YUUKA 19 - BIBILLYA Mareiyo Meele a Iruva

Vaisraeli Ifumbuu lya Sinai

¹ Naasa kwikee mwiiri wa kararu uka Vaisraeli vambuka Misri, nkonu yeto mweni vakafika kasa ka Sinai.

² Nawo llya valemaa yuuka Refidimu neefika kasa ka Sinai, vakaimuya alya kasa kalya, Israeli vakamanyau ulale yoo mbee ya ifumbu.

³ Mose kasaama uwe kwa Iruva, Nndumi Iruva kammbaanga auka efo ifumbuny, kaammba, “Mmbo kusheviaa mmba ya Yakobo, neevia vana va Israeli marero yaa;

⁴ Mulelollya kindo shiletannya Vamisri, neeni shamwipoo na maaru a ngoru, yeni shamoomuya kwakwa.

⁵ Naasany ulaalu kwakooya mushitaa unyanga lwakwa neetira kyaasa kyakwa, llyo mushevaa vandu vakwa vasauwe ngota vandu vengyi woose, mashika ulana woose nalo llwakwa,

⁶ neeni mmbo mushevaa kwakwa umangyi lwa makohani, na ufyari weele. Yaa nng'u marero kushevia vana va Isreli.”

⁷ Mose keenda kavaanga vamiku na vandu, kavarambuya mbony yeto toose, shaasa Nndumi Iruva alemmbia,

⁸ Vandu woose vakaarannya vakairikya woose, vakaamba, “Fyoose efyo Nndumi Iruva alekuvia, lushetanaa.” Na Mose kavia Nndumi Iruva shaasa vandu valeamba.

⁹ Nndumi Iruva kavia Mose, “Kushelollya shikusheya shikee ifishiny iroo, naambo na vandu yeva veete shiireraa neewe, naambo veedimi ikwiirikya kyeeri kyoose.”

¹⁰ Nndumi Iruva kavia Mose, “Enda yaata vandu yewo, mashoreny inu na ndesi, nawo vasangye soori tawo.”

¹¹ Vakudeesye kya nkonu wa kararu, mashika nkonu yeto wa kararu Nndumi Iruva asheolokaa auka efo Sinai ifumbuny vandu woose valollye.

¹² Neewe kushevavikya minyanu, kwaambe, “Kwiiseny, mulasaami yaa-fo, nta mulapaani nnyanu-fo, na nndu yeto ashepaana ifumbu mmbo ashewaawaa.

¹³ Na nkwifoo nndu atiri mumu wempaana-fo, llyo mmbo ashekapwaa na mawe ao ifumu, kavaa nndu wa vandu ao kindo kitiri muu, mmbo awaawaa. Kyeeri iranda lyishekapwaa llyo vasheserikyaa na yoo ifumbuny.”

¹⁴ Mose kaoloka ifumbuny kafika yoo vandu vakai, kavailyisa nawo vakailyisa soori tawo.

¹⁵ Kavia vandu, “Kudeesyeny fika nkonu wa kararu, mulakae kufii na nndu wa kyika.”

¹⁶ Kwikifika nkonu wa kararu, kyeeri kya ngama, ngova tikafika fika na fimwii fikamika, na ifishi iroo yoo ifumbuu, na unyanga uniini lwa iranda lukaitiwa. Vandu woose vakairyaa na irerema.

¹⁷ Naasa Mose kauta vandu valya ulaleny, kaveende vashekwaanannya na Iruva, vakasalala alya kitaari ya kwasinde ya ifumbu llya.

¹⁸ Na ifumbu lyoose lya Sinai lyikoota nsu, mashika Nndumi Iruva mmbo alesha sha muro, na nsu eto wakwe ukasha nsu wa ituuru, ifumbu lyoose lyikarerema nnu.

¹⁹ Na kyeeri unyanga lwa iranda lyilya luleengera nnu, Mose karera, na Iruva karouwa na unyanga.

²⁰ Nndumi Iruva kasokyau kulya urorony lwa ifumbu, Nndumi Iruva kavaanga Mose nasaame kulya urorony lwa ifumbu. Mose kasaama nafo.

²¹ Naasa Nndumi Iruva kavia Mose, “Oloka si, kundeikimba vandu, valashepara shia vasembeye kufii isheimaiya mashika veengyi vawo mmbo vashesarumyaa.”

²² Na Vakuhani yewo vasheshaa kufii na Nndumi Iruva nkuti akwiilyise, naambo Nndumi Iruva nalasheimukapa.

²³ Mose kavia Nndumi Iruva, “Vandu yeva mbashidimaa iserikya ifumbu elyi-fo, mashika kuleluvia luvike nnyanu naambo vandu valaidimi isembeya kufii.”

²⁴ Nndumi Iruva kammbia, “Enda oloka, kuuke-fo kusaami ando amwi na Aron, kyeendi makohani na vandu valaire vafike kufii na Nndumi Iruva-fo, naambo Nndumi Iruva nalashevakapa.

²⁵ Naasa Mose kaoloka kandevavia.”