YOSUA 7 - BIBILLYA Mareiyo Meele a Iruva

Ulyamari lwa Akani

¹ Kyasia, elyi numa vana va Israeli vakalyamarya Nndumi Iruva kyeendwa mfindo fyeele. Mmbo kyeva indi, nndu evaangwaa Akani mwana wa Karmi, mwana wa Sabdi mwana wa Sera, wa ufyari lwa Yuda, we Akani mmbo eepoo fiiya fyeele. Naasa unyafi lwa Nndumi Iruva, lukawoya vana va Israeli kyeendwa mmbwe.

² Naasa Yosua koota vandu vauke Yeriko veende muriny wa Ai, ufiitani na Betafoni, nnyo taari ya ngama ya Beteli, eevaviaa, “Endeny saaminy mundesaiya uruka, nawo vakandesaiya Ai.

³ Veekiwuiya Yosua vakammbia, Vandu veru valasheenda woose-fo, veende sha fiku fivii firaaru indi tupu, vandekapafo, kulasheatara vandu woose veende-fo-fo, mashika vandu va vayo ni vaangu-da.”

⁴ Naasa vakarumwa-fo vandu fiku firaaru nsi. Veekifika-fo vakarishiswa ni vandu va Ai.

⁵ Vandu makumi araru na varindaru vakawaawa, vandu vakarishiswa vauka ngiriny ya Shebarimu fika irikony. Finya tawo tikeeleleka vakava mura sele.

⁶ Yosua na vasongoru wooroye va Israeli vakarandwa masara awo, nawe Yosua kawa si kifulufulu yoo isandukuny lya mavavaso, kakaau fika nkwaany. Vakoollya mirwe yaawo kiluulyi.

⁷ Yosua kavia Nndumi Iruva, “Woi Nndumi Iruva a nkyiki-dwa mmbee elyi kuleruuta vandu yeva vakakillya Yordan, naambo kusheluvika maakony a Vaamori neelumamita? Kyeevaa kyeni kukooye lweekukaya kwakulya ya Yordan!

⁸ Woi Nndumi Iruva, A shaambe-ki Veesraeli vanrishiswa m-vakiduva vawo?

⁹ Mashika lyo vakanaani na vandu woose va ngyuruka eti nkuti veete mbony yeti, nawo valusengetye neereta irina lyeru, ulany koose. A kya irina lyafo ilyimbi mmbo kivaa inda?”

¹⁰ Naasa Nndumi Iruva kavia Yosua, “Yewe Kwiipoo! A nkyiki elyi kulele yaandi si kyaasha indo?

¹¹ Israeli mmbo valelyamara, vakafisha kyaasa kilya shilevika nawo, vakeepoo findo fyeele, vakafiiva, na yaamba wongo vakafisuruma neesanda na findo fyawo veni.

¹² Ekyi nkyo kimaruma vana va Israeli valashidimaa isalala mbee ya vakiduva vawo vakavarisha, mashika elyi vammedengwa. Yeny nshikikee neeni kwakooya mulashuutaa nsindara yeto neemamita findo efyo.

¹³ “Kyasian-te, salala! Kundeilyisa vandu neevavia, kwiilyisen mukudeesye ndesi, mashika Nndumi Iruva wa Israeli aamba indi, kindo ekyo kyeele nkwafo kikai ewe Israeli. Nkukyiaa mbee ya vakiduva vafo-fo kutani kwaniingya kindo ekyo kyeele kikee kwafo.

¹⁴ Naasa ndesi ngama mmbo musheshaa mbee yakwa, ufyari kwi ufyari, nao vashe mmba kwi mmba na numa poo kwi poo veere mbee ya Nndumi Iruva na numa deny nndu kwi nndu.

¹⁵ Na nndu yeto asheiraan nakooywa mmbwe yeto atiri kindo ekyo kyeele, yeto mmbo ashekorwaa na muro ando amwi na findo fyakwefyoose, kimmba afisha kyaasa kya Nndumi Iruva, katana kya utondo kunu Israeli.”

Akani Alyamara

¹⁶ Naasa Yosua kakupoo ngama nraasi, keende vandu ufyari kwi ufyari. Ufyari lwa Yuda lukeenda.

¹⁷ Keetan mmba ta Yuda, mmba ya Vasera,

¹⁸ nawo nndu kwi nndu, Sabdi katirwau nasembere vandu va mmba yakwe umwi umwi. Llyo Akani mwana wa Karumi mwana wa Sabdi mwana wa Sera wa ufyari lwa Yuda kautwau.

¹⁹ Yosua kavia Akani, “Mwanakwa mmbo shakutereva, niinga Nndumi Iruva wa Israeli nnduma-te, kukurye kwakwe paa, kushivie shaasa kuletana, kulasurumaa nta kindo.”

²⁰ Nawe Akani karouwa Yosua kammbia, “Ni dede shilelyamarya Nndumi Iruva wa Israeli. Mmbo shiletana indi.

²¹ Kyeeri shilelollya soori imwi shisha yuukye Babilony nnang'ani ya findo lulelyima ni fesa mayana avii na kiiya kya saabu kitiri uroo lwa kyenga kya kilo, shafilanga shafiipoo, mmbo shisumyi si uteeriny yefo yeemeny lyakwa na fesa mmbo ikee kwasi ya findo yefyo.”

²² Llyo Yosua aleruma vandu vakarisha indelola efo yeemeny shaasa Akani aamba, vakavekooya indo, fikee fisummyi nsangeny na fesa efo kwasi ya vayo.

²³ Nawo wakafilukkwa, vakeengye Yosua yoo mbee ya vana va Israel woose, fikarikwa yoo si mbee ya Nndumi Iruva.

²⁴ Naasa Yosua ando amwi na Vana va Israeli woose vakawarya Akani mwana wa Sera na Fesa ilya, na ikoti llya, na kiiya kilya kya sahabu na vana vakwe va kyuuni na va kika na ng'umbe takwe na mishungu yakwe na moonri akwe, na yeema lyakwe na findo fyakwe fyoose vakashefivika alya kyandeeny kya Akori.

²⁵ Yosua kavia Akani, “A nkiki elyi kwallusaveesa indi? Nndumi Iruva akusaveesaa yewe inu.” Naasa lyo yeni Israeli woose vakankapa mawe kafwa.

²⁶ Na yoo uwe yakwe vakasangirya-u usau uniini lwa mawe fika inu. Nawe Nndumi Iruva, kafweerany unyafi lwakwe. Nkyo irina lya ando alya akavaangwa ni Imungo lya Akori kufike inu.