YUUKA 18 - BIBILLYA Mareiyo Meele a Iruva

Yetro Kyeny kwa Mose

¹ Naasa Yetro Nkohani wa Midian, ndeye-a-nka wa Mose keeta mbony eto Iruva aletannya Mose, na vandu vakwe va Israeli, shaasa Nndumi Iruva alevauta kulya Misri.

² Llyo ndeyanka wa Mose Yetro, keepoo Sipora, we nka wa Mose kammbiira,

³ ando amwi na vana vakwe vavii, umwi waao ni Gershomu, kyeyaamba, “Yeny shekee muny urukeny weny,”

⁴ neeto ungyi evangwa Eliezeri, mashika aleamba, “Inu yeto wa vande vakwa mmbwe aleva ngarami yakwa, kashileta na usu lwa Farao.”

⁵ Naasa Yetro ndeyanka wa Mose ando amwi na nka wa Mose na vana vakwe vavii vakasora Mose kulya kasa, yoo ando emmannya ulale yoo ifumbuny lya Iruva,

⁶ nawo kammbia, “Yeny Yetro ndeyanka wafo, mmbo shasha kwafo shiriani na nka wafo ando amwi na vana vany eva vavii.

⁷ Mose kasomukkya yaambya ndeyanka wakwe, kafirya-ndi kammiminda, vakakuvesa mbony, vekimaa ikwiidikira vakaanga mmba.”

⁸ Mose kavia ndeyanka wakwe mbony toose shaasa Nndumi Iruva aletannya Farao na Vamisri kimaruma kya Israeli, na kya findo fyoose finiini filevakooya efo shia, na shaasa Nndumi Iruva alevakira.

⁹ Yetro kalooka nnu kimaruma kya mesha moose Nndumi Iruva aletannya Israeli na shaasa alevaauwa maakony a Vamisri.

¹⁰ Naasa Yetro kaamba, “Nndumi Iruva naarafumwa yeto alemwauwa efo maakony a Vamisri, na wokony lwa Farao, yeto aleauwa vandu yeva vauke maakony a Vamisri.

¹¹ Ulaalu shammanya dede, Nndumi Iruva mmbo akee uwe ya maruva moose, yee, mashika Vamisri mmbo vekemutannya fya kinyala.”

¹² Ndeyanka wa Mose Yetro keengye Iruva kiraso kyeekora na muro, na Aron kasha nan'gu na vamiku woose va Israeli, naambo vashelya shoonga ando amwi na ndeyanka wa Mose yoo mbee ya Iruva.

Isauwa lya Valeti

¹³ Naasa elyi ndesi Mose kakaa rembo naambo naanduye vana va Israeli, nawo vakasalala veringitye Mose uka ngama fika nkwaany.

¹⁴ Naasa ndeyanka wa Mose ekilollya shaasa Mose akeetannya vandu, kammbia, “A mmbo kukeetannya inda vandu? Niindo kukaa rembo yoo yewe kumuni na vandu woose vakuringitye yewe kumuni uka ngama fika nkwaany?”

¹⁵ Mose kavia ndeyankaakwe, Mashika elyi vandu vakunndye ishisheya yeny tupu, naambo varere-u na Iruva.

¹⁶ Vakantin'gwa nkindo mmbo vashisheyaa, neeny shavaanduya naasa shawoora na mavavaso a Iruva,

¹⁷ Ndeyanka wa Mose kammbia, “Shaasa kukeetana nshi kisha-fo!

¹⁸ Mmbo kushevaa mfwa-fwa deny, na vandu yeva vafo-da, mashika mbony eti mmbo tikee shiroo nnu kwafo, nta nkushidimaa itaanndwa yewe kumuni-fo.

¹⁹ Arannya ulaalu irero lyakwa na Iruva nakee neewe kyeeri kwasalala mbee ya vandu naambo kuvike mbony tawo mbee ya Iruva.

²⁰ Yewe mmbo kushevalosha mavavaso na uramba lwawo na shia isumani ilatya na kindo kivasumannyi itana.

²¹ Na lyingyi kuruuye kunu vanduny eva, vandu vatiri wiidimi, vaireiye Iruva, vandu va dede vasuuye iwarya findo fya nnga, kuvavike vavasalallye, vasalallye fiku makumi, na fiku, na mayana na makumi araanu, na ikumi.

²² Vave mmbo vashaanduyaa vandu nkonu simu na kyeeri vakooyaa-fo kindo kyammbalema, llyo vakweenngye yewe, kyeendi marero madu mose vamaa wo-veni, naasa llyo yewe kushewonisaa mwaanya mmwasi, nawo kive mmbo vaipoo irio lyawo ando amwi neewe.

²³ Naasa kwantana indo shaasa Iruva akuvavasyaa, nkusherovywaa-fo, na wo nndu mmbo akukayaa na ufoo.”

²⁴ Naasa Mose keeta kilya ndeye-yaa-nka ammbia, katana indo shaasa alemmbia.

²⁵ Mose kasauwa vandu vatiri wiidimi naambo vasalallye, fiku, mayana, makumi araanu, na va ikumi.

²⁶ Vakaanduya vandu wo nkonu, mbony shiroo tupu to vakeenngye Mose, to mbony shidu vakatimaa veni.

²⁷ Naasa Mose kalakana na ndeye-yaa-nka wakwe keenda, kandefika urukeny lwakwe muni.