YOSUA 3 - BIBILLYA Mareiyo Meele a Iruva

Israeli Varuuka Yordan

¹ Naasa Yosua kakupoo ngama nraasi, koota vandu alya Shitimu vakandefika alya mureny wa Yordan, we na Israeli woose vakakaau mbele, varuukeny.

² Kwiikisia mikonu iraru, vashillyi vakeera efo mbeny,

³ vakavia vandu: “Elyi valollyaa isanduku lya mavavaso a Nndumi Iruva, Iruva waany lyiito mbee yaany lyiipoyyo mmakohani valevi, llyo neeni mulatye.

⁴ Lyo yoo nnang'ani yaany na isanduku elyo kukeeu mwaanya wa marende fiku fivii, naambo wo veere mbee na yoora shia, kimba mulaishi shia.”

⁵ Yosua kavia vandu, “Kwiilyiseny mbele, mashika ndesi Nndumi Iruva mmbo ashetanaa findo filandelollyo kwany.”

⁶ Naasa Yosua kavia makohani, “Ipoony isanduku lya mavavaso, muruuke musongoye vandu.” Nawo vakakurika isanduku lya mavavaso, vakasongwa nalyo.

⁷ Naasa Nndumi Iruva kavia Yosua, “Ni-inu yeni nshekung'anisaa mbee ya Israeli woose, naambo vamanye paa, mmbo shikee neewe shaasa llya shekee na Mose.

⁸ Naasa vavasyany makohani yewo veepoo isanduku lya mavavaso, kyeeri mushefikaa yoo mbai ya mura wa Yordan, salaleny efo mureny wa Yordan.”

⁹ Kyasia Yosua kavia vana va Israeli, “Oshony nayaa-te mushearanya marero a Nndumi Iruva, Iruva waany.

¹⁰ Kindo ekyi nkyo kilooraa sheelyi Iruva waany akee na muu mmbo ariani neese, nawe nta nnaraa nalaumbuta Vakanani, na Vahiti na Vahivi na Vaperii na Vagirgashi, na Vaamori na Vayebusi.

¹¹ Mulollye ro, isanduku lya mavavaso a Nndumi wa Iruveen na ulana loose mmbo lyikee ruuka Yordan mbee yaan.

¹² Ulaalu uteny vandu ikumi na vavii efo ngyufyariny ta Israeli toose, wo ufyari nndu umwi.

¹³ Na kyeeri makuheni vasheeraa mbee veerye isanduku lya mavavaso a Nndumi Iruva, Nndumi wa ulana loose, kyeeri vashesalalaa yoo mureny wa Yordan, mura yeto mmbo usalalaa yeeka uve sha usau.”

¹⁴ Naasa vandu vakakupoo efo ulaleny naambo vakillye Yordan, makohani navo varye isanduku lya mavavaso mmbo vashiiraa mbee ya vandu woose,

¹⁵ Naasa yewo veerye isanduku lya mavavaso veekifika Yordan na makohani vakavarya mura, (mashika mura wa Yordan mmbo wiishwaa ikafika efo mbai deny kyeeri kyoose kya kisie),

¹⁶ naasa mura mmbo ulesalala, ukarwa na uwe sha usau ukafika kwaasha deny fika Adamu-nto muri ukee kufii na Saretani, ng'u mura yeto usheendaa yeeveny lya Araba llyo yeeve lya shumbi, mura ukasalala, vandu vakeera ando kwaarutu kufii na Yeriko.

¹⁷ Nawo makohani yewo veepoo isanduku lya mavavaso a Nndumi Iruva vakakaarya vekee ando kwaarutu efo Yordan, Israeli vakaruuka mura veeshiiraa ando kwaarutu, kutani woose vamaa iruuka Yordan.