YUUKA 12 - BIBILLYA Mareiyo Meele a Iruva

Pasaka

¹ Nndumi Iruva karera na Mose na Aron kulya urukeny lwa Misri kavavia,

² Mwiiri yeu nto ushevaa mapookyony a yeekyena miiri kwany; nato mmbo ushevaa nto mwiiri wa mbee wa mwaaka kwany.

³ Rereny na ironda lyoose lya vana va Israeli muvavie, “Nkonu wa ikumi wa mwiiri yeu wo nndu kwany naipoo ngurana ya suva kiinani na yeekyena lya mmba ta vande vany, ngurana ya suva kwa vandu va wo mmba imwi;”

⁴ na kwakooya vandu va mmba imwi ni vaangu nnu kwa ngurana yeyo, naasa we na vamrasa wa kufii vaute ngurana imwi, kiinani na yeekyena lya vandu, shaasa wo nndu ashidimaa ilya, niindo mushevikaa yeekyena lyany kimaruma kya ngurana yeyo.

⁵ Ngurana yeyo ilatire mfere, ya suva ya mwaaka umwi, musauwe efo moonriny ao efo mburuny ta suvana.

⁶ Neeni mmbo mushetideesya fika nkonu wa ikumi na kaana wa mwiiri eto, na ironda lyoose lya vana va Israeli vatishishe nkwaany.

⁷ Nawo mmbo vashiipoo samu ya vayo na yaamba efo fyeekony fya uwe fya mmba yoo vakee ilyiiya.

⁸ Mmbo vashelyaa nyama ya vayo kio ekyo kyeni, ikeeshikaare na muro ando amwi na nkate ulatiri ntarang'o, ando amwi na nyany tivavaa.

⁹ Mulalye mbisi-fo, nta yeekora na nungu-fo, ikaarwa na muro; nrwe wa vayo na marende, na nyama eto ta ndewuny.

¹⁰ Nta mulasaare-u kindo kufike ngama-fo, kyeendi kindo ekyo kisaa mmbo mukimamitaa na muro.

¹¹ Mmbo musheilyaa mwikufiningye kisiny, mwiree fyaaru fyany na misengye maakony any, mulye, nnyo Pasaka ya Nndumi Iruva.

¹² Mashika mmbo nsheeraa efo urukeny lwa Misri kio ekyo, nshekapa vana va mbee woose va Misri va vandu na mafisi neeny nsheutyaa maruva a Misri uvingo, ni yeny Nndumi Iruva.

¹³ Na samu ilya mmbo ishevaa wende efo kwany, efo mmbeny mukai neeny kyeeri nshelollyaa samu yeyo, mmbo nsheiraa, mure mulaonisa ngapo imuvavise kyeeri nshekapaa uruka lwa Misri.

¹⁴ Na nkonu yeu mmbo ushekumbuwaa, nato mmbo usheva nkonu nniini wa Nndumi Iruva. Mmbo ushevaa nkonu nniini kwa marika any moose, ni ivavaso lya llung'anu.

Suku-kuu ya Nkate Ulatiri Ntarang'o

¹⁵ Mmbo mushelyaa nkate ulatiri ntarang'o ando a mikonu mfungare, nkonu yeto wa kipooka mmbo musheutaa kindo kyoose kitarang'aa efo mmba, na nndu yeto ashelyaa nkate utarang'aa nkonu wa mbee fika wa nfungare mmbo ashelakaniswaa na Israeli shoose,

¹⁶ Nkonu wa mbee mmbo mushevikaa ironda yeele, na nkonu wa mfungare kiwo, llyisherundwaa ishora nta lyimwi nkonu eto-fo, kuuta ilya yeni.

¹⁷ Neeni mmbo mushetiraa nkonu yeto wa mikate ilatiri ntarang'o, mashika nkonu yeto mweni mmbo nsheutaa maronda any nooke Misri; nkyo muringe nkonu yeto kyeeri kyoose kya muu wany, lyive ivavaso lya llung'anu.

¹⁸ Mwiiri wa mbee nkonu wa ikumi na kaana, kyeeri kya nkwaany, mmbo mushelyaa mikate ilatiri ntarang'o, kufike nkonu wa makumi avii na lyimwi nkwaany.

¹⁹ Ando a mikonu mfungare ntarang'o ulalollywa mmba kwany-fo mashika nndu yeto ashelyaa yeto utiri ntaran'go, yeto mmbo asherauwaa deny na Israeli nave nndu muny ao yeto awonikye-fo,

²⁰ Mmbo mushelyaa mikate ilatiri ntaran'go.

Pasaka ya Mbee

²¹ Naasa llyo Mose kavaanga Vamiku va Israeli kaavavia, “Endesauweny ngurana ta suva wo mmba, mushishe pasaka.

²² Mwipoo mare a hisopo, mulyikape efo samuny muivikaa pakuriny; na yaamba kyeeko kya uwe fyeeko fya myaango na kulave nta nndu umwi asomukaa efo mmba-fo fika ngama.”

²³ Mashika Nndumi Iruva asheiraa nashekapa Vamisri yewo, na elyi ashelollyaa samu yeyo efo fyeekony mmbo asheiraa, nakyillye mmba yeyo, nta nnyasheraa yeto mwikapa nashemukapa yeni-fo.

²⁴ Neeni mmbo musheringaa mbony yei ive ni ivavaso kwafo na kwa vana vafo llung'anu.

²⁵ Na kyeeri mushefikkya uruka elo Nndumi Iruva ashemuningaa shaasa aleluvikkya kyaasa, llyo mushelatyaa nndumwa yeu.

²⁶ Na kyeeri vana vany vashemuvesaa, “Ifura elyi llyeekyi?”

²⁷ Llyo mushevaviaa, “Ni kiraso kya Nndumi Iruva kya Pasaka, mashika llya aleira kakyillya mmba ta vana va Israeli kulya Misri, kyeeri alewaa Vamisri na yese kalukira. Vaisraeli vakakwiinyika vakainndya.”

²⁸ Naasa vana va Israeli vakandetana indo, shaasa llya Nndumi Iruva alevavasya Mose na Aron, nawo vakatana indo.

Ufu lwa Mwana Mmbee

²⁹ Naasa kwikyifika kio nnang'ani Nndumi Iruva kawaa vana vavee woose va Misri kupookkya mwana mmbee wa Farao yeto muya umangyi kufikkye mwana mmbee wa nndu akee kifungony, na ekyo kivee kyoose kya mafisi moose.

³⁰ Farao kakupoo kio, we na varundi vakwe woose, na Vamisri woose, kukasha-fo kiiyo kiniini urukeny lwa Misri, mashika nkulekaa-fo nta mmba imwi alandefwa-fo nndu-fo.

³¹ Kavaanga Mose na Aron elyi kio, kaamba, “Kweeteny, ukeny kwa vandu vakwa, neeni na vana va Israeli, endeny mundeinndya Nndumi Iruva shaasa muletereva.

³² Kamareny ng'umbe tany na moonri shaasa muleamba, endeny neeny mundeshiterevya mbora.”

³³ Vamisri vakaitika Vaisraeli naambo wooke efo kwawo sere, vakaamba, “Lulashesia loose.”

³⁴ Vandu vakaipoo nswa wawo ulandevikwa ntarang'o ando amwi na fiiya fyeeriya nswa vakafinga na soori vakeekera meeveny.

³⁵ Vana va Israeli vakatana shaasa Mose alevavia, “Vakavia Vamisri vavaniingye fiiya fya fesa na saabu, na soori.”

³⁶ Nndumi Iruva kaniinga Vamisri iinndya Vaisraeli, vakavaniinga wo kindo shaasa valekunda. Ni indo kileva Vaisraeli vakasoka Vamisri usimba lwawo.

Vaisraeli Wooka Misri

³⁷ Vana va Israeli vakauka Ramesesi vakafika Sukoti, vandu yewo woose yeekyena lyawo veefikkye fiku mayana arindaru womi veshendaa na marende, kuuta-fo vaka na vana.

³⁸ Na vandu vengyi veengyi vakasasanga nawo vakasama, na moonri na ng'umbe findo fiingyi nnu.

³⁹ Nawo vakasongosya nkate ulatiri ntarang'o na nswa ulya valeipoo, llya valeuka Misri, mashika mmbulevikwa ntarango-fo, mashika valeipowa vauke Misri uviny, nawo nta mbeerie kishau-fo.

⁴⁰ Fyeeri fya vana va Israeli fyekaa misri fyekee myaaka mayana aana na makumi araru.

⁴¹ Kwikyifika myaaka yeyo mayana aana na makumi araru, nkoonu yeto mweni llyo maronda moose a Nndumi Iruva aleuka Misri.

⁴² Ni kio kyekumbuwa deny elyi Nndumi Iruva alevauta efo urukeny lwa Misri, ekyi nkyo kio kya Nndumi Iruva kio kitiri vana woose va Israeli, llya Nndumi Iruva alelala rembo kikee kyeekumbuwa ni vana va Israeli na marika awo moose.

Uramba lwa Pasaka

⁴³ Nndumi Iruva kavia Mose na Aron, “Ivavaso lya Pasaka llyo elyi, Nndu muny nalalye Pasaka-fo.”

⁴⁴ Kyeendi ishinga lya nndu lyikee yuure na fesa, muni kammaa ilyirina, llyo ashidimaa ilya Pasaka.

⁴⁵ Nndu ashiira ao nndundi atawaa weesi lwa nkonu wo valasheilya-fo.

⁴⁶ Na Pasaka ilyiiywa efo mmba, ilasomutwa irawa mmba ingyi-fo, kulasomute nyama ya vayo-fo, na nta ifua lya vayo lyilafishwa-fo.

⁴⁷ Na ironda lyoose lya vana va Israel mmbo vashetanaa indo woose.

⁴⁸ Na nndu muny kwakooya akunda isanga neewe yaakana pasaka, womi woose va mmba yakwe varinwa mbele, llyo asheny yaakana pasaka, nawe mmbo ashevaa sha nndu awonkikye kwany, lyo nndu nndumi moose nalakee nrini nalaakani tere-fo.

⁴⁹ Ivavaso elyo ni lyimwi kwa vandu woose, kwa Mwiisraeli na kwa nndu muny yeto akee kwany.

⁵⁰ Ni indo vana va Israeli woose valetana shaasa Nndumi Iruva alevavasya Mose na Aron, nawo vakatana indo.

⁵¹ Na nkonu ukava eto mweni, Nndumi Iruva kauta vana va Israeli kulya Misri na maronda awo.