YUUKA 2 - BIBILLYA Mareiyo Meele a Iruva

Iwonika lya Mose

¹ Nndu umwi wa mmba ya Levi kakupoo kandeora mwana wa kyika wa mmba yeyo ya Levi.

² Nka ulya kakufinga kaira mwana, nawe ekilollya ni mwana nsha nnu kansuruma ando a miiri iraru.

³ Ekilollya nnyashidimaa insuruma mmwasi, kansongosya isambi lya makongye, kalyaamba muuya muu, kavika-fo mwana, kandemmbika yoo mbaa-mbaa ya mura wa Naili

⁴ Mfwamaye wa nkoku ulya kakaa kwaasha nalole kindo kipaana mwana.

⁵ Naasa mfu wa Farao kaoloka naambo nandekusangya efo mureny, na fishinga fyakwe fikarua-rua efo mbai ya mura; nawe kalollya kiisambi kilya kulya mureny, karuma kyishinga kyakwe naambo nandekyeende.

⁶ Kakyifunnwa, kalollya mwana ulya, nawe ate mmbo akeiya. Naasa kallyillya, kaamba, “Yeu ni umwi wa vana va Vaebrania.”

⁷ Naasa mfwamaye wa mwana kavia mfu wa Farao, “A sheenda shindevanga mwilela efo kwa vaka va Kiebrania, nashe kwafo, nakweekkye yoota mwana yeu?”

⁸ Mfu wa Farao kaamba, “Yee, enda. Mwana ulya keenda kandevaanga maye wa mwana.”

⁹ Mfu wa Farao kammbia, “Ipoo mwana yeu kusheekkye imoota, neeny nshekuningaa weesi lwafo.” Nka ulya kawarya mwana ulya kandemoota.

¹⁰ Mwana kang'ana, maye kamweende kwa mfu wa Farao, kava mwana wakwe. Kanfishya irina lyakwe ni Mose, kaamba, “Ni elyi shilemuuta mureny.”

Mose Arisshya Midiani

¹¹ Naasa, Mose ekiva nndu nniini, nkonu umwi kakupoo keenda kwa vana va maye, nalole mario awo. Kalollya Mmisri akeekapa Mwebrania, mmbwe umwi wa vandu vakwe.

¹² Kalola efo neefo, eekilollya nkwiyo nndu, kakapa Mmisri ulya kansuruma nsangeny.

¹³ Kakupoo-se elyi lya ndesi, kalollya vandu vavii nawo ni Vaebrania nawo vakekapana. Kavia ulya ekeelammya ulya ungyi, Nkyiki elyi kukeekapa yeto ungyi?

¹⁴ Nawe kammbia, “Ni vi alekuvika yewe kuve mwilusalallya na mwiluleta? A mmbo kukunndye ishiwaa neeny shaasa kulewaa Mmisri ulya kwansuruma nsangeny. Mose keereya, kaamba, ‘Ate mbony ilya ilemanyika.’”

¹⁵ Naasa kyeeri Farao alemanya kakunda iwaa Mose, kyeendi Mose karisha kooka kwa Farao, kakaa urukeny lwa Midiani kakaa kufii na kirori kya mura.

¹⁶ Naasa nkohani wa Midiani mmbo eetiri vana va kyika mfungare nawo vakasha isheraa mura, vakaishura fiiya fyawo mura naambo vaniinge findo fya ndeye waawo.

¹⁷ Veesa findo vakasha vakavaumbuta, kyeendi Mose kasalala kaveekkya, kaniinga findo fyawo mura.

¹⁸ Kyeeri valefika kwa nde waawo Reueli, kaamba, “A mmbo kyava inda elyi inu mwawuya uviny?”

¹⁹ Ni Mmisri umwi alwaauwa maakony a veisa findo, na mmwasi yeefo, karaiya mura kaniinga ironda.

²⁰ Kavia vefu vakwe, “A nkwi akainy? A nkwi mwara nndu yeto? Endemmbaangeny nashelya shoonga.”

²¹ Mose kalanga ikaa kwakwe, nawe kanninga mfu wakwe, Sipora.

²² Nawe Sipora kairya Mose mwana wa womi, kammbaanga Kershomu, kaamba, “Mmbo shikee muny urukeny weny.”

²³ Naasa numa ya mikonu yeyo mangyi wa Misri kafwa; vana va Israeli vakarovywa kimaruma kya ushinga elo, vakakapa kiiyo kyikarwa kikafikkya Iruva kimaruma kya ushinga elo.

²⁴ Iruva keeta kiiyo kyawo, Iruva kakummbwa kyaasa kilya kyakwe alevikkya Abrahamu na Isaki na Yakobo.

²⁵ Iruva kalollya ilyiswa ukyiva lwa vana va Israeli, na Iruva kamanya ukyiva lwawo.