YOSUA 24 - BIBILLYA Mareiyo Meele a Iruva

Yosua Arera na Vandu Kulya Shekemu

¹ Naasa Yosua kasang'irya ngyufyari toose ta Israeli kulya Shekemu, kavaanga vamiku vawo woose, na vasongoru vawo, na veeleta myaandu, vakasha woose mbee ya Iruva.

² Yosua kavavia, “Nndumi Iruva wa Israeli mmbo aamba indi, Vande vany elyo mbee mmbo veekee kwakulya ya mura wa Eufrati, mashika Tera we nde wa Abrahamu, nawe ni nde wa Nahori mmbo vekee vandu va masanga vakarundya maruva engi.”

³ Neeny llyo shilevaanga-fo Abrahamu, shashemfita urukeny lwa Kanaani, shamweerya llya shilenniinga Isaki.

⁴ Isaki nawe shanniinga Esau na Yakobo. Esau shanniinga ifumbu lya Seiri lyive lyakwe, we Yakobo na vana vakwe vakandesamya Misri.

⁵ Naasa sharuma Mose na Aron, shakaba uruka lwa Misri na shia shiingi, llyo valeawuka kulya Misri.

⁶ Shoota vande vany kulya Misri, mukandekooya yeeve, Vamisri vakamusora na frasi na mitika fika alya yeeveny ya Shamu.

⁷ Nalwo kyeeri valefuuya Nndumi Iruva, Nndumi Iruva kavika ireema yoo nnang'ani kavii yaawo na Vamisri, yeeve lyikavamira. Na miso any alelollya efyo fyoose shiletana kulya Misri Numa mukakaa kasa ando a mukonu miingi.

⁸ Shashemweende fika urukeny lwa Vaamori kwakulya ya Yordan, nawo vakakabana neeni, shamweekya mukavavinga, mukaidima itirany uruka.

⁹ Llyo Balaki we mwana wa Sipori wa mangyi ya Moabu aleiboo fira nandekabana na Israeli, karuma vandu vandevaanga Balaamu we mwana wa Beori nasheveeka ivadenga.

¹⁰ Lyo yeny shalema Balaamu, we keengera imukundya mesha, mukooka maakony akwe.

¹¹ Naasa mukakillya Yordan neefika Yeriko, Nawo vandu va Yeriko vakakabana neeni. Nawo ni Vaamori na Vaperii, Vakanaani na Vahiti na Vagirgashi na Vahifi, na Vayebusi, neeny shamweekya mukavavinga.

¹² Shavamattwa mbee yaany, vamangyi yewo vavii va Vaamori vakasavaa, nta mmulekabana nawo-fo.

¹³ Neeny shamuniinga uruka elu ruu mularundyeu kindo, na miri mulaitanye mukakaafo, mukavelya na ndunda ta misabibu na miseituni mulavinyi-u.

¹⁴ Kyasia ulaalu runndyeny Nndumi Iruva-te, na nrima umwi na ngoo imwi, mure maruva a wongo deny yoo vande valearunndya kwakulya ya mura na kulya Misri, ulaalu murunndye Nndumi Iruva.

¹⁵ Kwakooya mwasukyo ni irundya Nndumi Iruva amben inu yeto mukunndye indundya, kwakooya ni maruva alya vande vany valearunndya kwakulya ya mura, ao maruva a Vaamori yewo mukee nawo, Lyo yeny na va-mmba yakwa mmbo lurunndyaa Nndumi Iruva.

¹⁶ Vana va Israeli vakavia Yosua, Ekyo kiire kwaasha neese ira lularunndya Nndumi Iruva neerunndya maruva engyi.

¹⁷ Mashika Nndumi Iruva waany mmbwe alelusaamisa aluuta kulya Misri mmba ya ushinga, katana findo finiini fya ngyende lwiilollye, kaveluringa kulya kasa shia ilya luleira kalusongoya efo urukeny lwa vandu efo luleira.

¹⁸ Nawe Nndumi Iruva koombuta vandu woose va masanga efo luleira, sha Vaamori yewo vakee kunu. Kyasia neese nkuti lurunndye Nndumi Iruva mashika mmbwe muni akee Iruva waany.

¹⁹ Yosua kavavia, “Mmushidimaa irundya Nndumi Iruva-fo, kimmba we akee Iruva mweele, we ni Iruva nalaishi ungyi, nawe nta nnyamusaryaa elyi mwatira maruva engyi-fo,”

²⁰ na kwakooya mwara Nndumi Iruva neerundya maruva engyi, llyo nawe ashemuraa namumamite, lla elyi alemmutanya mesha yoo moose.

²¹ Lyo vandu yewo vakavia Yosua, “Ekyo-fo, nkuti lurundye Nndumi Iruva.

²² Yosua kavavia, ‘Ni yeni muveni mwakureekany mukaamba mmbo mukundye irundya Nndumi Iruva.’ Vakaamba, ‘Dede yese mmbo lwakureeka indo.’

²³ Yosua kavavia, ‘Kyasia ulaalu maeny-fo maruva yoo a wongo akee kwany, mirima yaany yiindukye kwa Nndumi Iruva, Iruva waany mmbwe muni lushendundyaa na yaaranya unyanga lwakwe’

²⁴ Na vandu vakavia Yosua, ‘Nndumi Iruva, Iruva weeru mmbwe lunrundyaa, na unyanga lwakwe mmbo lushiinndyaa.’”

²⁵ Naasa Yosua kavavangisya kyaasen kilya neevakumbura lyingyi mavavaso vekee alya Shekemu.

²⁶ Kyasia Yosua kareiya marero yaa moose efo kyitabuny kya uvavaso lwa Iruva. Kawuya keepoo iwe iniini kalyisaleesa-fo yoo sindeny ya nri wa Mwaloni kufii na ando kitara kya irasya Nndumi Iruva.

²⁷ Yosua kavavia, “Iwe elyi llya ukureeki kweru, nalyo mmbo lyammiita marero yoo Nndumi Iruva alerera neese. Nalyo mmbo lyivaa ukureeki naambo mulasheera Iruva waany.”

²⁸ Eekimaa efyo Yosua kavasama wo nndu keenda kyeny kwakwe.

Ufu lwa Yosua

²⁹ Naasa llyo nsero yeu wa Nndumi Iruva we Yosua mwana wa Nuni kafwa, eetiri myaaka iyana na ikumi.

³⁰ Vana va Israeli vakamwaara ireminy lyakwe kulya Timnath-sera, kulya urukeny lwa mafumbu lwa Efraimu, mfo taari ya ndoo ya ifumbu lya Gaashi.

³¹ Nawo Israeli mbo valerundya Nndumi Iruva nisha kyeeri kyoose kya Yosua, na kya vamiku yewo veefo kyeeri kya Yosua na yewo veeshi efyo Nndumi Iruva aletannya Israeli.

³² Nang'u maffwa yoo a Yosefu alya vana va Israeli valesaamisa vauta Misri vakaarika yoo Shekemu nang'u nng'u alya Yokobo aleura kwa vana va Hamori we ndeye wa Shekemu, kataa fesa iyana, nang'u mmbo kuleva ding'u ngyeeri ya Yosefu.

³³ Na Elieseri mwana wa Aron nawe kafwa, vakamwaara alya ifumbuny lya mwanaakwe Finehasi aleniingwa kulya urukeny lwa fidooro lwa Efraimu.