YOSUA 6 - BIBILLYA Mareiyo Meele a Iruva

Yeriko Yatuulwa

¹ Muri wa Yeriko mmbo wekee uraye neeringwa deny kimaruma kya iiryaa Vaisraeli. Vandu mbekeyaanga nta isomuka efo muriny-fo.

² Naasa Iruva kavia Yosua “Kulolye! Yeny nsheuvika maakony afo muri wa Yeriko amwi na mangyi yakwe na vasikari wakwe vakaari.

³ Yewe na vandu valya woose vatiri fisha

⁴ Vakohani mfungare wo umwi neeboo iranda lya wombe lwa suva, mmuringityaa muri yeto lyimwi wo nkonu ando a mikonu irindaru. Veere mbee ya isanduku lya mavavaso. Nkonu wa mfungare varingitye muri ka mfungare vakohani veekabaa maranda awo.

⁵ Na kyeeri vashekapaa maranda yoo na finya, neeni elyi mushiitaa unyanga lwa maranda yoo vandu woose woongore na unyanga waasha, nato muri mmbo ushewundukyaa si. Na vandu woose llyo vavingye neefo muriny.”

⁶ Naasa Yosua kavaanga vakohani kavavia, “kurikeny isandu lya mavavaso na makohani veepoo maranda awo mfungare a mbembe ta suva, neere mbee ya isanduku elyo.”

⁷ Naasa Yosua kavia vandu, “Ireny mbee munderingitya muri, neewo varye fisha vasongwe mbee ya isanduku lya Nndumi Iruva.”

⁸ Naasa elyi Yosua amaa irera na vandu na vakohani valya varye maranda awo mfungare, vakeera mbee na Nndumi Iruva, vakasongwa veekapaa na isanduku lya kyaasa lya Nndumi Iruva lyikavasora yoo numa yaawo.

⁹ Vandu valya veerye fisha mmbo valesongwa mbee ya vakohani valya vekeekapa maranda, na valya veekee numa vakasora isanduku elyo, we vakohani vakeenda veekapaa maranda.

¹⁰ Yosua kavia vandu, Mulaende mwirorongyaafo, nta mulaitiwa-fo, kwiifo nkonu nshemuningaa muumu wa yoongora deny.

¹¹ Naasa vakarika isanduku lya Nndumi Iruva lyiringitye muri yeto, nalyo lyikauringitya lyimwi, llyo vakawuya na ulaleny vakandeemuya-fo.

¹² Elyi lya ndesi-a-vayo Yosua kakupoo nraasi, na vakohani vakeeboo isanduku lya Nndumi Iruva.

¹³ Nawo vakohani valya mfungare vakeepoo maranda alya awo mfungare a mbembe ta suva vakeera mbee na isanduku lya Nndumi Iruva, vakeenda veekapaa, na vandu valya varye fisha vakasongoya, isanduku lya Nndumi Iruva, na varingyi vengyi vakalatya numa, maranda eekapwaa.

¹⁴ Nkonu yeu wa kavii nato vakaringitya muri lyimwi, vakawayany na ulale, Vakatana indo ando a mikonu irindaaru.

¹⁵ Elyi kwamfika nkonu wa mfungare vakakupoo ngama shuru, vakaringitya muri kamfungare, nto nkonu nsi weeuringitya kamfungare.

¹⁶ Kufike lya mfungare llya vakohani valekaba maranda awo indi, na Yosua kavavasya vandu vaongore, kimmba Nndumi Iruva ambaniinga muri yeto,

¹⁷ Na muri yeu mmbo ushevaa wa Nndumi Iruva, na wo kindo kikee kunu muriny mmbo kilyamarwaa kuuta Rahabu nka yeto wa shia muni na vandu va mmba yakwe, kimmba aletana kindo kisha llya aleekya vandu veru va saa kavasuruma.

¹⁸ Neeni mulapaani ekyo kyeele-fo mashika mmbo mushekutefusaa elyi mwapaana kindo kyeele, elyi kyammaambawa ni kyeele na kwakooya vapaana ulale lwa Israeli mmbo luvaa utefusu, ludengwa, nawo veerenswa.

¹⁹ Lyo fesa na sahabu, na fiiya fya minya, fyo mmbo fikee fyeele. Mmbo fisheendwaa mba kwa Nndumi Iruva.

²⁰ Naasa vandu vakakabangaya, na makohani vakakaba maranda. Naasa kyeeri valeeta unyanga lwa maranda vakakaba ngaya na unyanga uniini nnu, ntaao isimamba wa muri ukawundukya si, na vandu vakaanga neefo muriny veelolaa na mbee, vakatira muri moose.

²¹ Naasa Israeli vakarumata findo fyoose fyeifo, womi na vaka, na vana vadu na vandu vakuu, na ng'umbe na mburu na mishungu, vakafirumata na usu.

²² Yosua kavia saa valya vavii valendesununda uruka yelo, angeny efo mmba ya nka ulya ntusi, munsomute-fo amwi na woose wa mmba yakwe shaasa mulemmbikya kyaasa.

²³ Naasa vandu valya vakaangafo, vakasomuta Rahabu na vandu vakwe woose na findo fyawo fyoose, vakasheveende alya ulalen lwa Israeli.

²⁴ Llyo vakakorany muri yeto ukamamika na findo fya vayo fyoose, kuuta fesa na sahabu na fiiya fya minya idodorye, fyo vakafireeya Nndumi Iruva.

²⁵ Lyo Yosua karinga Rahabu nka ntuusi na vandu va mmba yakwe ando amwi na findo fyawo, nawo vakakukaya na Israeli afika inu, kimmba aletannya saa valya mesha, valya valerumwa Yosua kulya Yeriko.

²⁶ Nawe Yosua kavalyisya mboo eevaviaa, Nave mundenge nndu moose yeto asheiboo lyingyi muri yeu wa Yeriko kwakwe mmbo avaa sheelyi afiyyo m-mwana wakwe mmbee, neeto mwiitana ngiri ya vayo ave sha afiiyo ni mwana mwifurumya.

²⁷ Naasa Nndumi Iruva kakaya Yosua, na nnduma wakwe ukakwaana kulya urukeny koose.