoose fivike kikapuny kufyeende ando amwi na ng'umbe yeyo na suva eto ivii.

⁴ Numa kweendeny Aron na vana vakwe fika yoo mwaangony wa yeema lya ikwaanannya, yeele kuvailyise na mura.

⁵ Numa iboo soori ta ukohani kuvike Aron, kansu ilya na ikoti, na soori ya inunuta, na mboloko ya yoo mbafuny, kumoomuye na nkanda eto ukee mooke nisha,

⁶ kummbike na kofia ilya, na ureto elo weele kuluvike yoo kofieny.

⁷ Llyo kusheiboony mafura yoo eyaamba, kulletye nrweny mbwakwe, kumwambeny mafura.

⁸ Numa ende vana ewo vakwe kuvavike kansu.

⁹ Kuvainive mikanda, Aron na vana vakwe kuvevavika kofia, nawo mmbo vashetira ukohani elo luve ivavaso lya llung'anu kuvike Aron na vana vakwe ishoreny elyo yeele.

¹⁰ Naasa kweendeny shau yeyo yoo yeemeny lya ikwanannya, na Aron na vana vakwe vaashevika maako awo yoo nrweny wa shau yeyo.

¹¹ Neewe kushisheny shau yeyo usanguny lwa Nndumi Iruva yoo mbee ya yeema lya ikwanannya.

¹² Numa kwiipoo samu, kunanatye efo ndumbeny iinya ta kitara kya irasya na nni wafo, numa pusuya samu shoose yoo kwasi ya kitara kya irasya.

¹³ Numa iboo mafura yoo a ingau, na iravati elyo lya irima na syo na mafura yoo akee uwe ya vayo fyoose kufikore na muro yoo uwe ya kitara kya irasya.

¹⁴ Lyo nyama ya shau yeyo, na shony ya vayo, na mura va vayo, mmbo kushefirumataa na muro efo ulaleny, ni kiraso kimaruma kya ulyamari.

¹⁵ Lyingyi iboo suva, na Aron na vana vakwe vashevikaa maako awo yoo uwe ya nrwe wa vayo.

¹⁶ Numa kushishe suva yeyo na yiboo samu ya vayo, na iletya samu ya vayo kuleringitya kitara kya irasya.

¹⁷ Numa kurumbwe-rumbwe suva yeyo, kusangye maala a vayo na marende a vayo, na ivika ando amwi na nrwe wa vayo.

¹⁸ Naasa kurumate na muro suva shoose, ni kiraso kimaruma kya Nndumi Iruva, nto nrungo nsha, wa kiraso kya ikora na muro kyautyo Nndumi Iruva.

¹⁹ Na suva yeyo ya kavii, Aron na vana vakwe vavike maako awo uwe ya nrwe wa vayo.

²⁰ Numa kushishe suva yeyo kwiipoo samu ya vayo kwaambe yoo kuriny ka Aron ka woko usha, na yo mbai ya kuri ka vana va Aron woko usha, na efo mining miniini ya woko usha lwa vana vakwe na efo mininy miniini ya woko usha ya marende a vana vakwe, na samu yeyo yasaa kuringitye nayo kitara kya irasya.

²¹ Samu yeyo ikee uwe ya kitara kya irasya utau shaangu, na efo mafureny alya eyaamba, kwaambe soori ta Aron na vana vakwe na soori tawo, ando amwi nawe,

²² Lyingyi iboo mafura a suva yeyo na nkya wa vayo na ingau lya ndewuny na iravati lya irima na lya syo ti tivii na mafura a syony na kisouwa kya woko usha, mashika ni suva yavikwa kimaruma kya ishora yeele.

²³ Kwipoo na nkate umwi wa nswa, na nkate ukee nsongosye na mafura na nkate umwi wa kivalavala alya kikapuny kilya kitiri mikate ilatiri ntarang'o, ekyo kikee yoo mbee ya Nndumi Iruva.

²⁴ Efi fyoose kufivike maakoony a Aron, na maakony a vana vakwe, neewe mmbo kushefisisikaa-sisikaa five kiraso kya isisika kwa Nndumi Iruva.

²⁵ Kuwaryeny findo filya efo maakony awo kufikore na muro yoo kitareny kya irasya, yoo uwe ya kiraso kilya kya irumatwa na muro, five nrungo nsha kwa Nndumi Iruva, ni kiraso kya ikora na muro kwa Nndumi Iruva.

²⁶ Naasa iboo kifoya ekyo kya suva yeyo kwa Aron kimaruma kya urundi elo weele na ikisisika kive kiraso kyesisika usanguny lwa Nndumi Iruva nakyo kishevaa ni waavi lwafo.

²⁷ Neewe eremuta kifoya ekyo kya kiraso ekyo kya isisika, na kisouwa kilya kya kiraso ekyo, kikee kisisike na iipowa uwe, fya suva yeyo ya ishora yeele, yeyo ya Aron na kimaruma kya vana vakwe;

²⁸ nafyo mmbo fishevaa fya Aron na vana vakwe, imutu lyawo lya kyeeri kyoose kyuuka kwa vana va Israeli, mashika ni kiraso kya ukulungo kyooka kwa vana va Israeli na kiraso kya unapwe na kiraso kya ukulungo kwa Nndumi Iruva.

²⁹ Na soori eto sheele ta mashora yoo meele a Aron mmbo ashewarywa ni vana vakwe numa yakwe, varee kyeeri vashembwaa mafura na ivikwa ishoreny elyo yeele.

³⁰ Mwana yeto wakwe ashevaa nkohani ando akwe mmbo ashearaa ando a mikonu mfungare, elyi asheangaa yoo yeemeny lya ikwaanannya, naambo nafurukannyi ando yoo eele.

³¹ Neewe iboo suva yeyo ikeeshuute kimaruma kya ishora elyo yeele, na ikorya nyama ya vayo yoo ando eele.

³² Aron na vana vakwe mmbo vashelyaa nyama yeyo ya suva, na mikate ilya ikee kikapuny kilya, yoo mwaangony wa yeema lya ikwanannya.

³³ Nawo mmbo vashelyaa findo efyo fileende usandi vakakooya ivikwa ishoreny yeele na ilyiswa, kya indi muny nalafilye-fo, ni findo fyeele.

³⁴ Na kwakooya kwasaa-u kindo yoo nyaminy yeyo fika elyi lya ndesi, ao kindo kya mikate kikansaa fika ngama, llyo fikorwaa na muro, filakilyiwa-fo, mashika mfeele.

³⁵ Ni indo kushetannyaa Aron na vana vakwe kiinani na shaasa shilekuvavasya, mmbo kushevavikaa kwa ishora yeele mikonu mfungare.

³⁶ Wo nkonu mmbo kushutaa ng'umbe ya kiraso kya ulyamari kwa kimaruma kya usandi, neewe mmbo kusangyaa kitara ekyo kyeeri kukee irunda usandi lwa kitara ekyo, neewe mmbo kusheyambaa mafura naambo kuyeeremute.

³⁷ Mmbo kushevikaa usandi kimaruma kya kitara ekyo ando a mikonu mfungare na iyeremuta, llyo kitara ekyo kishevaa kyeele deny, na wo kindo kishepanaa kitara ekyo mmbo kishevaa kyeele.

Firaso fya wo-nkonu

³⁸ Naasa firaso kusheutyaa yoo kitareny ekyo mfyo efi, ngurana ta moonri ivii ta mwaka umwi, wo nkonu.

³⁹ Ngurana imwi mmbo kusheishishaa ngama, na yeyo ya kavii kusheishisha nkwaany;

⁴⁰ lyingyi, ando amwi na ngurana yeyo mmbo kushutaa nswa ukee nsasande na mafura lita isaru na mafura lita imwi na mfinyo lita imwi five kiraso kyeena.

⁴¹ Na suva yeyo ingyi mmbo kusheishishaa nkwaany, nayo-da kusheitannya sha ilya ya ngama ya nswa, na kiraso kilya kyeana, kive kiraso kya nrungo nsha, ni kiraso kyeserisya Nndumi Iruva kya yookywa na muro.

⁴² Mmbo kishevaa ni kiraso kyekora llung'anu efo ngyufyariny tany, toose yoo mbee ya yeema lya ikwanannya mbee ya Nndumi Iruva, yoo nshekwanannya neeni, naambo shireryeny neewe.

⁴³ Neeny mmbo nshekwanannya-u na vana va Israeli, na itumbe lyakwa lyisheallwaa yeema yelyo lyive yeele.

⁴⁴ Neeny nsheeremutaa yeema elyo lya ikwanannya, na kitara ekyo, na Aron na vana vakwe nshevailyisaa, naambo vashirunndye efo ishoreny lya ukohani.

⁴⁵ Mmbo nshekaa nnang'ani a vana va Israeli, neeny mmbo nshevaa Iruva waawo,

⁴⁶ Nawo vasheshimanyaa yeny ni Nndumi Iruva, Iruva waawo, shileveende shivauta Misri, naambo shikae nnang'ani yaawo, Ni yeny Nndumi Iruva, Iruva waawo.