YUUKA 24 - BIBILLYA Mareiyo Meele a Iruva

Kyaasa Kyandeiyywa

¹ Kyasia Nndumi Iruva kavia Mose, Saama yewe na Aron na Nadabu na Abihu na vandu makumi mfungare vakee vamiku va Israeli mushefiirya Nndumi Iruva ndi, mwikee kwaasha,

² Ni Mose muni asheshaa kufii na Nndumi Iruva, kyeendi yewo vengyi wo mbasheshaa kufii-fo, nta mbashesaamaa neewe-fo.

³ Mose keenda kandevia vandu marero yoo a Nndumi Iruva moose, na mavavasyo akwe moose, vandu vakarouwa nalyimwi woose vakaamba, “Efyo fyoose Nndumi Iruva avavasya lushetanaa.”

⁴ Mose kareiya marero moose Nndumi Iruva alemmbia, kakwipoo ngama shuru, katana kitara kyeerasya yoo mbai ya ifumbu, kitiri ngo ikumi na ivii sha ngyufyari ikumi na ivii ta vana va Israeli,

⁵ Karuma vasero va vana va Israeli vakauta kiraso kya ikora na muro, vakasheshishya Nndumi Iruva ng'umbe ya kiraso kya ufoo,

⁶ Mose kaiboony kyenga kya samu ya vayo kaivika bakuriny na kyenga kya samu ilya kafwallya efo kitareny ekyo kyeerasya.

⁷ Numa kaipoo kyitabu ekyo kya uvavaso kasommya vandu woose, nawo vakaamba, “Efyo fyoose Nndumi Iruva aamba lushetanaa na iinndya.”

⁸ Mose kaipoo samu ilya kafwallya vandu, kaamba, “Yei nnyo samu ya kyaasa Nndumi Iruva alevika neeni marerony yaa moose.”

⁹ Naasa Mose kasaama, we na Aron na Nadabu na Abihu na vandu makumi mfungare va vana va Israeli,

¹⁰ vakalollya Iruva wa Israeli, yoo kwasi ya marende akwe kwekee sumbai shaa ya mawe maa shaasa ngina ifwani shaa pyai.

¹¹ Nawe nnyeleekeya vana va Israeli maako akwe-fo, vakalollya Iruva vakalya neena.

Mose Ifumbuny lya Sinai

¹² Nndumi Iruva kavia Mose, “Osho kwakwa kunu ifumbuu, kukae-fo, neeny nshekuningyaa maboo a mawe na mavavaso mareiye-fo naambo kuvaloshe.”

¹³ Mose kakwiipoo na Yosua we nndundi wakwe, Mose kasaama ifumbuu kwa Iruva,

¹⁴ Kavia vamiku yewo, luvereny yaa lweende kutani luwuyaa, mashika Aron na Huri vakee neeni, na wo nndu ating'wa ni kindo navavie.

¹⁵ Mose kasaama kulya ifumbuu, ifishi lyikasikkya ifumbu.

¹⁶ Na itumbe lya Iruva lyikasikkya ifumbu lya Sinai, ifishi lyilya lyikasikkya ifumbu ando a mikonu irindaru, na nkonu wa mfungare Nndumi Iruva kavaanga Mose ekee kulya ifishiny.

¹⁷ Na itumbe lya Nndumi Iruva mmbo lyileva sha muro wa kipala-pala niindo vana va Israeli valelollya.

¹⁸ Mose kaanga kulya ifishiny, kasaama ifumbuu, Mose kakaa-fo ando a mikonu makumi aana nsanyiny na kio.