YUUKA 28 - BIBILLYA Mareiyo Meele a Iruva

Soori ta Vakohani

¹ Newe ende mwanamau Aron kufii neeny, nashe ando amwi na vana vakwe, vauke efo vaniny va Israeli, naambo nashirunndye ishora lya ukohani. Aron, Nadabu, Abihu, Eleaseri na Itamari wo vana va Aron.

² Neewe mmbo kusongosikyaa mwanama-u Aron soori ta usuri na shisha.

³ Neewe kuvie vandu woose vatiri ngoo itiri urango, yewo shilevaishura nrima wa urango vasongosikye Aron soori naambo neeremutwa nashirundye ishora lya ukohani.

⁴ Na soori eto vashesongosyaa ni, kisibau kya yoo mbafuny, na naifera, na ikoti, na kansu shishope, na kofia na uruumu lwa kisiny, mmbo vashesongosikyaa mwanamau Aron na vana vakwe, soori ta usuri naambo nashirunndye ishora lya ukohani.

⁵ Nawo mmbo vashewaryaa saabu na soori ya samawi na ya sambarau na idodorye na soori shisha.

⁶ Na naifera yeyo vaisongosye na ruu ta saabu, na ta samawi na ta sambarau na tidodorye, ruu shisha tikee shyooke kwa waarya.

⁷ Itire firami fivii fya meeveny fikee filunge nisha naambo filungwa ando amwi.

⁸ Na uruumu lukee wooke kwa waarya lukae uwe, lufinge soori yeyo luve sha soori yeyo ya naifera isongosywa na findo efyo fyeni, ruu ta saabu ta fwana ya samawi na sambarau na idodorye ta kitambaa kisha kikee kyooke.

⁹ Neewe kwipoo mawe avii a wuuru akuvakye a fwana ya mare, mavisi, kureiye-fo marina a vana va Israeli yoo uwe ya vayo.

¹⁰ Marina awo arindaru uwe ya iwe lyimwi lya wuuru, marina engyi arindaru yo asaau kureiye uwe ya iwe llya lya kavii kwa ntere kusorye shaasa vawonikkye.

¹¹ Sha ishora lya ireiya mawe lyivakkye elyo lya ireiya muuri, mmbo kushepashaa mawe yoo, ni indo kushesongosyaa mawe yoo avii, shaasa marina a vana va Israeli akai mawe yoo a wuuru kusheavikaa uwe ya firembo fya saabu.

¹² Na mawe yoo avii mmbo kuvikaa taari na taari ya soori yeyo ya meeveny yo naifera ave mawe a wuuru a ikumbura vana va Israeli, nawe Aron mmbo ashiipoo marina awo mbee ya Nndumi Iruva efo meeveny akwe kya inkumbura.

¹³ Songosya firembo fivii fya saabu

¹⁴ na mise ivii ya saabu shisha, ive sha kyoove, kyikee kyooke, neewe mise yeyo kuivike uwe ya firembo efyo.

Kisibau kya Mbafu

¹⁵ Neewe mmbo kushesongosyaa kisibau kya yoo mbafuny, ishora lya waarya kirengo kya vayo kive sha kya naifera yeyo yeenunuta meeveny, ive ya ruu ta samawi na ta sambarau na tidodorye na ta ruu shisha tikee shooke, ni indo kusheisongosyaa.

¹⁶ Kiinani taari toose, kive ilemmya, waasha lwa vayo sentimeta makumi avii na ivii na ivari lya vayo sentimeta makumi avii na ivii.

¹⁷ Neewe ekerya-u ngamba iinya ta mawe a wuuru, ngamba imwi ya akiki, na yakuti ya fwana ya ikundu.

¹⁸ Ngamba ya kavii ive ya samaridi, na yakuti samawi na almasi.

¹⁹ Ngamba ya kararu ive ya hiakinto, akiki idodorye na amatisto;

²⁰ na ngamba ya kaana ive ya sabaradi, shohamu na yaspi. Mawe ya a wuuru uniini mmbo asirwa na saabu nakooye inanga siri.

²¹ Na wo iwe lyimwi lya wuuru nng'ani a mawe yoo ikumi na avii a wuuru, mmbo lyireiywa-u irina lya umwi wa vana va Israeli nto ngyufyari eto ikumi na ivii.

²² Neewe kuvike efo kisibauny kilya kya yoo mbafuny mise ilya ivakkye kyoove, ikee myooke ya saabu shisha.

²³ Neewe vika rashi ivii ta saabu efo kisibauny ekyo kya mbafu.

²⁴ Neewe kuvike mise eyo ivii ya saabu ikee myooke efo rashiny eto ivii tikee efo kisibauny ekyo kya mbafuny.

²⁵ Na mafiringisyo yoo avii a mise yeyo myooke mmbo kusheivikaa yoo firaminy fya naifera filya fyeemuuta mbafuny taari ya mbee.

²⁶ Neewe kuvike rashi ivii ta saabu kutivike efo mafiringisyony avii a kisibau ekyo kya mbafuny yoo mbai ya vayo efo kimmba ya naifera yeyo yenunuta.

²⁷ Neewe songosya rashi ivii ta saabu kutivike efo firaminy efo fivii fyeenunuta meeveny fya nayeera, kwasi, taari ya mbee kufii na kifungo kya vayo, uwe ya uruumu lwa naifera lukee wooke nisha nnu.

²⁸ Nawo mmbo vashoomuyaa kitambaa ekyo na rashi eto ta vayo ta naifera yeyo yeenunuta meeveny na ukova lwa fwana ya samawi naambo kikae uwe ya uruumu lwa naifera lukee wooke nisha nnu, naambo kisibau ekyo kya yoo mbafuny kilarauke na naefera yeyo.

²⁹ Na Aron mmbo asheipoo marina a vana va Israeli efo mbolokony ilya yoo mbafuny ya yuuta uvingo uuwe ya nrima kyeeri kya yaanga ando yoo eele, kive kya ikummbwa kyeeri kyoose mbee ya Nndumi Iruva.

³⁰ Neewe vikafo Urimu na Thumimu efo mbolokony eyo ya yoo mbafuny, kya yuutya uvingo, nafyo fikee yoo nriminy wa Aron elyi ashendaa mbee ya Nndumi Iruva; nawe Aron mmbo asheipoo uvingo lwa vana va Israeli efo nriminy wakwe yoo mbee ya Nndumi Iruva.

Soori Tingyi ta Ukohani

³¹ Na soori yeyo ya naifera shoose ive ya fwana ya samawi

³² Nayo ivikwa ando a iita nrwe, itire ukova lwa mbai lukee wooke luringitye yoo kwa iita nrwe, lyivake nrwe wa kansu ya minya, naambo lyilaranduke.

³³ Neefo ikeduny lya vayo kuvike-fo komamanga ta fwana ya samawi na ta fwana ya bluu, na ta fwana idodorye iringitya ikedu lyoose, kuvike vipengere fya saabu nnang'ani a komamanga taari toose.

³⁴ Nkyo kipengere kya saabu na komamanga, kipengere kya saabu na komamanga iringitya ikedu lya soori koose.

³⁵ Nayo mmbo arawaa ni Aron kyeeri kya urundi na unyanga lwa vipengere efyo mmbo lushiitiwa kyeeri ashaangaa ando eele mbee ya Nndumi Iruva, na kyeeri asomuka poo, naambo alashewaawa.

³⁶ Kuvesongosia ibati lya saabu shisha kureiye uwe ya vayo, sha mareiyo a muuri, MWEELE KWA NNDUMI IRUVA.

³⁷ Kufingye ibati elyo na uruu lwa fwana ya samawi taari ya mbee ya kofia.

³⁸ Nalyo lyishekaa yoo mbee ya kisangu kya Aron, nave mmbo asheiboo uravi lwa findo efyo fyeele, efyo vana va Israeli vashefyeeremutaa na findo fyawo fya pya fyoose, nalyo mmbo lyishekaa yoo kisanguny kyakwe mikonu myoose, naambo fikooye iwarywa ni Nndumi Iruva.

³⁹ Na kansu yeyo mmbo kusheyokaa na iishopa nisha, na kofia ya kitambaa kisha, ando amwi na nkanda wa vayo ukee nshope na ilongwa-longwa.

⁴⁰ Naasa lyingyi kusongosye kansu kwa vana va Aron, kuvavikye nkanda, na kofia ta vayo naambo kitire itumbe isha.

⁴¹ Neewe vika mwanamau Aron na vana vakwe masara yoo, kuvaambe mafura, kuvavike mashoreny meele, na ivailyisa, naambo veedimi ishirunndya yeny ishoreny lya ukohani.

⁴² Vasongosikye na suruvale ta soori shisha, ta isikkya mwiili, suruvale eto tipookye kisi fika finaminy,

⁴³ Araon na vana vakwe vasoro vatirae, elyi vasheangaa Yeeminy Yeele, a ikwanannya na kyeeri vafikaa kufii na kitara kyeerasya naambo vafurukannyi yoo ando eele, valashekutefusa, vafwe, elyi ni ivavasyo lya llung'anu kwakwe we, na ngyeeri yakwe.