YOSUA 11 - BIBILLYA Mareiyo Meele a Iruva

Yosua Avinga Yabini na Vaamrasa Vakwe

¹ Mangyi Yabini wa uruka lwa Hasori kyeeri aleeta mbony yeto aleruma rumi kwa mangyi Yobabu wa Madoni; kwa mangyi ya Shimroni; kwa mangyi ya Akishafu.

² Amwi na kwa vamangyi vengyi-se yewo vekee taari ya uruka lwa ndoo ya ifumbu, na vekee Araba uruka lwekee taari ya sinde ya Kinerothi kundo kurambalanyi na yewo vekee Nafoti-dori taari ya nkwaany.

³ Lyingyi-se karama rumi kwa Vakanaani yewo vekee taari ya ngama, na ya nkwaany, kwa Vaamori, Vahiti, Vaperisi, na Vayebusi vekee kwasi ya ifumbu lya Hermon efo urukeny lwa Mispa.

⁴ Woose vakasomukya na matorito awo maniini veengyi sha nsanga wa mbai ya yeeve, amwi na frasi shiingyi nnu na mitika ya frasi.

⁵ Vamangyi yeva woose vakalunga amwi vasikari vawo vakeenda imannya ulale lumwi kulya mireny ya Meromu naambo vakapani na Israeli.

⁶ Naasa Nndumi Iruva kavia Yosua, “Kulaireye kimaruma kyawo-fo, mashika ndesi sa yei mmbo shivavikaa maakony a Israeli shivawee shivamamite woose, murummbwe mataari a frasi tawo, mukore muro mitika yawo ya frasi.”

⁷ Paripari efo mireny ya Meromu, Yosua na vasikari vakwe vakakapana nawo.

⁸ Nndumi Iruva kavavika maakonya Israeli, vakavakapa na ivarishisa kufike Sidon shiniini na Misrefoti-maimu fika taari ya ngama ya imungo lya Mispa, vakavawaa kulaore eseriswa-u nta nndu umwi.

⁹ Yosua kavatanya shaasa ekyo Nndumi Iruva alemmbavasya; karummbwa mataari a frasi tawo na ikora mitika yawo ya frasi.

¹⁰ Yosua kawuya kyeeri ekyo kavinga na atira muri wa Hasori, kawaa mangyi ya muri yeto, mashika Hasori yo mbee wekee nniini ya ngyumangyi eto.

¹¹ Vakawaa woose vekee muriny yeto va Hasori na irumata deny na muro, nkwiifo kilesa-u kitiri muu-fo.

¹² Na miri myoose ya vamangyi valya amwi na vamangyi woose, Yosua kavawaa woose na irumata, shaasa nndundi wa Nndumi Iruva we Mose emmbavasya.

¹³ Indi Israeli nnyalelyamara miri ingyi ya efo mafumbu-u-fo kuuta muri wa Hasori nsi yeto Yosua aleukora na muro.

¹⁴ Findo fyoose filetirwa mifungwa efo miriny yeyo na ng'umbe Israeli katiipoo, lyo vandu vakawaawa woose dang'a.

¹⁵ Shaasa Nndumi Iruva evavasya nndundi wakwe, ni indo-da Mose alevavasya Yosua na Yosua katana indo, nta kimwi kilerewa kilatanyika efyo fyoose Nndumi Iruva emmbavasya Mose-fo.

Ngyuruka Yosua Alevinga

¹⁶ Niindo Yosua aletira uruka yelo loose, uruka lwa fidooro na mafumbu lwa Negebu na Goshen, na Shefela na Araba na uruka lwa fidooro lwa Israeli efo mamungony.

¹⁷ Kubookya kidooro kya Halaki taari ya Seiri fika Baal-gadi yoo imungony lya Lebanon kwasi ya ifumbu lya Hermon, katira vamangyi vawo woose kawawaa.

¹⁸ Yosua kakapana fira na vamangyi yewo mikonu miingyi,

¹⁹ Nkwiifo muri nta umwi uleruuya urilalyi na vandu va Israeli-fo, kuuta Vahifi vandu va Gibeoni, mashika Israeli mmbo alekapana fira na vandu wa miri ingyi myoose.

²⁰ Kimba ni Nndumi Iruva aleumisa mirima yaawo indo, kutani valekuumba ikapana na Israeli, naambo vasie piny, vamamitwa woose, shaasa Nndumi Iruva alevavasya Mose.

²¹ Kyeeri eki Yosua kakupoo kandemamita Vaanaki vandu vaasha vatiri finya, wookye efo urukeny lwa fidooro, uka Hebron, na uka Debiri, na uka Anabu na uka uruka loose lwa mafumbu lwa Yuda, na mafumbu moose a Israeli, Yosua kavamamita woose na miri yaawo.

²² Mmbalesaafo Vaanaki nta umwi efo urukeny lwa Israeli, kuuta kulya Gaza na Gati na kulya Ashdodi.

²³ Yosua katira uruka elo loose, shaasa Nndumi Iruva alevavasya Mose, Yosua nawe kaniinga Israeli ive ding'u yaawo, shaasa ngyufyari tawo tileavyo. Naasa uruka lukava ufoo kulakaefo-se fira.