YUUKA 20 - BIBILLYA Mareiyo Meele a Iruva

Mavavaso Ikumi

¹ Iruva karera marero yaa moose kaamba,

² Yeny ni Nndumi Iruva, Iruva wafo, shilekuuta urukeny lwa Misri, mmba ya ushinga.

³ Kulatire maruva engyi kulaore ni yeny-fo.

⁴ Kulasongosye ifwanu lyepasha, ao ifwanu lya kindo kyoose kya iinndya kyikee iruveeu nta kyikee si ulaniny, nta kyikee efo si mureny-fo.

⁵ Kulafiindye nta kulafirunndye-fo; mashika ni yeny Nndumi Iruva, Iruva wafo, ni Iruva atiri kyififi, mmbo nshetaiyaa vana maravi a vande vawo, shitani shafika irika lya kararu na lya kaana lya valya vashisuuye;

⁶ neeny nshelyillyaa fiku fya yewo vashikunndye vakantira mavavaso akwa.

⁷ Kulashesenda ruu irina lya Nndumi Iruva, we Iruva wafo-fo, mashika Nndumi Iruva nnyasheraa nalalola uravi lwa nndu yeto asendaa irina lyakwe ruu-fo.

⁸ Kummbwa nkonu wa mfungare wa Nndumi Iruva kuwallwe mweele.

⁹ Ando a mikonu irindaru runda kumarisye mashora afo moose;

¹⁰ kyeendi nkonu wa mfungare ni nkonu wa Nndumi Iruva, Iruva wafo, nkonu yeto kularunde nta ishora lyimwi, yewe, nta nsero wafo, nta mfu wafo nta nndundi wafo, wa kyuumi ao wa kyika, na kindo kyevikkya, nta muny akee efo mmba kwafo-fo.

¹¹ Mashika ni ando a mikonu irindaru Nndumi Iruva aleumba iruveeu na ulana na yeeve na fyoose fiiyo, kaimuya nkonu wa mfungare; kweekkyo Nndumi Iruva kavikkya nkoonu wa mfungare mbora kawiilyisa.

¹² Inndya ndoo na mau wafo naambo mikonu yafo ifumbuke yaa ulaniny ando Nndumi Iruva wafo alekuvika.

¹³ Kulawae.

¹⁴ Kulatuuse nta kulashetuuswa.

¹⁵ Kulaive.

¹⁶ Kulashekureekkya nndu ungyi kya wongo.

¹⁷ Kulashelanga mmba ya uroo, kulalange nka wa nndu ungyi, nta nndundi wakwe wa kyuumi ao wa kyika, nta n'gumbe yakwe, nta nshungu wakwe, nta kindo kingyi atiri na kikava-ki.

Weerei lwa Vandu

¹⁸ Vandu woose vakalollya fimwii na maru-ruma na unyanga lwa maranda, na ifumbu lyilya lyikafummbya nsu; na vandu veekilollya indo vakare-rema, vakasalala kwaasha.

¹⁹ Vakavia Mose, “Re-ra neese yewe kumuni, neese lushekwaarannya. Iruva nalare-re neese-fo, mmbo lufwaa.”

²⁰ Mose kavia vandu, “Mulairyee-fo, mashika Iruva mmbo asha naambo namweese, naambo mukae na weerei lwakwe naambo mulallyamarye.”

²¹ Naasa vandu vakasalala kwaasha, na Mose kasembeya kufii kulya ireemeny lyilya kulya Iruva eekai.

Uramba lwa Kitara kya Irasya

²² Nndumi Iruva kavia Mose, “Via vana va Israeli indi, ‘Yeni muveni mwallollya shire-raa neeni uka iruveeu,’”

²³ Mulatani maruva engyi a fesa mwaasande neeny-fo, a saabu, mulasongosye mukee nan'gu-fo.

²⁴ Mmbo kusheshitannyaa kitara kyerasya kukyisongosye na uteeri, kusheutya-u firaso fya-fo, firaso fyekora na muro, firaso fyetereva ufoo, firaso fya moonri na fya n'gumbe tafo, wo ando yoo nshevika-u kindo kyekumbura, irina lyakwa yoo n'gu nshekwiirikkyaa neekuvikkya mbora.

²⁵ Kwakooya kwashitannya kitara kyeerasya kya mawe, kulakitani na mawe mabashe-fo, mashika kwanyafisha na fiiya fyafo mmbo kwantefusa kitara ekyo kyeerasya,

²⁶ Kitara ekyo kyeerasya kilatire fitere-fo, mashika kwisaama-u kulasheva sheelyi kukee mbereto.