YUUKA 1 - BIBILLYA Mareiyo Meele a Iruva

Vaisraeli Valyiswa Ukyiva Misri

¹ Marina a vana va kyuumi va Yakobo valeanga Misri, wo nndu na vammba yakwe amwi nawe mmbo yeva.

² Ruben, na Simeon, na Levi, na Yuda;

³ na Iskari, na Sabulon, na Benyaminy;

⁴ na Dani, na Naftali, na Gadi na Asheri.

⁵ Na vandu woose valya vaukye kwa Yakobo ni makumi mfungare; na Yosefu we mmbwe eto ekee efo Misri uka elyo.

⁶ Yosefu kafwa na vana va maye woose, na vandu woose va irika llya.

⁷ Na ngyeeri ya Israeli mmbo vekeefwarika deny, neefumbuka nnu, na yeengera iva veengyi, vakaengera itira finya, na uruka lulya lukaishurwa niwo.

⁸ Naasa kashekwipoo Mangyi kashillya Misri, naleishi Yosefu,

⁹ Kavia vandu vakwe, “Loleny, vandu va vana va Israeli ni veengyi, nawo vakatira finya ngota yese.

¹⁰ Kyasia! Luruuye nshia ya iima, valashefumbuka; na lyingyi, ikasha fira, nawo valashekutira na vakiduva veru vakapani neese, na yuuka urukeny elu.”

¹¹ Naasa, vakavika vevasalallya naambo vavalyise ukiva na mario awo. Nawo vakatannya Farao miri yeevika firaambu nnyo Pitomu na Remesesi.

¹² Kyeendi shaasa valeengera ivalyisa ukiva niindo valeengera ifumbuka na yeengera ikwaana urukeny. Nawo vakasuwa kimaruma kya vana va Israeli.

¹³ Vamisri vakasisya vana va Israeli kwa wiitiki;

¹⁴ vakaallwa suku tawo tikavava kimaruma kya mashora maroo, mashora a yeela, lya mmba na matofwari, na mashora moose a mareminy, mashoreny yoo moose mmbo valevasisya kwa unyaasi.

¹⁵ Naasa, mangyi ya Misri karera na vakyeku va mwana wa Vaebrania, umwi irina lyakwe ni Shifra, na wa kavii irina lyakwe ni Pua;

¹⁶ Kaamba, “Kyeeri mukeekkya vaka va Kiebrania elyi vakeira vana, kwankooya ni mwana wa womi, naasa mmbwaeny. Kyeendi kwankooya ni wa kyika, we nakee na muu.”

¹⁷ Kyeendi vakyeku yewo va mwana vekee vandu veereiye Iruva, valatani shaasa valevavasywa ni mangyi ya Misri, nawo vakara vana yewo va kyuumi na muu.

¹⁸ Naasa, mangyi wa Misri kavaanga vakyeku ewo va mwana kavavesa, “Nkyiki elyi mukeetana indo, mukara vana va kyuumi vakae na muu?”

¹⁹ Vakyeku va mwana vakavia Farao, “Mmashika yewo va Kiebrania nshi sha vaka va Ki-misri-fo; yewo mmbo vakee vatakusu, wo mmbo vawonaa mwana kulaore nkyeku wa mwana ansha.”

²⁰ Naasa, Iruva katannya vakyeku va mwana mesha, na vandu yewo vakaengereka nnu, vakeenda mbee na yeengera itira finya nnu.

²¹ Mashika llya vakyeku va vana vekee vandu vaereiye Iruva, Iruva kavavikkya mbora, vana va Israeli vakeengereka nnu.

²² Naasa Farao kavavasya vandu vakwe kavavia, “Wo mwana wa kyuumi awonikaa mmbo asheerwaa mureny wa Naili na wo mwana wa kyika, we narewa na muu.”