YONA 3 - BIBILLYA Mareiyo Meele a Iruva

Yona airikya Nndumi Iruva

¹ Naasa Nndumi Iruva kawuya ivia Yona

² “Enda muriny eto nniini wa Ninavi kundefitya vandu yewo nrumi yeyo shilekuniingya.”

³ Nalyo Yona kairikya Nndumi Iruva kaenda Ninavi. Nato mmuri nniini nnu ushipoo mikonu iraru sele iurumbwa yoo nnang'ani kavii.

⁴ Akifika-fo keenda ando a nkonu piti, kakapa weele kaamba, “Ni mikonu makumi aana yasaa-u Ninavi imamitwa.”

⁵ Vandu va Ninavi llya valeita indo vakakunyiisya Nndumi Iruva. Vakapooka ikootoya, wo umwi waawo. Woose kupookya nniini fika n-du waawo, vakaraa makunnya kya yoora iindukya Iruva.

⁶ Naakwa ni mangyi ya Ninavi kyeeri eeta indo, kooka yoo kitiminy kyakwe kya umangyi kakuuta soori ta kimangyi, karaa makunnya, kakaa rembo efo ifuny.

⁷ Kawuya kakapya vandu va Ninavi weele kaamba, “Elyi ni ivavaso lyauka kwa mangyi na veeshillya vakwe woose: ‘Wo nndu nakootoye, kulake-fo nndu alya kindo, vandu, nta ng'umbe, nta moonri, fyoose filalye nta ina-fo.

⁸ Vandu na findo efyo nkuti firaa makunnya. Wo nndu natereve na nrima dede deny, nare shia takwe shiravi na ngaa tilasenyi.

⁹ Llyo kulakooye Nndumi Iruva ashealashaa kilya enkunda ilutannya kya unyafi lwakwe, lukie imamitwa.’”

¹⁰ Iruva kalla shaasa vandu va Ninavi valetana, kamanya mmbo vara deny shia tawo shiravi. Nawe kaalasha kilya enkunda ivatannya kyeevakapa.