YUUKA 23 - BIBILLYA Mareiyo Meele a Iruva

Usumanu na Urilalyi

¹ Kulasheuta mbony ta wongo, kulashesanda woko lwafo na nndu nravi, neeva nkureeki wa ulembi.

² Kulasange na ironda lyirye itana findo fya uravi, nta kulashevika ukureeki lwafo kwiriani na vandu vakunndye yeeveta usumanu

³ naakwa ava nndu nturi kulasheenkunndya-fo,

⁴ kwakooya ng'umbe ao nshungu ya nkiduva wafo vareka, nkuti kumweekye iviira.

⁵ Kwalollya nshungu wa nndu eto akusuuye wammbwa na irio lya vayo, kwakusara nkivaa kumweekkye, llyo nkuti kumweekkye-da.

⁶ Lola kulasheeveta usumanu lwa nndu nkiva efo mwaanduny wakwe,

⁷ kaa kwaasha na wongo, neewo valalyamarye ando amwi na va usumanu kulavawaa-fo, mashika yeny nshishemwekennyaa usumanu yeto akee nravi-fo.

⁸ Nta kulawarye findo fya ntambo mashika mmbo fiwaa miso a yewo valolaa, na yeeveta marero a yewo va usumanu.

⁹ Kulalammye nndu muny akee kwany-fo, mashika yeni mwiishi ngata ya nndu muny, llya mwiike veny kulya urukeny lwa Misri.

Mwaaka wa Mfungare na Nkonu wa Mfungare

¹⁰ Mmbo kushevayaa mbeu kunu urukeny lwafo ando a myaaka irindaru na yiilula findo fya-fo,

¹¹ kyeendi mwaaka wa mfungare mmbo kusheraa sumbai yiimuye, naambo na vandu vakiva vakee kwany vawonise kyeeekkya, neekyo vashesaara wo, kilyiwa ni mafisi. Niindo kushetanaa efo nndeny wafo wa misabibu, neefo nndeny wa miri ya mafura.

¹² Ando a mikonu irindaru runda mashora nkonu wa mfungare kwiimuye, naambo na ng'umbe yafo na nshungu wafo nafyo fiveimuya na mwana wa kishinga kyafo na muny wafo nawo vaimuriswa.

¹³ Tireny efyo fyoose shilemuvavasya; nta mulasende marina a maruva engyi nta nalasheitiwa kaniny kany-fo.

Suku-kuu Shiniini Isaru

¹⁴ Ando a mwaaka umwi shivikkya suku-kuu kararu.

¹⁵ Mmbo kushevikaa suku-kuu ya mikate ilatiri ntarang'o. Nayo kusheilyaa ando a mikonu mfungare shaasa llya shilekuvavasya, kyeeri kilya kivavasye kulye mikate ilatiri ntarango, mwiiri wa Abibu nto mwiiri ulya kuleuka nato Misri. Na kulave nndu ashelollywaa mbee yakwa na maako aruu-fo,

¹⁶ ya kavii ni suku-kuu ya fimu, ni findo fya mbee fya mashora a mareminy ya kararu ni suku-kuu yeesanyirya yoo masiiyoony a mwaaka, yoo kushesanyiryaa filya kulefurukannya efo mareminy.

¹⁷ Wo mwaaka ni kararu vandu vafo woose vasheshaa mbee ya Nndumi Iruva wafo.

¹⁸ Kulasheninngya samu ya kiraso kyakwa na mikate itiri ntarang'u-fo, ao nta mafura a vayo alerewa fika ngama-fo,

¹⁹ Fimu fya mbee fya uruka lwafo kuti kufyeende mmba ya Nndumi Iruva we Iruva wafo. Kulakore nyama ya mburu na malela a maye-fo.

Kyaasa na Uramba

²⁰ Ekaka-u shikeeruma nsu wakwa naire mbee yafo, akuringe efo shia ashekufita fika ando alya shilekusongosia.

²¹ Kwiiseny mbee yakwe mwarannyi unyanga lwakwe, nta mulave kilemi-fo mashika nnyashemusaryaa-fo, mashika yeto mmbo arie irina lyakwa.

²² Kyeendi kwakooya mwarannya unyanga lwakwe dede neetana yefyo shaamba yeny, llyo nshevaa nkiduva wa vakiduva vafo na mwikusisa yewe nshensisaa.

²³ Mashika nsu wakwa asheiraa mbee yafo, ashekweende mbee ya Mwaamori na Mhiti, na Mperisi na Mkanaani na Mhivi na Myebusi neeny nshevamamita.

²⁴ Kulasheinndya maruva awo, nta iirunndya, nta kulatane findo fivakyani nawo, mmbo kusheimamitaa deny na ngo ta vayo kutifishe-fishe.

²⁵ Neeni mmbo musherunndyaa Nndumi Iruva, Iruva waany, nawe ashevikkya kyeelya kyafo na mura wafo mbora, neevika ndwari kwaasha neewe.

²⁶ Kwafo nkushekaa-fo nka akapaa urende nta nka kyuumba-fo, na yeny nshemuniinga muu mwaasha.

²⁷ Yewo vashesalalaa mbee yafo nshevamattwaa na ivasaaveesa, nawo vasheindukaa ikurisha.

²⁸ Neeny nsherikaa fifi mbee yafo fyaante Mhivi, na Mkanaani na Mhiti varishe mbee yafo.

²⁹ Nshishewoombutaa ando a mwaaka umwi nsi-fo, mashika uruka mmbo lushesaa-u ruu, na mafisi ashesamya-fo.

³⁰ Mmbo nshevaumbutaa waarya, shaasa yewe kukee fumbuka neetira uruka.

³¹ Neeny nshekuvikkyaa nnyanu uka yeeve ya Shamu fika yeeve ya Vafilisti na lyingyi kupookya kasa fika mureny, mashika mmbo nshevikaa vandu va vayo maakony afo varishe mbee yafo.

³² Kulalye nawo mmafo, nta kulasore maruva awo-fo.

³³ Valashekaa urukeny lwafo-fo mashika mmbo vashekwenngye kulyamare, mashika kwakooya kwainndya maruva awo mmbo vashevaa nsindara kwafo.