YONA 1 - BIBILLYA Mareiyo Meele a Iruva

Yona Amina Nndumi

¹ Nalyo irero lya Nndumi Iruva lyikasheyaa Yona wa Amitai lyikammbia,

² Yona kupoo kweende Ninavi, nto muri ulya nniini, kundekaba-fo weele mashika uravi lwawo lwamfumbuka kutani lwashikooya.

³ lyo Yona nalakunde. Karisha neende Tarshishi, nakaa kwaasha na Nndumi Iruva. Naasa kasoka na Yafa, kalollya-fo ngalava ishendaa Tarshishi. Koota fesa ya kyaaro kasaama-fo naambo nakusurumi kisanguny kya Nndumi Iruva.

⁴ Naasa Nndumi Iruva karuma uraato lwa finya efo yeeveny, kutani ngalava ilya yasya ifika-fika.

⁵ Naasa veerwaa ngalava ilya vakairyaa nnu deny, wo umwi waawo kafuuya Iruva lyakwe. Vakeerya na sharo yekee ngalaveny naambo yaangwe. Lyo we Yona kyeeri ekyo mmbo ekee efo mmba nnang'ani karekya rony.

⁶ Llyo nteteri wa ngalava ilya alesora Yona kammbia, “Niinda-ro nndu yewe kulele rony tupu? Kupoo-te kutereve Iruva wafo lulakooye ashekwaarannya nalwaauwe yaa.”

⁷ Vandu valya vekee ngalaveny vakakunda ikapa kura valole ni vi eende ngatara ilya shoose. Naasa kura ilya ikawoya Yona.

⁸ Llyo valembia, “Yewe kwalweengye ngatara yei, nkyeluvie mmashora-ki kurundaa? Kukee wa isanga-ki?”

⁹ Yona kavavia, “Yeny ni Mwebrania. Mmbo shikee nndu shiindyaa Iruva Nndumi Iruva yeu atannyi yeeve na ulana.”

¹⁰ Vandu valya vaita indo vakairyaa nnu deny. Vakammbia, “A nkyoki kutannyi?” Mashika vandu valya mmbo valemanya nkuti nndu yeu naakooye mmbo alyamarye karisha Nndumi Iruva, ni llya we muni embashunnya ekyo.

¹¹ Kimmba yeeve yekeengera ilema vakammbesa, “A nkyoki lukutanyaa naambo yeeve imammyi?”

¹² Llyo Yona alevavia, “Shitireny mushikunnyi efo mureny nayo yeeve mmbo ishemammyaa, mashika shiishi nnyeny shamwengye ngatara yei.

¹³ Lyo vandu valya vakeengera iwaana na ngalava naambo vaiviire mbai ya uruka, kyeendi urato lukeengera lyo maye, valaidimi itana kindo.

¹⁴ Vakeengera itereva Nndumi Iruva vakaamba, Woi Nndumi Iruva lwakutereva-dwa lulasheesia kyeendwa ni nndu yeu, nta kulalukape yese kimaruma kya samu ya nndu yeu nalatiri mbese, mashika yewe Nndumi Iruva mmbo kwatana kindo kwankukundya kumuni.”

¹⁵ Nalyo vakatira Yona, vakankunnya efo yeeveny. Nayo yeeve ikamammya sau.

¹⁶ Nalyo vandu valya vakareremmya Nndumi Iruva nnu, vakamuutya firaso neevika kyaasa kyenkusirya.

¹⁷ Nndumi Iruva karuma ikunga iniini nalyo lyikamira Yona. Nawe kakaa ndeuny ya vayo ando a mikonu iraru.