YOSUA 14 - BIBILLYA Mareiyo Meele a Iruva

Minyanu ya Taari ya Ngama ya Yordan

¹ Yeti nto ngyuruka ta vana va Israeli valetira kulya Kanaani, nto Nkohani Elieeri na Yosua wa Nuni, na vasongoru va mmba ta vakuu va vana va Israeli shaasa valeavya vana wa Israeli.

² Nawo mmbo valesora kura tawo, shaasa Nndumi Iruva alevavasya Mose kya ngyufyari yeto kyeenda na kyenga.

³ Mose mmbo alemaa iniinga ngyufyari ivii na kyenga waavi lwawo, kwakulya ya Yordan, lyo wo Valevi nalavaniinge kindo.

⁴ Vana va yosefu mmbo vekee ngyufyari ivii, Manase na Efraimu. Valevi mbaleniingwa waavi lwa uruka-fo, kindo valeniingwa ni miri yeekaa, na efo mbai ya miri yeyo kuve kundo kwa yiisa findo fyawo fyeevikyavavewonisafo imutu lyawo.

⁵ Kya efyo fyoose vana va Israeli mmbo valetana shaasa Nndumi Iruva alevavasya Mose.

Kalebi Aniingwa Hebron

⁶ Naasa kyeeri ekyo vana va Yuda vakasheya Yosua, na Kalebi we mwana wa Yefune alya Gilgali, kammbia, kwiishi ninsha kindo Nndumi Iruva alevia Mose we nndu yeto wa Iruva kyakwa yeny na kyafo yewe, kyeeri kilya lwekee alya Kadesh-barnea.

⁷ Mmbo shekee wa myaaka makumi aana, kyeeri nsero wa Nndumi Iruva Mose aleshiruma uka alya Kadesh-barnea indesaiya uruka. Neeny mmbo shilemweengye mbony, shaasa shetiishi.

⁸ Lyo vanavamaye veru valya sheriani nawo vakaawuta mirima ya vandu veru lyo yeny shasora shaasa Nndumi Iruva wakwa alevavasya.

⁹ Naasa Mose kashilyiiya mboo deny, kashivia, Ni dede uruka yelo kusheluvarya mbo lushevaa ding'u yafo yewe, na vana vafo llung'anu, mashika yewe mmbo kuleirikya Nndumi Iruva wafo kisumani.

¹⁰ Ulaalu Nndumi Iruva anshitiryau na mnu, shaasa aleamba, ando a nyaaka makumi aana na iranu uka Uya alerera irero elyo kwa Mose, kyeeri Israeli vekee kyaarony, na ulaalu mbo shambonau myaaka makumi nyanya na iraanu.

¹¹ Neeny mmbo shivetiri finya indo sha kyeeri kilya Mose aleshiruma, shishaangaa neesomuka.

¹² Ulaalu shakutereva shiniinga ifumbu elyi Nndumi Iruva alerera kya vayo nkonu yeto, mashika naakwa ni yewe kuleeta nkonu ulya shaasa Vaanaki veekai, na shaasa miri yekee miikare na turuve, nawe Nndumi Iruva nkuti nashikaye, neeny shiwoombute vankaa-fo, shaasa Nndumi Iruva aleamba

¹³ Naasa Yosua kambikya mbora, kaniinga Kalebi mwana wa Yefune muri wa Hebron uve ding'u yakwe.

¹⁴ Hebron ukava wa Kalebi mwana wa Yefune, Mkenai fika inu, mashika llya aleirikya Nndumi Iruva, Iruva wa Israeli nisha.

¹⁵ Elyo mbe Hebron mmbo weevaangwaa Kiriat-arba, na Arba yeto mbo eeng'anyi vengyi woose, kwa Vaanaki Efo urukeny kukakafo ufoo, fira tikamanda.