YUUKA 10 - BIBILLYA Mareiyo Meele a Iruva

Ngapo ya Nyanya, Nrie

¹ Naasa Nndumi Iruva kavia Mose, “Anga kwa Farao mashika yeny shammumisa nrima wakwe, naambo shoore ngyende takwa kwawo;

² naambo neewe kwiidimi yoongoya mwana wafo na nshuku wafo, kitavanu shiletannya Vamisri, na kya ngyende yeto shiletana vakalollya, naambo mumanyi dede yeny ni Nndumi Iruva.”

³ Naasa Mose na Aron vakamelollya Farao vakammbia, “Nndumi Iruva wa Vaebrania mmbo akuvia indi, ‘Ni fika indii kushelemaa ikunyiisa mbee yakwa? Niinga vandu vakwa mumu vandeshirunndya.

⁴ Na kwakooya kweengera ivaima mumu wa yeenda, lola, ndesi mmbo nshendee nrie urukeny kwafo,

⁵ tisikkye sumbai shoose, nndu alemwa ilollya uteeri, nato mmbo tishelyaa findo filya filekyia fikasaa-fo llya mmbwa ilya ya mawe ilekapa, nrie yeto mmbo tishelyaa wo nri umyaa efo maremeny.

⁶ Na mmba yafo, na mmba ta varundi vafo na ta Vamisri woose mmbo tisheishwaa nrie ngata ya vayo nta vande vafo na vasaawoo mbalelollye-fo, uka elyo vepooka ikaa ulaniny na fika inu. Veekimaa vakainduka vakasomuka.’”

⁷ Naasa vandu va Farao vakammbia, “Nndu yeu mmbo asheva nnreyo weru fika indii? Niinga vandu yewo mumu veende immbikkya mwiinndye Nndumi Iruva, Iruva waawo, ao nkwalemanya fika ulaalu, sheelyi Misri yammaa ilyamarika?”

⁸ Mose na Aron vakeendwa lyingi kwa Farao nawe kavavia, “Endeny mukanderunndya Nndumi Iruva, Iruva waany; kyeendi yewo vashendaa mmbo va-kyi?”

⁹ Mose kammbia, Mmbo lushendaa na vasoro veru na vamiku veru na vana veru na vefu veru, lwipoo na moonri eru na ng'umbe teru, naambo lukooye ivikkya Nndumi Iruva nndumwa.

¹⁰ Nawe kavavia, “A paa kitimu, nshishemuniinga mumu mweende ando amwi na vana vany na vaka vany-fo, mashika efo mbee yaany nshi kusha-fo.”

¹¹ Ekyo oode, endeny yeni vandu vaniini veni, munderunndya Nndumi Iruva; mashika nkyo mukunndye. Nawo vakaumbutwa yoo mbee ya Farao.

¹² Nndumi Iruva kavia Mose, “Orrwa woko lwafo uwe ya uruka lwa Misri kweende nrie urukeny tilye mare moose, filya filesaaro-fo ni mmbwa ilya ya masaawe.”

¹³ Mose kaorrwa mbiiri yakwe uwe ya Misri, na Nndumi Iruva keende uraato luuka taari ya ngama, nkonu piti, na kio tara-raa, kyeeri kulekya uraaato lulya lukeende nrie.

¹⁴ Nrie yeto tikakwaana Misri koose, nta nkulenkaa-fo nrie sheeto ukya elyo-fo nta numa ya vayo nkushekaafo tingyi tifye-indo-fo.

¹⁵ Mashika mmbo tilesikkya sumbai shoose, na ireema lyikawoya uruka, nrie yeto tikalya wo kindo kimyaa na ndunda toose tilerewa-fo ni mmbwa ilya ya mawe nkulerewa-fo nta imburu lyimwi-fo, nri nta imburu lya remeny-fo, urukeny lwa Misri loose.

¹⁶ Llyo Farao kaangusya ivaanga Mose na Aron kaamba, “Shiletannya Nndumi Iruva waany ulyamari neeni-da.

¹⁷ Naasa ulaalu, shamutereva, shisaryeny ulyamari lwakwa ikamba yelyi yeni tupu, mutereve Nndumi Iruva waany, nashuute ngapo yei ya ufu.”

¹⁸ Mose kooka kwa Farao, katereva Nndumi Iruva.

¹⁹ Naasa Nndumi Iruva keende uraato lwa taari ya nkwaany, lutiri finya, lukavivita nrie tilya tikandesiiya yeeveny ya Shamu na nkulesaa-fo nta nrie imwi urukeny lwa Misri-fo.

²⁰ Kyeendi Nndumi Iruva kaumisa nrima wa Farao, nawe nalaniinge vana va Israeli mumu veende.

Ireema

²¹ Nndumi Iruva kavia Mose, “Oroya woko lwafo iruveeu lyishe ireema Misri koose, naambo vandu veende ireeminy.”

²² Naasa Mose kaoroya woko lwakwe iruveeu, naasa kukava-fo ireema iroo urukeny koose ando a mikonu iraru;

²³ nkwii-fo nndu aleidima ilollya ungyi-fo, nta nkwii-fo nndu aleuka alya ekai-fo, ando a mikonu iraru sele; kyeendi wo Vana va Israeli vaka-kaa seny yoo ando vekai.

²⁴ Farao kavaanga Mose kammbia, “Naasa ulaalu endeny mukanderunndya Nndumi Iruva moonri any na ng'umbe tany to tirewa-u, indi vana vany, wo veende neeni.”

²⁵ Mose kaamba, “Ni kuti lweende lurye na findo fyeru fyeenderasya Iruva, naambo lundeshishya Nndumi Iruva, Iruva weeru firaso fyekora na muro.

²⁶ Maronda eru moose mmbo ashendaa neese, nta mbungashu sheni nnyisaa numa-fo, mashika mfo lushesauwaa findo fyeerunndya Nndumi Iruva kutani elyi lushefikaa.”

²⁷ Kyeendi Nndumi Iruva kaumisa nrima wa Farao, alakunde ivaniinga muumu veende.

²⁸ Farao kavia Mose, “Kweete-deny, uka yaa shikai, shilakulollye lyingyi-fo, nkonu yeto nshekulollyaa lyingyi, mmbo kufwaa.”

²⁹ Mose kaamba, “Kwanrera nisha”, neeny, “Nkukyilollya lyingyi kisangu kyakwa-fo.”