Yohane 9 - BIBILLYA Mareiyo Meele a Iruva

Yesu ashiisa nndu mfu miso kipookya ammbonika

¹ Naasa eefo ashiiraa ando kalollya nndu akee mfu miso kipookya ammbonika.

² Na valya vakiloshyony kyakwe vakammbesa, “Ale llosha! Nndu alelyamara mmbi, ni nndu yeu ndesa ao ni ndeye na maye kutani awonika indo akee mfu miso?”

³ Yesu kaallwa, “Nta nshi nndu yeu alelyamara-fo, nta nshi ndeye na maye-fo. Mmbo kileva indo naambo mashora a Iruva akooye imanyika efo kwakwe.

⁴ Yese kuti luve veetana mashora a yeto aleshiruma elyi kukee nsanyiny. Kio mmbo kiifo kishaa, llyo nndu nnakiidimaa-se irunda-fo.

⁵ Meendi shikee kunu ulaniny mmbo shava sa ya ulana.”

⁶ Amaamba indo kafishya maare si. Maare alya kaumba-umba nang'u mmbumba wa uteri. Mmbumba ulya wa uteri kawaamba yoo misony alya akwe.

⁷ Kammbia, “Enda kundesamba efo iruveny lya Siloamu.” Kwaallwa ni kimwi na nndu Nrumi. Naasa kakweengya kandesamba. Kawuya alolaa.

⁸ Naasa vandu valya va nnyanu na valya valellollya elyo mbee ekee nndu mweererya vandu, nalyo vakaamba, “Nyira, a yeu nshiwe ulya aleva mwiikaa-fo rembo asheereryaa vandu.”

⁹ Vengyi vakaamba, “Nshiwe-fo-te.” Vengyi vakaamba, “Ode, ni nndu afwanani nawe.” Nawe kaamba, “Ee, mmbwe yeny-da.”

¹⁰ Naasa vakammbia, “A mmbo kileva inda elyi miso afo akooya itarambuka.”

¹¹ Nawe kaallwa, “Ni nndu ulya avaangwa ni Yesu, mmbo awumba mmbumba wa uteri kawaamba yoo misony akwa. Kashivia, Enda kulya Siloamu kundesamba-fo. Nalyo shaenda. Shimmeesamba shakooya ate shiifo llolaa.”

¹² Vakammbia, “A nndu yeto nkwi akai.” Kaamba, “Nshukuny!”

Vasununda kya ishiiswa lya nndu mfu miso

¹³ Nalyo vakanderwaa nndu yeto ekee mfu miso na kulya kwa Vafarisayo.

¹⁴ Na nkonu ulya wekee wa Sabato llya Yesu aleumba mmbumba ulya wa uteri kawaamba yoo misony akwe.

¹⁵ Naasa Vafarisayo nawo-da vakammbesa-se shaasa alekooya ilola. Nawe kavavia, “Ni mmbumba wa uteri aleshaamba misony, shandesamba shakooya-ny ilola.”

¹⁶ Naasa Vafarisayo valya maata vakaamba, “Nndu yeu nshi nndu aukye kwa Iruva-fo, kimmba nalashiinndyaa Sabato.” Vengyi vakaamba, “Kukooye ni nndu llyamari a niinda eeshiidimaa itana fya wende fya ngata yeyo.” Nalyo vakaraukana.

¹⁷ Naasa vakawuya vakavia ulya ekee mfu miso, “A yewe kwaamba inda kyafo ku muni elyi alekutarammbwa miso?” Nawe Kaamba, “Mmbo akee nndu nkisuku.”

¹⁸ Naasa Vayuda nta valairikye kyakwe sheelyi mmbo ekee mfu miso kakooya ilola. Vakatana vavaanga ndeye na maye wa nndu ulya alekooya ilola.

¹⁹ Vakavavesa vakaamba, “Nndu yeu mmbwe mwana waany ulya eishiwa mmbo alewonika eekee mfu miso? A kilevaa-ny inda elyi ulaalu indi ankooya ilola?”

²⁰ Naasa ndeye na maye vakaallwa vakaamba, “Kindo lwiishi nndu yeu ni mwana weeru nawe mmbo alewonika eekee mfu miso.

²¹ Kya indi shaasa kileva ulaalu kakooya ilola ekyo yese llukiishi-fo nta llwiishi nndu yeto alentarammbwa miso-fo. Kyemmbeseny-te, mmbo akee nndu nniini, ashaambaa ekyo kyakwe we muni-te!”

²² Na kyaninga ndeye na maye karera indo nyeeli veereiye Vayuda. Kimmba Vayuda venfisha kyama, kwakooya kwakaa-fo nndu ashemwamba paa mmbo akee Kristo, nawo vammbikye ishingo efo mmba yaawo yeeterevya.

²³ Nkyo kimaruma ndeye na maye vakaamba, “Mmbo akee nndu nniini. Kemmbeseny we muni-te!”

²⁴ Naasa vakawuya ivaanga nndu ulya lya kavii, ulya ekee mfu-miso. Vakammbia, “Iruva mmbwe kumwiitikisaa! Kya nndu yeu lwammanya mmbo akee llyamari.”

²⁵ Naasa nndu ulya kaallwa, “Kwakooya mmbo akee nndu llyamari ekyo nshiishi-fo. Ni kindo kimwi-nsi shiishi deny, mmbo shekee mfu miso na ulaalu shankooya ilola.”

²⁶ Naasa vakammbia, “Mmbo alekutanya inda? Ni inda alekutarammbwa miso?”

²⁷ Kavaalwa, “Mmbo shammeemuvia, neeni nta mulaite. Naambo ki-se mukunndye ikiita lya kavii? A mmbo neeni mwakunda iva vakiloshyony kyakwe ndesa?”

²⁸ Vakasakya nawe vakammbia, “Nndu akee wa kiloshyony kyakwe ni yewe! Yese mmbo lukee vakiloshyony kya Mose-te

²⁹ Kya Mose yese lwiishi, ni Iruva alerera nawe. Indi nndu yeto llwiishi nta kundo aukye-fo.”

³⁰ Nndu ulya kaallwa kavavia, “Ate ando atiri tamba ni yoony, elyi mulaishi kundo aukye, nawe mmbwe aleshitarammbwany miso!

³¹ Mmbo luveishi Iruva nnarannyaa nndu llyamari-fo. Indi kwakooya kwakaa-fo nndu areremmya Iruva kavetana kindo kikundywa mmbwe, yeto mmbwe ashemwaarannyaa.

³² Kira ulana lwammbikwa kulandeitiwa nndu aletarammbwa miso a nndu alewonika akee mfu-miso.

³³ Kwee nndu yeto nalaukye kwa Iruva nneemanyaa itana nta kindo-fo.”

³⁴ Vakaallwa vakaamba, “Yewe nndu kulewonika kukee na ulyamari, kwatana kwalulosha yese!” Vakamweera neefo poo.

Ufu lwa nrima

³⁵ Naasa Yesu kaita vammweera na poo. Kakwaannya nawe kaamba, “A kukusirye na Mwana yeto wa Iruva ndesa?”

³⁶ Nawe kaallwa kaamba, “A mmbo-vi Nndumi, neeny shikooye ikusirya nawe.”

³⁷ Yesu kammbia, “Illollya kwammellollya, na yeto aifo areraa neewe mmbwe.”

³⁸ Nawe kaamba, “Akau shankusirya-u Nndumi!” Nalyo kamoolokya si.

³⁹ Na Yesu kaamba, “Yeny mmbo shisheye na kunu ulaniny naambo ekyo kya vandu kirumbuke, yewo valalollye naambo vakooye ilola, na yewo valollye naambo vakooye iva vafu miso.”

⁴⁰ Naasa Vafarisayo maata varyani nawe vakaita indo vakammbia, “A mmbo lukee vafu miso na yese?”

⁴¹ Yesu kavavia, “Kwee mwekee vafu miso, mmweevaa valyamari-fo; indi ulaalu mmbo mwamaamba mulollye naasany ulyamari lwany mmbo lwamukaya.”